Waandamaji wafunga mnyororo ofisi za tume ya uchaguzi Malawi

Hali  nchini Malawi haijatulia hata baada ya Mahakama ya Kikatiba juzi kutupilia mbali ya rufaa ya aliyekuwa Rais wa nchi hiyo, Arthur Peter Mutharika ya kuzuia uchaguzi mwingine.

Jana waandamanaji  walifika katika ofisi za tume ya uchaguzi na kisha  kufunga kwa mnyororo ofisi hizo kama njia ya kumlazimisha mwenyekiti wake kujiuzulu baada ya uamuzi huo wa mahakama.

Mamia ya waandamanaji hao walitembea kwa kilomita tano hadi kufika katika ofisi za tume hiyo zilizoko  Blantyre, na kufunga geti la kuingilia kwa kutumia mnyororo wenye kutu.

Maelfu ya watu walifanya jambo kama hilo hilo katika jiji la Lilongwe  wakimfungia ofisa wa jeshi.

Wiki iliyopita mahakama ilibatilisha matokeo ya uchaguzi ambayo yalishuhudia Mutharika akishinda kwa ushindi mwembamba, ikieleza kuwa yaligubikwa na uvunjifu wa sheria.

Kutokana na hayo mahakama hiyo iliamuru kufanyika kwa uchaguzi mwingine mpya wa urais ndani ya siku 150 pamoja na kufanyika kwa uchunguzi juu ya operesheni zote zinazoendeshwa na Tume ya Uchaguzi ya nchini humo (MEC).
 

Hii ni mara ya kwanza kwa matokeo ya urais kufutwa mahakamani kwa misingi ya kisheria nchini Malawi tangu ipate uhuru kutoka kwa Waingereza mwaka 1964,  na matokeo ya pili kufutwa katika bara la Afrika baada ya yale ya Urais wa Kenya mwaka 2017.

Read More →

Wanafunzi waandamana kupinga adhabu shuleni

Wanafunzi wanaosoma Shule ya Sekondari Shinyanga (SHYBUSH), iliyopo wilayani Kishapu mkoani humo, wameandamana kwenda kwa Mkuu wa Mkoa wa Shinyanga, Zainab Telack wakilalamika kunyanyaswa na walimu, pamoja na kupewa adhabu zilizokithiri..

Kaka Mkuu wa shule hiyo Mwendesha Manyangu, akizungumza kwa niaba ya wanafunzi wenzake mara baada ya kufika kwa Mkuu wa Mkoa, alisema kumekuwa na malalamiko mengi ya wanafunzi kunyanyaswa na walimu shuleni hapo, pamoja na kupewa adhabu kwa makosa ambayo wangeonywa.

Alisema baada ya kilio hicho kuwa cha muda mrefu juu ya adhabu hizo wamekuwa wakimweleza Mkuu wa Shule hiyo Malambi Malelemba, lakini amekuwa hawajali na ndipo wakaamua kuandamana ili kipatiwe ufumbuzi.

Naye Mkuu wa Mkoa wa Shinyanga Zainab Telack, aliwatoa wasiwasi wanafunzi hao na kubainisha kuwa malalamiko yao atayafanyia kazi, huku akiwawaonya kuacha kujiingiza kwenye migomo isiyo na maana ambayo inawapotezea muda wa masomo.

Pia aliwaonya wanafunzi ambao wamekuwa wahamasisha migomo shuleni, waache tabia hiyo mara moja, na kubainisha wale ambao wamehamasisha maandamano hayo watashughulikia ili liwe fundisho kwa wanafunzi wengine

Aidha Kaimu Kamanda wa Jeshi la Polisi Mkoa wa Shinyanga Joseph Paul, aliwataka wanafunzi kuachana na makundi ambayo hayawajengi na kuanzisha migomo isiyo na faida, huku akishukuru hawakufanya fujo shuleni kwao ya kuharibu mali, na kuwasihi pale wanapokuwa na matatizo wafuate utaratibu. 

Credit: Nipashe 

Read More →

Wanaowatoza Wananchi Pesa Ya Nguzo Za Umeme Kukamatwa

Waziri wa Nishati, Dk Merdad Kalemani ameagiza makandarasi au mameneja wanaolazimisha wananchi kulipia nguzo za umeme ili kuunganishiwa nishati hiyo kukamatwa.

Amesema watu hao wanapuuza agizo la Serikali inayotaka nguzo hizo kutolewa bure.

Ametoa ufafanuzi huo Februari 15, 2020 baada ya kupokea malalamiko ya mwenyekiti wa CCM Mkoa wa Simiyu, Enock Yakobo katika hafla ya ufunguzi wa ofisi ya CCM Mkoa wa Geita.

