SERIKALI NA WADAU WATAKIWA KUWEKEZA KATIKA MCHEZO WA PICKLEBALL NCHINI

Serikali na wadau katika sekta ya michezo nchini wametakiwa kuongeza uwekezaji katika mchezo wa Pickleball ili kuukuza, kuutangaza na kuufanya utambulike zaidi nchini, sambamba na kuibua vipaji na kuongeza fursa za ajira kwa vijana.

Rai hiyo imetolewa jijini Dar es Salaam na wachezaji pamoja na waamuzi wa mchezo huo wakati wa mashindano ya Smash and Save, yaliyoandaliwa na Rotary Dar es Salaam kwa lengo la kukusanya fedha zitakazosaidia upatikanaji wa madawati katika shule mbalimbali.

Akizungumza wakati wa mashindano hayo yaliyofanyika juzi katika viwanja vya Tanzanite, vilivyopo Mikocheni, wadau hao wamesema Tanzania imeanza vizuri katika mchezo huo tangu ulipoanza kutambulishwa rasmi nchini miaka ya hivi karibuni, huku wakieleza kuwa kuna mwitikio mkubwa kutoka kwa vijana.

Mdau, mdhamini na mchezaji wa Pickleball nchini, Dkt. Sajad Habib Rai, amesema Tanzania ina vipaji vingi vinavyoweza kufanya vizuri katika mchezo huo, akisisitiza kuwa kinachohitajika ni kuwapa vijana wanaojihusisha nao fursa na usaidizi unaostahili.

“Ukweli ni kwamba Pickleball imekuja kwa kasi hapa nchini. Ukiangalia katika viwanja mbalimbali ambako mchezo huu unachezwa, utaona mwamko mkubwa wa vijana. Watu wana moyo na mapenzi na mchezo huu. Kinachohitajika ni kuwashika mkono ili kuwa na wachezaji bora watakaoliwakilisha taifa katika michuano mbalimbali ya mchezo huo,” amesema Dkt. Sajad.

Ameongeza kuwa, kama mdau wa mchezo huo, amekuwa akijitolea kufadhili juhudi za vijana wanaopenda kuucheza, ikiwemo kuandaa mashindano maalumu yenye lengo la kuibua na kukuza vipaji.

Dkt. Sajad ameiomba Serikali, hususan Wizara yenye dhamana ya michezo, kuangalia namna bora ya kuwafikia wachezaji wa Pickleball na kuweka mikakati itakayosaidia kukuza mchezo huo na kuibua vipaji vinavyoweza kulitangaza taifa katika mashindano ya kimataifa.

Kwa upande wake, mwamuzi wa mchezo huo, Mohammed Raajan, ambaye Agosti mwaka huu alikwenda nchini Vietnam na kuchezesha fainali za dunia za Pickleball, amesema Tanzania ina uwezo wa kufanya vizuri katika mchezo huo iwapo itaweka mikakati madhubuti ya kuukuza.

Raajan amesisitiza umuhimu wa Serikali na wadau kuwekeza katika ujenzi wa viwanja maalumu vya Pickleball ili kurahisisha upatikanaji wa maeneo ya kuchezea na kuhamasisha watu wengi zaidi kushiriki mchezo huo.

Naye Kocha wa Pickleball nchini, Abdallah Manyua, amesema Tanzania ina nafasi ya kufikia mafanikio makubwa katika mchezo huo, ikiwemo kushindana kuwania ubingwa wa dunia, iwapo uwekezaji utaongezwa na wadau pamoja na wadhamini wataona umuhimu wa kuunga mkono maendeleo yake.

Amesema ushirikiano kati ya Serikali, wadau wa michezo, makampuni na wadhamini ni muhimu katika kuweka mazingira yatakayowawezesha wachezaji kupata mafunzo, kushiriki mashindano na kujiandaa kwa ushindani wa kimataifa.