Yakobo amesema licha ya Serikali kutangaza mara kwa mara kuwa nguzo za umeme ni bure wapo makandarasi wanaoendelea kukaidi agizo hilo na kuwatoza wananchi fedha.

Kalemani amewataka wakuu wa Wilaya kote nchini kusimamia agizo hilo na kuwakamata watakaotoza fedha.

Amebainisha kuwa Serikali inatoa nguzo za umeme bure na wananchi wanapaswa kuchangia Sh27,000 pekee kwa ajili ya kuunganishiwa umeme

Read More →

Misri yataka bara la Afrika lipewe haki ya kura ya veto

Mwakilishi wa Misri katika Umoja wa Mataifa ametaka bara la Afrika lipewe viti viwili vya kudumu katika Baraza la Usalama la umoja huo na haki ya kura ya veto (turufu).

Taarifa iliyotolewa na Wizara ya Mambo ya Nje ya Misri imesema kuwa, mwakilishi wa nchi hiyo katika Umoja wa Mataifa, Mohamed Idris ametoa ombi hilo sambamba na kuanza kikao cha duru mpya ya mazungumzo ya Baraza la Usalama kuhusu mabadiliko na ustawi ndani ya jumuiya hiyo ya kimataifa.

Taarifa hiyo imesema kuwa, mwakilishi wa Misri katika UN ameashiria makubaliano yaliyofikiwa baina ya viongozi wa nchi za Afrika katika mkutano wa siku chache zilizopita mjini Addis Ababa chini ya uenyekiti wa Misri na kusisitiza kuwa: Cairo inataka bara la la Afrika lipewe viti viwili vya kudumu katika Baraza la Usalama na mamlaka kamili ikiwa ni pamoja na haki ya kura ya turufu.
 

Baraza la Usalama la Umoja wa Mataifa lina jumla ya wanachama 15, na wanachama 5 miongoni mwao wana haki ya kutumia kura ya veto.

Read More →

Habari Zilizopo Katika Magazeti ya Leo Jumapili February 16

Read More →

VIGOGO YANGA WALAZIMISHWA SARE NYUMBANI...PENALTI YA MORRISON YATEMBEA JUU YA LANGO

VIGOGO, Yanga SC wamelazimishwa sare ya pili mfululizo nyumbani baada ya kumaliza dakika 90 bila kufungana na Tanzania Prisons katika mchezo wa Ligi Kuu ya Tanzania Bara usiku huu Uwanja wa Taifa Jijini Dar es Salaam.

Sare hiyo inawaongezea pointi moja Yanga SC na kufikisha pointi 39 katika mchezo wake wa 20 wa msimu, ikibaki nafasi ya tatu nyuma ya Azam FC yenye pointi 44 na mabingwa watetezi, Simba SC wenye pointi 56 baada ya wote kucheza mechi 22.

Hiyo inakuwa sare ya pili mfululizo nyumbani baada ya Yanga kulazimishwa sare nyingine ya 1-1 na Mbeya City kwenye mchezo uliopita hapa hapa Dar es Salaam. 

Hata hivyo, Yanga itabidi wajilaumu wenyewe kwa kupoteza nafasi nzuri ya kupata bao dakika ya 73 leo baada ya kiungo wake Mghana, Bernard Morrison penalti kufuatia kupiga juu ya lango.

Penalti hiyo ilitolewa baada ya yeye mwenyewe, Morrison kuangushwa kwenye boksi na kipa wa Tanzania Prisons, Jeremiah Kisubi, ingawa refa Hance Mabena ilibidi akajiridhishe kwa msaidizi wake namba moja, Leonard Mkumbo kabla ya kutenga tuta.

Kikosi cha Yanga SC kilikuwa; Farouk Shikhalo, Juma Abdul, Adeyoum Ahmed, Lamine Moro, Ally Mtoni ‘Sonso’, Papy Kabamba Tshshmbi, Mapinduzi Balama, Mohammed Issa ‘Banka’/ Mrisho Ngassa dk77, Yikpe Gislain/ David Molinga dk60, Tariq Seif/Deus Kaseke dk63 na Bernard Morrison.

Tanzania Prisons; Jeremiah Kisubi, Michael Ismail, Laurian Mpalile, Vedastus Mwihambi, Nurdin Chona, Jumanne Elfadhili, Cleophace Mkandala/ Ismail Aziz dk86, Ezekia Mwashilindi, Paul Peter, Jeremiah Juma/ Lambert Sabiyanka dk58 na Adili Buha. 

Mechi nyingine za Ligi Kuu leo, bao pekee la Nahodha John Rapahel Bocco liliipa Simba SC ushindi wa 1-0 dhidi ya Lipuli FC 1-0 Uwanja wa Samora mjini Iringa.

Ruvu Shooting ikaichapa 1-0 Mbeya City bao pekee la Fully Maganga dakika ya 50 Uwanja wa Mabatini, Mlandizi mkoani Pwani. 

Biashara United pia ikaibuka na ushindi wa 1-0 dhidi ya Alliance bao pekee la Okorie James dakika ya 45 na ushei Uwanja wa Karume mjini Musoma mkoani Mara.

Ndanda FC ikaibuka na ushindi wa ugenini wa 1-0 dhidi ya Singida United, bao pekee la Vitalisy Mayanga dakika ya 80 Uwanja wa Liti, Singida.

JKT Tanzania ikaibuka na ushindi wa ugenini wa 1-0 pia dhidi ya Mtibwa Sugar, bao pekee la Danny Lyanga dakika ya 33 kwa penalti.

Mwadui FC ikatoka nyuma na kupata sare ya ya 1-1 nyumbani na Namungo FC Uwanja wa Kambarage mkoani Shinyanga. 

Namungo ilitangulia kwa bao la Nzigamasabo Steve dakika ya nane kabla ya Raphael Aloba kuisawazishia Mwadui dakika ya 49.

Nayo Kagera Sugar ikaibuka na ushindi wa 2-0 dhidi ya Mbao FC, mabao yake yakifungwa na Geoffrey Mwashiuya dakika ya nane na Yusuph Mhilu dakika ya 31 Uwanja wa Kaitaba, Bukoba.

Polisi Tanzania ikaibuka na ushindi wa 3-2 dhidi ya wenyeji, Uwanja wa Uhuru Jijini Dar es Salaam, mabao yake yakifungwa na Marcel Kaheza dakika ya 10, Matheo Anthony dakika ya 39 na Baraka Majogoro dakika ya 87 – na ya wenyeji yakifungwa na Abdul Hillary dakika ya 80 na Ally Ramadhani dakika ya 83.

CHANZO - BINZUBEIRY BLOG

Read More →

CHUGAZO : 'HAKUNA MWANAUME ANAKUWA JUU BILA KUSIMAMA KWENYE MABEGA YA MWANAMKE'

Mkuu wa Idara ya Ujenzi wa Nguvu za Pamoja (TAPO) TGNP Grace Kisetu akifungua warsha ya kuhusu ufuatiliaji wa kazi za uhamasishaji wa jamii juu ya umuhimu wa wanawake kushiriki katika nafasi na michakato ya maamuzi na uongozi leo Jumamosi Februari 15,2020 katika Ukumbi wa Vijana Center Mjini Shinyanga. Picha zote na Kadama Malunde 1 blog.

Mkuu wa Idara ya Ujenzi wa Nguvu za Pamoja (TAPO) TGNP Grace Kisetu akifungua warsha ya kuhusu ufuatiliaji wa kazi za uhamasishaji wa jamii juu ya umuhimu wa wanawake kushiriki katika nafasi na michakato ya maamuzi na uongozi iliyokutanisha pamoja imekutanisha pamoja wadau kutoka makundi ya viongozi wa mila,dini na jamii kutoka mikoa ya Shinyanga Kigoma,Tabora Mara na Simiyu.

Mkuu wa Idara ya Ujenzi wa Nguvu za Pamoja (TAPO) TGNP Grace Kisetu akifungua warsha ya kuhusu ufuatiliaji wa kazi za uhamasishaji wa jamii juu ya umuhimu wa wanawake kushiriki katika nafasi na michakato ya maamuzi na uongozi ambapo alisema lengo ni kuongeza nafasi za wanawake katika nafasi za uongozi.

Afisa Mtendaji wa kata ya Murufiti wilaya ya Kasulu mkoani Kigoma, Cameroon Chugazo  akizungumza katika warsha hiyo. Alisema -"Hakuna kiongozi yeyote duniani ambaye anafikia mamlaka ya juu bila kusimamia mabega ya mwanamke kwa sababu mwanamke ndiye anayeandaa kiongozi wa kesho.‘Haiwezekani Orijino izae feki’,sasa kama wao wanatengeneza viongozi kwanini wao wasiwe viongozi".

Kiongozi wa Jamii Avelina Mwigulu kutoka wilaya ya Meatu mkoani Simiyu akizungumza katika warsha hiyo ambapo alisema bado kuna baadhi ya wanaume hawataki kuwaruhusu wanawake kugombea nafasi za uongozi kwa hofu ya kwamba mwanamke akiwa kiongozi atakuwa na mamlaka na nguvu zaidi kuliko mwanamke kitendo ambacho amesema siyo kweli.