Wadau hao wameeleza kuwa, pamoja na kukuza vipaji, uwekezaji katika Pickleball unaweza kusaidia kufungua fursa mbalimbali kwa vijana, ikiwemo ajira zinazohusiana na ukocha, uamuzi, uandaaji wa mashindano na udhamini wa michezo.

Read More →

WANAFUIKA WA TASAF WILAYANI MISUNGWI WAIPONGEZA SERIKALI KUBADILISHA MAISHA

*Wasema kwa sasa mambo safi ,wanamudu gharama za maisha 

Na Said Mwishehe,Michuzi TV-Mwanza

WANUFAIKA wa Mradi wa Kunusuru Kaya Maskini unaosimamiwa na Mfuko wa Maendeleo ya Jamii (TASAF), wilayani Misungwi Mkoa wa Mwanza, wameipongeza Serikali inayoongozwa na Rais Dk. Samia Suluhu Hassan kwa kuboresha maisha yao.

Wananchi hao wameeleza kunufaika kwa namna mbalimbali ikiwemo kupitia ruzuku, mafunzo ya ujasiriamali na ajira katika miradi ya maendeleo, ambazo zimewawezesha kujikwamua kiuchumi na kumudu gharama za maisha.

Wanufaika hao wametoa pongezi hizo leo, Oktoba 17, 2026, wakati dunia ikiadhimisha Siku ya Kimataifa ya Kutokomeza Umasikini, wakieleza kuwa msaada wanaoupata kupitia TASAF umewawezesha kuanzisha shughuli za uzalishaji mali, kuweka akiba, kuanzisha biashara na kuboresha makazi pamoja na huduma za familia zao.

Wamesema kupitia vikundi vya ujasiriamali na mafunzo wanayopatiwa, wamejifunza kutengeneza bidhaa mbalimbali zikiwamo sabuni, vitambaa vya batiki, vikapu na mikeka, huku wengine wakijihusisha na ufugaji, uvuvi na shughuli za kilimo ambazo zimekuwa chanzo cha mapato na kuwawezesha kukabiliana na changamoto za kiuchumi.

Akizungumza kuhusu manufaa aliyoyapata, mnufaika wa TASAF Muyanja Mafuru amesema kabla ya kujiunga na mfuko huo aliishi katika mazingira magumu, akitumia nyumba iliyojengwa kwa miti kuanzia chini hadi juu na kuezekwa kwa nyasi, huku akihangaika kutafuta mahitaji muhimu ya familia yake.

“Baada ya kujiunga na TASAF, nilianza kupokea ruzuku na kushiriki katika miradi ya mfuko huo, ambako nilikuwa nikilipwa fedha. Nilianza kuweka akiba kidogo kidogo na baadaye tukapatiwa mafunzo ya kutengeneza sabuni za maji za kusafishia vyoo na mafuta ya mgando ya mche.

Amesema mafunzo ya ujasiriamali na uwezeshaji alioupata vimemsaidia kupanua shughuli zake za kujipatia kipato na kupunguza utegemezi, akisisitiza kuwa fursa hizo zimekuwa muhimu kwa familia yake katika kuboresha maisha na kuwekeza kwa ajili ya maendeleo ya baadaye.

Kwa upande wake, mnufaika wa TASAF kupitia kikundi cha Mliman City, Helena Kazungu, mkazi wa Kijiji cha Igenge, Kata ya Mbarika, amesema kikundi hicho kilianzishwa mwaka 2024 kwa kushirikiana na wataalamu wa ustawi wa jamii, kikiwa na wanawake 12 walioamua kuungana na kuanzisha shughuli za uzalishaji mali.

Amesema kila mwanachama alichangia Shilingi 50,000 na kupata mtaji wa awali wa kununua vitambaa, rangi na vifaa vingine vya kutengeneza batiki.

Kazungu amesema baada ya kupata mafunzo, wanawake hao walianza kutengeneza na kuuza vitambaa vya batiki kwa bei zinazotofautiana kulingana na aina ya bidhaa, huku wakitumia sehemu ya mapato kuendeleza mtaji, kuweka akiba na kukopeshana.