Mwenyekiti wa VIKOBA kata ya Kizengi wilaya ya Uyui mkoa wa Tabora, Hobokela Joseph akizungumza katika warsha hiyo ambapo aliwataka wanawake kupuuza kauli zinazowakatisha tamaa wanawake kugombea nafasi za ,uongozi kama vile kauli za kwamba ‘Mwanamke hawezi kuwa juu ya mwanaume’, ‘mwanamke akiwa kiongozi atachukua waume za watu’ ‘mwanamke akiwa kiongozi atakuwa mhuni na malaya’,’mwanamke ni wa kuzaa tu na kulea familia’.

Washiriki wa warsha hiyo wakiwa ukumbini.

Washiriki wa warsha wakiwa ukumbini.

Washiriki wa warsha kutoka mkoa wa Tabora wakifanya kazi ya kikundi.

Washiriki wa warsha kutoka mkoa wa Kigoma wakifanya kazi ya kikundi.

Washiriki wa warsha kutoka mkoa wa Shinyanga wakifanya kazi ya kikundi.

Washiriki wa warsha kutoka mkoa wa Simiyu wakifanya kazi ya kikundi.

Washiriki wa warsha wakiwa nje ya ukumbi.

Na Kadama Malunde – Malunde 1 blog

Wanawake wametakiwa kupuuza kauli ambazo zimekuwa zikitolewa na baadhi ya watu kuwa hawawezi kuwa viongozi kwani mwanamke ndiyo mtu pekee duniani anayeandaa watu kuwa viongozi kuanzia wakiwa watoto hivyo haiwezekani mtu anayeandaa viongozi akashindwa kuwa kiongozi.

Hayo yamesemwa leo Jumamosi Februari 15,2020 na wadau wa haki za wanawake katika Warsha ya ufuatiliaji wa kazi za uhamasishaji wa jamii juu ya umuhimu wa wanawake kushiriki katika nafasi na michakato ya maamuzi na uongozi iliyofanyika katika Ukumbi wa Vijana Center Mjini Shinyanga.

Kwa Mujibu wa Mkuu wa Idara ya Ujenzi wa Nguvu za Pamoja (TAPO) TGNP Grace Kisetu alisema warsha hiyo ya siku mbili iliyoandaliwa na Mtandao wa Jinsia Tanzania (TGNP) imekutanisha pamoja wadau kutoka makundi ya viongozi wa mila,dini na jamii kutoka mikoa ya Shinyanga (Kishapu),Kigoma (Kasulu), Tabora (Uyui), Mara (Tarime) na Simiyu (Meatu) kwa lengo likiwa ni kuongeza nafasi za wanawake katika nafasi za uongozi.

Akizungumza katika warsha hiyo,Afisa Mtendaji wa kata ya Murufiti wilaya ya Kasulu mkoani Kigoma, Cameroon Chugazo alisema hakuna kiongozi yeyote duniani ambaye anafikia ngazi ya juu kimamlaka bila kusimamia mabega ya mwanamke kwa sababu mwanamke ndiye anayeandaa kiongozi wa kesho.

“Hakuna mwanaume anafanikiwa kuwa juu kiuongozi bila kusimamia mabega ya mwanamke. Mwanaume hawezi kuwa bora bila mwanamke huyo anayetengeneza kiongozi wa kesho, haiwezekani mwanamke huyo huyo atengeneze kiongozi bora halafu yeye awe wa hovyo ‘Haiwezekani Orijino izae feki’,sasa kama wao wanatengeneza viongozi kwanini wao wasiwe viongozi?”,alihoji Chugazo.

“Mwanamke ana nguvu kuliko mwanamke. Mama ndiyo anatengeneza kiongozi ‘Hawezi kutengeneza kitu orijina akawa feki’ .Kutokana na kutambua nafasi ya mwanamke,ndiyo maana TGNP na wadau tumekuja na mpango wa kuwaambia wanawake kuwa wanazo sifa za kuwa viongozi katika jamii”,alisema.

Alisema kinachotakiwa sasa ni wanawake kuamka kifikra na kuachana na kauli za mawazo mgando kuwa mwanamke hawezi kuongoza bali wajitokeze kugombea na kushika nafasi za uongozi nchini.

Naye Mwenyekiti wa VIKOBA kata ya Kizengi wilaya ya Uyui mkoa wa Tabora, Hobokela Joseph aliwataka wanawake kupuuza kauli zinazowakatisha tamaa wanawake kugombea nafasi za ,uongozi kama vile kauli za kwamba ‘Mwanamke hawezi kuwa juu ya mwanaume’, ‘mwanamke akiwa kiongozi atachukua waume za watu’ ‘mwanamke akiwa kiongozi atakuwa mhuni na malaya’,’mwanamke ni wa kuzaa tu na kulea familia’.