Ameongeza utaratibu huo umewasaidia kuendelea na biashara hata wanapokabiliwa na changamoto za soko, na baadhi yao wameweza kununua mifugo na kuwekeza katika mazao ya kilimo ili kuongeza kipato.

Ameeleza kuwa, manufaa ya TASAF yameonekana pia katika kuboresha makazi, ambapo baadhi ya wanachama wameweza kuvuta maji hadi nyumbani, kujenga vyoo bora na kuanza maandalizi ya ujenzi wa nyumba. 

Ameongeza kuwa mfuko huo umesaidia familia kugharamia mahitaji ya watoto wanaosoma sekondari na kuwawezesha wanawake na wazee kushiriki katika shughuli za kiuchumi.Ameoomba Serikali iendelee kuwawezesha wanufaika kwa kuwapatia mitaji zaidi, mafunzo na fursa za kukuza biashara zao.

Mnufaika mwingine wa TASAF, ambaye aliyesema ana watoto sita, ameeleza kuwa kabla ya kujiunga na mfuko huo mwaka 2024 alikuwa akikabiliwa na changamoto za kupata chakula na kugharamia elimu ya watoto wake. 

Amesema ruzuku aliyokuwa akipokea, pamoja na shughuli za ujasiriamali na miradi ya maendeleo, imemsaidia kuboresha maisha ya familia yake, huku watoto wake wakiendelea na masomo na baadhi wakifikia elimu ya sekondari.

Kwa ujumla, wanufaika hao wameitaka Serikali kuendeleza programu za TASAF kwa kuwa zimewapa fursa ya kujitegemea badala ya kutegemea misaada pekee.

Wamesema kuongezewa mitaji, kuimarishwa kwa mafunzo ya biashara na kupanuliwa kwa fursa za ajira katika miradi ya jamii kutawasaidia kuongeza uzalishaji, kuimarisha kipato na kuendelea kupunguza umaskini katika kaya zao.

Maadhimisho ya Siku ya Kimataifa ya Kutokomeza Umasikini, yanayofanyika Oktoba 17 kila mwaka, yanatoa nafasi ya kutathmini juhudi za kukabiliana na umaskini na kuhimiza ushiriki wa wananchi katika kujenga maisha bora. 

Read More →

SERIKALI KUTUMIA MILIONI 600 KUBORESHA HUDUMA ZA AFYA MAKAMBAKO - PROF. SHEMDOE

Na: OWM–TAMISEMI, Makambako

Waziri wa Nchi, Ofisi ya Waziri Mkuu - Tawala za Mikoa na Serikali za Mitaa (OWM-TAMISEMI), Mhe. Prof. Riziki Shemdoe, amesema Serikali itapeleka shilingi milioni 600 katika Halmashauri ya Mji wa Makambako kabla ya Desemba 2026 kwa ajili ya ujenzi wa Kituo cha Afya Kitandililo, hatua itakayosaidia kusogeza huduma bora za matibabu karibu na wananchi.

Prof. Shemdoe ameyasema hayo Oktoba 17, 2026, akiwa Makambako, baada ya kupewa fursa na Makamu wa Rais, Mhe. Deogratius Ndejembi, kueleza hatua zinazochukuliwa na OWM-TAMISEMI kuboresha huduma za afya ya msingi, katika mkutano wa hadhara uliofanyika wakati wa ziara ya Makamu wa Rais ya kukagua utekelezaji wa miradi ya maendeleo mkoani Njombe.

“Mhe. Makamu wa Rais, tumeshapata shilingi milioni 600 ambazo tutazileta hapa Makambako kwa ajili ya ujenzi wa Kituo cha Afya Kitandililo kabla ya Desemba, ili wananchi wapate huduma bora za matibabu kwa wakati,” amesisitiza Prof. Shemdoe.