Aidha aliwashauri wanawake kujiunga katika vikundi vya ujasiriamali/VIKOBA ili waweze kujikwamua kiuchumi ili kukabiliana na changamoto ya uchumi huku akiwataka wanawake kutoa sauti ili wasaidiwe pale wanapobaini wanakandamizwa katika jamii.

Kwa upande wake, Kiongozi wa Jamii Avelina Mwigulu kutoka wilaya ya Meatu mkoani Simiyu alisema bado kuna baadhi ya wanaume hawataki kuwaruhusu wanawake kugombea nafasi za uongozi kwa hofu ya kwamba mwanamke akiwa kiongozi atakuwa na mamlaka na nguvu zaidi kuliko mwanamke kitendo ambacho amesema siyo kweli.

“Nawaomba wanaume waachane na mtazamo huu hasi kwani masuala ya uongozi siyo nguvu bali kinachotakiwa ni akili,hekima na busara ambavyo hata wanawake wanavyo.Wanaume wawaunge mkono na kuwapa ushirikiano wanawake wawe katika nafasi za uongozi na ngazi za maamuzi ili tulete mabadiliko chanya katika jamii”,alisema Mwigulu.

Read More →

MAGAIDI YAVAMIA KIJIJI NA KUUA WATU 31

Watu wapatao 31 wameuawa hapo jana katika shambulio dhidi ya kijiji cha Ogossagou nchini Mali. 

Maafisa wa serikali ya Mali wametangaza habari hiyo baada ya watu wenye silaha kuvamia kijiji hicho katikati ya nchi hiyo ya magharibi mwa Afrika.

Maafisa wa eneo hilo wamesema kuwa, watu wenye silaha Alhamisi usiku walikivamia kijiji cha Ogossagou cha katikati ya Mali na kuua watu wasiopungua 31. Wanamgambo wa kabila la Dogon ndio wanaotuhumiwa kufanya mauaji hayo.

Mkuu wa kijiji cha Ogossagou amethibitisha habari hiyo na kuongeza kuwa, wanamgambo wapatao 30 walikivamia kijiji hicho baada ya jeshi la serikali kuondoka.

Mwezi Machi mwaka jana pia kijiji hicho kilishuhudia mauaji makubwa ya umati ambayo yalipelekea kuuliwa kwa halaiki watu 160 wa kabila la wafugaji la Fulani.

Licha ya jeshi la Mali kwa kushirikiana na askari wa kigeni kama wa Ufaransa kuchukua hatua mbalimbali, lakini bado nchi hiyo ya magharibi mwa Afrika inaendelea kushuhudia machafuko na vitendo vya mara kwa mara vya kigaidi.

Read More →

Kambi Ya Kijeshi ya Marekani Iraq Yapigwa Tena Kombora

Kombora la aina ya Katyusha limeanguka kwenye kituo cha jeshi la Marekani katika mkoa wa Kirkuk, kaskazini mwa Iraq. 

Shambulizi hilo lilitokea Alhamisi jioni bila kusababisha kifo au majeruhi. 

Hata hivyo, kikosi cha polisi cha Iraq kilifanya msako eneo lilikorushwa kombora hilo, na kugundua kifaa cha kurushia makombora chenye makombora kumi na mbili, kombora moja tu likiwa limerushwa.

Read More →

AU yaimairisha maandalizi ya mlipuko wa virusi vipya vya Corona

Kituo cha Kudhibiti na Kuzuia Magonjwa cha Afrika (Africa CDC) cha Umoja wa Afrika kimetangaza kwamba kinazidi kuimarisha juhudi ili kujiandaa na uwezekano wowote wa mlipuko wa virusi vipya vya korona vinavyosababisha nimonia (COVID-19).

Katika mkutano wake na wanahabari wa kila wiki, mkurugenzi wa Africa CDC Dkt John Nkengasong, amesema kituo kinaratibu juhudi na shughuli za maandalizi ya bara na kuitikia uwezekano wowote wa mlipuko wa COVID-19. 

Nkengasong amesema kikosi kazi cha Afrika juu ya virusi vipya vya korona kimeanzishwa miongoni mwa shughuli nyingine ili kuwezesha Afrika kujiandaa na kuwa na uwezo wa kuitikia endapo utatokea mlipuko.

Kikosi kazi cha Afrika, ambacho kinajumuisha wataalamu kutoka Afrika nzima kinaratibiwa na nchi tano zikiwemo Senegal, Kenya, Morocco, Nigeria na Afrika Kusini, ili kusimamia maeneo matano makubwa ya uangalizi, kuzuia na kudhibiti maambukizi, usimamizi wa matibabu ya wagonjwa wenye maambukizi makubwa ya virusi vipya vya korona, mawasiliano ya hatari na usimamizi wa jamii.