Kuhusu ombi la Mbunge wa Makambako ambaye pia ni Waziri wa Kilimo, Mhe. Daniel Chongolo, la kujenga zahanati mbili, Prof. Shemdoe amesema ofisi yake inaendelea kulifanyia kazi kwa kutafuta fedha ili zitakapopatikana zitumike kujenga zahanati hizo na kusogeza huduma za afya karibu zaidi na wananchi.

Kwa upande wake, Makamu wa Rais, Mhe. Deogratius Ndejembi, amesema anatambua jitihada zilizofanywa na Naibu Waziri wa OWM-TAMISEMI anayeshughulikia Elimu, Mhe. Dkt. Festo Dugange, pamoja na Waziri wa Nchi, OWM-TAMISEMI, Mhe. Prof. Riziki Shemdoe, wakati akiwa Katibu Mkuu, katika kusimamia ujenzi wa Shule ya Mkoa ya Wasichana ya Sayansi ya Vipaji Maalumu iliyojengwa Wanging’ombe.

Ujenzi wa Kituo cha Afya Kitandililo ni sehemu ya jitihada za Serikali katika kuboresha huduma za afya na kuchangia utekelezaji wa Dira ya Maendeleo ya Taifa 2050 kwa kupunguza vifo vya mama na mtoto, gharama za matibabu na usafiri, huku ukiimarisha afya ya jamii, kuongeza tija na uzalishaji, na kujenga rasilimali watu yenye afya kwa maendeleo endelevu ya taifa.

Read More →

ONGEA NA KAMANDA: SACP JANETH MAGOMI ASISITIZA AMANI NA ULINZI WA MTOTO MWALUKWA

Kamanda wa Polisi Mkoa wa Shinyanga, Kamishna Msaidizi Mwandamizi wa Polisi (SACP) Janeth Magomi, ametoa elimu kwa wananchi wa Kata ya Mwalukwa, Halmashauri ya Wilaya ya Shinyanga, kuhusu umuhimu wa kudumisha amani, kusalimisha silaha haramu, kuchukua tahadhari dhidi ya mvua zinazotarajiwa kunyesha pamoja na kulinda haki na usalama wa watoto.

Elimu hiyo imetolewa kupitia kampeni ya Ongea na Kamanda, inayolenga kuimarisha mawasiliano kati ya Jeshi la Polisi na wananchi, kuwapa fursa ya kueleza changamoto zinazowakabili na kuongeza uelewa kuhusu masuala ya usalama katika jamii.

Akizungumza na wananchi hao, SACP Magomi amewahimiza kuendelea kudumisha amani na utulivu kwa kushirikiana na Jeshi la Polisi pamoja na viongozi wa serikali za mitaa na vijiji ili kuzuia vitendo vya uhalifu na kuhakikisha jamii inaendelea kuishi katika mazingira salama.

Aidha, amewataka wananchi wenye silaha haramu kuzisalimisha katika ofisi za serikali za vijiji au mitaa, ofisi za watendaji wa kata na vituo vya polisi, akisisitiza umuhimu wa kuondoa silaha hizo katika jamii ili kupunguza hatari zinazoweza kuhatarisha maisha na usalama wa watu.

Katika hatua nyingine, Kamanda Magomi ametoa wito kwa wananchi wanaoishi maeneo ya mabondeni kuhama na kutafuta maeneo salama kutokana na mvua zinazotarajiwa kunyesha katika siku zijazo, kwa mujibu wa tahadhari iliyotolewa na mamlaka ya hali ya hewa.

Amesisitiza kuwa wananchi wanapaswa kuzingatia tahadhari za mamlaka husika na kuchukua hatua mapema ili kujikinga na madhara yanayoweza kusababishwa na mvua, yakiwemo mafuriko na uharibifu wa mali.

Kuhusu ulinzi wa mtoto, SACP Magomi amewataka wazazi na walezi kuhakikisha watoto wanapata elimu bora na mazingira salama ya kujifunzia. Pia, amewahimiza wanafunzi waliohudhuria mkutano huo kusoma kwa bidii, kuzingatia masomo yao na kuepuka vishawishi vinavyoweza kuwafanya waache shule kabla ya kukamilisha masomo yao.