Read More →

Ikulu ya Marekani yatoa Taarifa Rasmi ya Sababu za Kumuua Kamanda wa Jeshi la Iran.....Baraza la Seneti Lapitisha Sheria Kumzuia Trump Kuishambulia Iran

Ikulu ya Marekani jana imetoa taarifa  ikisema Rais wa Marekani Donald Trump aliamuru shambulizi la droni lililomuua kamanda mkuu wa jeshi la Iran mwezi uliopita ili kujibu mashambulizi ya nyuma, licha ya madai ya awali kwamba yalitokana na tishio la hivi karibuni.

Kama inavyohitajika kisheria, serikali imetuma taarifa kwa baraza la chini la bunge la Marekani ikielezea shambulizi la Januari 2 lililomuua Qasem Soleiman katika uwanja wa ndege wa Baghdad.

 Shambulizi hilo na jibu la Iran yamezua wasiwasi na kufadhaisha baadhi ya wabunge ambao walisema Trump alifanya kosa kubwa na amewapa Wairan haki ya kushambulia.

Siku moja baada ya kutolewa kwa taarifa hiyo kwa baraza la congress, kamati ya mambo ya nje ya baraza la chini la bunge la Mrekani, imekemea kitendo  hicho cha Trump, na kupitisha  muswada wa sheria ya kuweka ukomo juu ya uwezo wa rais wa kuendelea na vita dhidi ya Iran.

Baraza hilo limepitisha mswada huo kwa kura 55 za ndiyo na kura 45 za hapana, huku wanachama 8 wa Republican wakipiga kura za ndiyo. 

Muswada huo umesisitiza kuwa rais Trump hawezi kuchukua hatua za kijeshi bila ya ridhaa ya bunge. 

Read More →

Wahamiaji Haramu 9 Wakamatwa Dodoma

Jeshi la Polisi Mkoani Dodoma linawashikilia watu wawili akiwamo Mwalimu wa Shule ya Sekondari Kifaru Kelvini Mpoli (39)Mkazi wa Himo, Kilimanjaro, na Cathbert Kirita (58) Mkulima na Mkazi wa Kilema Moshi kwa kosa la kusafirisha wahamiaji haramu 3 kutoka Kilimanjaro kwenda Songwe kupitia njia ya Dodoma.

Akizungumza na waandishi wa habari leo ofisini kwake Kamanda wa Polisi Mkoa wa Dodoma, SACP Gilles Muroto, amesema mnamo tarehe 14/02/2020, huko katika kijiji Cha Mtera Wilayani Mpwapwa, Mkoani Dodoma, walikamatwa wahamiaji haramu watatu ambao ni raia wa Kenya wenye asili ya Somalia.

"Wahamiaji haramu hawa watatu walikamatwa katika kijiji Cha Mtera Wakiwa wanasafirishwa na watanzania, wahamiaji hawa Wakiwa ni raia wa Kenya wenye asili ya Somalia waliingia nchini bila vibali, Kati yao Wanawake wawili na Mwanamme mmoja walikamatwa wakisafirishwa kwenye gari namba T. 248 AWA, Nissan Patrol rangi nyekundu".

Aliwataja wahamiaji haramu hao kuwa ni" Abdirahmani Mohamed (25), Luul Mohamed (30) na Hawa Gedow (18) wote Wakiwa ni Wasomali wenye uraia wa Nchini Kenya" amesema Kamanda Muroto.

Pia amesema mnamo tarehe 03/2/2020, katika kijiji Cha Chinene, Kata ya Haneti, Tarafa ya Itiso Wilayani Chamwino Mkoani Dodoma, katika njia ya Dodoma- Arusha, walikamatwa wahamiaji haramu sita (6) raia wa Somalia waliokuwa kwenye gari la abiria lenye namba T.858 DAP Mali ya Kampuni ya Capricorn, kutoka Arusha kwenda Mbeya.

Amesema wote walikuwa na hati za kusafiria kutoka Kenya lakini walitiliwa mashaka na kubainika waliingia nchini bila uhalali

Read More →

Mbunge CHADEMA Cecil Mwambe, ajiuzulu na kujiunga CCM

Mbunge wa Ndanda Mkoani Mtwara (CHADEMA), Cecil Mwambe  amejiuzulu nafasi hiyo na kutangaza kuhamia CCM

Mwambe amefikia uamuzi huo leo Februari 15, 2020 katika makao makuu ya CCM Lumumba, jijini Dar es salaam

Takribani miezi  miwili iliyopita, Mwambe  alijitosa kugombea uenyekiti wa Chadema akichuana na mwenyekiti wa chama hicho, Freeman Mbowe

Akizungumza kuhusu uamuzi wake huo Mwambe amesema vyama vya upinzani nchini vina safari ndefu ya kujenga demokrasia ya kweli, hivyo ameona  atakuwa anajidanganya na kuwadanganya wapiga kura wake kubaki katika vyama vya namna hiyo wakati bado anatamani kuwatumikia wananchi wa Ndanda.