Kwa upande wao, wananchi wa Kata ya Mwalukwa wamepongeza hatua ya Jeshi la Polisi kuwafuata katika maeneo yao na kuwapa fursa ya kuwasilisha maoni na changamoto zinazowakabili.

Katika mkutano huo, wananchi waliwasilisha pia changamoto ya mgogoro wa ardhi. Hata hivyo, kwa kuwa suala hilo halikuwa changamoto ya moja kwa moja ya kiusalama, lilipokelewa kwa ajili ya kuwasilishwa kwa mamlaka husika ili liweze kufanyiwa kazi kwa mujibu wa taratibu zilizowekwa.

Kampeni ya Ongea na Kamanda ni jukwaa muhimu la mawasiliano kati ya Jeshi la Polisi na wananchi, linalowezesha wananchi kupata elimu ya usalama, kutoa maoni yao na kuwasilisha changamoto kwa lengo la kuimarisha ushirikiano katika kudumisha amani na utulivu katika jamii.

Read More →

MUHEZA YAWAKARIBISHA WAWEKEZAJI KILIMO NA VIWANDA

Na Mwandishi Wetu

HALMASHAURI ya Wilaya ya Muheza mkoani Tanga imewataka wawekezaji kutumia fursa zilizopo katika sekta ya kilimo kwa kuwekeza katika uzalishaji wa mazao ya kisasa na viwanda vya kuchakata bidhaa za kilimo ili kuongeza thamani na kipato cha wakulima.

Wito huo umetolewa kufuatia ushindi wa kitaifa uliotwaa na halmashauri hiyo katika Maonyesho ya Wiki ya Chakula na Lishe Duniani yaliyofanyika katika Viwanja vya Usagara, jijini Tanga, ambapo ilionesha uwezo wake katika uzalishaji wa mazao na mnyororo wa thamani kuanzia shambani hadi sokoni.

Mkurugenzi Mtendaji wa Halmashauri ya Wilaya ya Muheza, Naima Chondo, amesema ushindi huo umetokana na maandalizi mazuri na juhudi za kuwawezesha wakulima wadogo kushiriki maonyesho hayo, kujifunza teknolojia mpya za kilimo na kupata fursa ya kuonesha ubora wa mazao yao.

Amesema Muheza ina ardhi yenye rutuba inayofaa kwa uzalishaji wa mazao mbalimbali, hivyo kuifanya wilaya hiyo kuwa na fursa za uwekezaji katika kilimo na biashara. Ameongeza kuwa ushiriki wa wakulima katika maonyesho hayo umewapa nafasi ya kujifunza mbinu zinazoweza kuongeza tija na thamani ya bidhaa zao.

Kwa upande wake, Mkuu wa Wilaya ya Muheza, Ayubu Sebabili, amesema wilaya hiyo imetenga maeneo kwa ajili ya kilimo cha kisasa na ujenzi wa viwanda vya kuchakata mazao ili kuongeza thamani ya bidhaa na kupanua fursa za ajira na biashara.

Amezitaja baadhi ya fursa zilizopo kuwa ni kilimo cha mahindi, ndizi na mazao ya viungo kama karafuu, iliki na mdalasini, ambayo yanaweza kunufaisha wakulima na wafanyabiashara kupitia masoko ya ndani na nje ya nchi.

Sebabili amesema wilaya hiyo inapanga kufanya kongamano la wadau wa kilimo litakalowakutanisha wakulima, wafanyabiashara, taasisi za fedha na wawekezaji ili kuweka mikakati ya pamoja kuelekea msimu ujao wa kilimo.

Naye Mkuu wa Mkoa wa Tanga, Dkt. Batilda Buriani, amesema mkoa huo una fursa za kiuchumi zinazohusishwa na upanuzi wa Bandari ya Tanga, Bomba la Mafuta na uwekezaji katika kilimo na viwanda. Amewahimiza wawekezaji kutumia fursa hizo kuongeza uzalishaji wa chakula na kukuza uchumi.

Dkt. Buriani ametoa shukrani kwa Wizara ya Kilimo, Wizara ya Mifugo na Uvuvi, Shirika la Chakula Duniani (WFP) na wadau wengine walioshiriki maonyesho hayo yenye kaulimbiu isemayo “Ubunifu wa Leo, Lishe Bora ya Kesho, Kuelekea Dira 2050.”

Read More →

HATUJAZUIA BIASHARA HALALI BANDARI YA BAGAMOYO, TUMEZUIA BIASHARA ZA MAGENDO YAKIWEMO MAFUTA YA KULA - TRA

Mamlaka ya Mapato Tanzania (TRA) imesema haijazuia biashara halali kwenye Bandari ya Bagamoyo mkoani Pwani bali imezuia biashara za magendo yakiwemo mafuta ya kupikia ambayo yamekuwa yakiingizwa nchini bila kufuata utaratibu na kudhoofisha viwanda vya ndani. 

Kauli hiyo imetolewa na Meneja wa TRA Mkoa wa Pwani Bw. Peter Jackson Eliona kufuatia malalamiko yaliyowasilishwa na mmoja wa wananchi katika mkutano wa Waziri Mkuu wa Jamhuri ya Muungano wa Tanzania Mhe. Dkt. Mwigulu Nchemba juu ya kuzuiwa kwa biashara Bandari ya Bagamoyo ambapo amesema kuwa TRA haijazuia biashara bali imezuia magendo.

Amesema TRA kupitia Idara ya Forodha inalo jukumu la kuwezesha biashara halali, kusimamia ukusanyaji wa mapato ya Serikali, kulinda walaji na wafanyabiashara, pamoja na kuhakikisha kuwa mizigo yote inayoingia nchini kutoka nje inafuata taratibu na sheria za nchi.

Ameeleza kuwa kwa msingi huo, TRA haijazuia wafanyabiashara kuingiza mizigo yao kihalali kupitia Bandari ya Bagamoyo na wafanyabiashara wote wanaofuata njia halali wanakaribishwa sana. 

"Tunawakaribisha wafanyabiashara wote wanaotaka kutumia bandari hiyo kwa shughuli zao halali na tunawahakikishia kuwa tupo tayari kuwahudumia kwa kuzingatia taratibu na sheria zilizowekwa,

Hata hivyo, TRA inaendelea kuchukua hatua madhubuti za kupambana na magendo katika eneo la Bagamoyo, hususan magendo ya mafuta ya kula", amesema Bw. Eliona. 

Amebainisha kuwa hatua hizo zinalenga kulinda mapato ya Serikali, kuhakikisha ushindani wa haki kwa wafanyabiashara wanaofuata sheria, na kuwalinda walaji dhidi ya bidhaa zinazoingia nchini kinyume cha sheria.

"Napenda kutoa msisitizo kwa wote wanaojihusisha na biashara za magendo kuwa TRA itaendelea kutekeleza wajibu wake kwa umakini. Timu zetu zinafanya doria saa 24, zikiwemo doria za baharini kwa kutumia boti na doria za nchi kavu, kwa lengo la kudhibiti magendo na kuhakikisha kuwa biashara zinazofanyika katika eneo hili zinafuata sheria na taratibu husika", amesisitiza Meneja huyo.

Amesema TRA inawakaribisha wafanyabiashara wote wanaotaka kuingiza mizigo yao kwa kufuata sheria, na kuwa  ipo tayari kuwahudumia saa 24 kwa kuzingatia taratibu za Forodha bila usumbufu wowote. 

TRA inaunga mkono biashara halali na tunapinga magendo kwa nguvu zote ili tujenge uchumi imara wa nchi yetu.

Read More →

HAYA HAPA MAGAZETI YA LEO JUMAMOSI OKTOBA 17, 2026

Read More →