Mwambe  alijiunga  Chadema mwaka 2015 akitokea CCM ambako jina lake lilikatwa katika mchakato wa kura ya maoni kuwania kupitishwa kugombea ubunge

Read More →

Virusi vya Corona vyaingia Afrika, kisa cha kwanza chathibitishwa Misri

Wizara ya afya ya Misri imetangaza kisa cha kwanza kilichothibitishwa cha mgonjwa wa virusi vya Corona kinachokuwa cha kwanza pia barani Afrika.

Taarifa iliyotolewa na wizara hiyo imesema mgonjwa aliyebainika siyo raia wa Misri lakini pia haikufafanua uraia wa mtu huyo.

Maafisa wa Misri walifanikiwa kuthibitisha kisa hicho kupitia mpango ulioanzishwa na serikali wa kuwafuatilia abiria waliowasili kutoka nchini ambazo virusi vya Corona tayari vimesambaa.

Msemaji wa wizara ya afya ya Misri, Khaled Megahed, amesema serikali imechukua hatua za tahadhari na inafuatilia kwa karibu afya ya mgonjwa huyo ambayo imeripotiwa kuwa imara.

Mamlaka za Misri pia zimeliarifu shirika la afya duniani WHO kuhusiana na kisa hicho na tangu wakati huo mgonjwa huyo amewekwa karantini katika hospitali maalum ya umma.

Mahusiano ya karibu na China na mifumo dhaifu ya afya ni masuala yanayozua wasiwasi kuhusu uwezo wa nchi za Afrika wa kukabilina na mripuko wa virusi vya Corona vinavyyowauwa maelfu ya watu nchini China.

Hayo yanajiri wakati China imetangaza kuwa maambukizi ya virusi vya Corona yamefikia visa 66,492 huku idadi ya waliokufa imepanda hadi watu 1,523 na wagonjwa wengine 11,053 wako kwenye hali mahututi.

Read More →

Kamati Kuu CHADEMA Kukutana kwa Siku Mbili Kuanzia leo

Read More →

Ndugulile Apiga Marufuku Maombi Ya Dawa Kwa Njia Ya Karatasi

Na Englibert Kayombo, WAMJW – Moshi, Kilimanjaro.
Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile amepiga marufuku kwa watumishi wa afya katika vituo vya kutolea huduma za afya kutumia karatasi kama njia ya kuidhinisha maombi ya dawa.

Dkt. Ndugulile ametoa marufuku hiyo maara baada ya kubaini mianya ya upotevu wa dawa za Serikali katika vituo vya kutolea huduma za afya nchini alipokuwa ziarani katika Hospitali ya Rufaa ya Mkoa wa Kilimanjaro (Mawenzi)

“Ni marufuku kuanzia sasa kutumia karatasi za daftari kuomba dawa kutoka idara moja kwenda nyingine, tuandae fomu maalum za maombi” Amesema Dkt. Ndugulile

Ameagiza kuwa dawa zote zinazopatikana katika vituo vya kutolea huduma ziwekwe kwenye fomu za maombi (reiquizitaion form) huku zikionyesha jina la aliyeomba pamoja na kusaini kuthibitisha maombi yake ya dawa.

Amesepa pia mtu au idara ya famasi inayopoke maombi hsyo anatakiwa kuhakikisha maombi hayo na kusaini fomu hiyo.

“Ni marufuku kwa mtu wa famasi kujiongezea dawa kwa maneno ya mdomo au kuambiana, na atakayepokea dawa hizo pia anatakiwa aandike jina lake na kusaini.

Hatua hiyo inakuja mara baada kubaini mianya ya upotevu wa dawa za Serikali ambapo Dkt. Ndugulile amesema “Serikali imewekeza nguvu kubwa sana katika upande wa dawa, lakini pia nyie wataalam ambao mnasimamia mnatakiwa kuhakikisha mnaweka kumbukumbu zenu sahihi ili kudhibiti mianya ya upotevu wa dawa”

“Hapa nnapata mashaka kuwa kuna uptevu wa dawa za Serikali tujirekebishe na kuhakikisha tunatunza vzuri kumbukumbu zetu” Amesema Dk. Ndugulile na kuwataka kuhakikisha wanaweka mifumo ya TEHAMA katika kusimamia maombi ya dawa.

Kwa upande wake Mganga Mfawidhi wa Hospitali ya Rufaa ya Mkoa wa Kilimanjaro (Mawenzi) Dkt. Jumanne Karia amesema wamepokea maelekezo hayo na kuahidi kuyatekeleza mara moja.

“Tunashuruku kwa maelekezo yako, tutaendelea kuunga mkono Wizara ya Afya na tutatekeleza maelekezo uliyoagiza” Amesema Dkt. Karia

Read More →

MADIWANI USHETU WAOMBA MTAALA MPYA MAADILI KWA SHULE ZA MSINGI NA SEKONDARI

Kaimu mkuu wa kanda,ofisi ya Rais sekretarieti ya maadili ya viongozi Gerald Mwaitebele akizungumza na madiwani na wakuu wa idara na vitengo katika halmashauri ya Ushetu hawapo pichani

Baadhi ya watumishi wa halmashauri ya Ushetu wakisikiliza kwa makini mafunzo ya maadili kwa viongozi wa umma.

Mwenyekiti wa halmashauri ya Ushetu Juma Kimisha akifungua mafunzo ya maadili kwa viongozi wa Umma kwa niaba ya mkuu wa wilaya ya Kahama ambaye alikuwa ni mgeni rasmi.

Madiwani wa halmashauri ya Ushetu wakiwa katika picha ya pamoja na viongozi kutoka tume ya maadili ya viongozi wa umma kanda ya Magharibi (Tabora).

***

Na Salvatory Ntandu - Malunde 1 blog

Baraza la madiwani la halmashauri ya Ushetu wilayani Kahama mkoani Shinyanga limeiomba wizara ya elimu sayansi na teknolojia kuanzisha mtaala mpya utakaohusu maadili katika shule za msingi, sekondari na vyuo vikuu utakaowawezesha wanafunzi kuwa na maadili pindi wamapomalizapo masomo yao.

Ombili hilo limetolewa Febuari 13 mwaka huu katika mafunzo ya siku moja ya uzingatiaji wa maadili kwa viongozi wa umma na namna bora ya kujiepusha na migongano ya kimaslahi yaliyotolewa na Ofisi ya sekretarieti ya maadili ya viongozi wa UmMa kanda ya magaharibi (Tabora) yaliyofanyika katika makao makuu ya halmashauri hiyo Nyamilangano.

Esta Matone ni diwani wa viti maalumu kata ya Bulungwa alisema kuwa elimu ya maadili ni muhimu kutolewa kwa ngazi zote hususani wanafunzi kuanzia ngazi ya awali hadi chuo kikuu ili kujenga taifa la watu waaminifu wasiotanguliza maslahi yao pindi wanapokabidhiwa mamlaka katika serikali.

“Tunaipongeza ofisi ya maadili kwa kutupatia mafunzo haya muhimu kwetu sisi viongozi nawaomba mwende ngazi zote za elimu ili suala la maadili liweze kupewa kipaumbele ili taifa letu liweze kusonga mbele katika nyanja za kimaendeleo”,alisema Matone.

Akitolea ufafanuzi wa suala hilo kaimu mkuu wa kanda,ofisi ya Rais sekretarieti ya maadili ya viongozi Gerald Mwaitebele alisema suala hilo linafanyiwa kazi ambapo hadi sasa wameanzisha klabu za maadili katika shule za msingi na sekondari ambazo zinajukumu la kuwafundisha kuhusiana na maadili.

“Tunaendelea kutoa elimu ya maadili katika shule za msingi na sekondari kwa kuwafundisha wanafunzi wetu kuwa waadilifu ili kuhakikisha taifa linapata viongozi waaminifu na wachapa kazi wasiotanguliza maslahi yao”,alisema Mwaitebele.

Alifafanua kuwa elimu ya maadili ni muhimu ndiyo maana ofisi yake inaendelea kuzunguka katika mkoa yote ya kanda ya maghabi ili kuwakumbusha viongozi wa umma kuhusiana na sheria ya maadili ya viongozi wa umma ili waweze kutoa huduma nzuri kwa wananchi wanao wahudumia.

Awali akifungua mafunzo hayo mwenyekiti wa halmashauri ya Ushetu, Juma Kimisha diwani wa kata ya Nyamilangano ambaye alikuwa mgeni rasmi kwa niaba ya mkuu wa wilaya ya Kahama Anamringi Macha aliwataka viongozi na madiwani kuzingatia maadili ili kuepuka kujiingiza katika migongano ya maslahi hususani katika usimamizi wa miradi ya maendeleo.

“Wahudumieni wananchi bila ya upendeleo,tangulizeni uzalendo kwa kuzingatia sheria ya maadili ya viongozi wa umma namba 13 ya mwaka 1995 ambayo inatutaka tufanye kazi kwa weledi na kujiepusha na vitendo vya rushwa”,alisema Kimisha.

Mafunzo hayo ya siku moja yamehudhuriwa na madiwani wa kata 20 zilizopo katika halmashauri ya Ushetu pamoja na wakuu wa idara na vitengo.

Read More →