MASWAYETU BLOG

Monday, 26 October 2026

PROF. SHEMDOE AWAHIMIZA WANAKATAVI KUTUMIA MAONESHO KUJIFUNZA FURSA ZA KIUCHUMI

Unknown 09:51:00 NEWS No comments

• Azindua rasmi Maonesho ya Wiki ya Mwanakatavi

Na: OWM–TAMISEMI, Tanganyika – Katavi

Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amewataka wananchi wa Katavi kujitokeza kwa wingi katika maonesho ya Wiki ya Mwanakatavi ili kujifunza na kutumia fursa za kiuchumi katika sekta za kilimo, mifugo na uvuvi, viwanda na biashara, pamoja na mikopo ya asilimia 10 ya Halmashauri kwa ajili ya kujikwamua kiuchumi.

Prof. Shemdoe ametoa wito huo Oktoba 25, 2026, wakati akizindua rasmi maonesho hayo yanayofanyika kuanzia Oktoba 25 hadi 31, 2026, katika Viwanja vya Mizengo Pinda Kabungu, wilayani Tanganyika, mkoani Katavi.

“Wananchi wa Katavi, jitokezeni kwa wingi katika viwanja hivi ili kujifunza namna ya kutumia fursa za kiuchumi katika kilimo, mifugo na uvuvi, viwanda na biashara, pamoja na mikopo ya uwezeshaji wananchi kiuchumi, na kutumia elimu hiyo kuendesha shughuli zenu za uzalishaji na biashara,” ameeleza Prof. Shemdoe.

Akizungumzia uwezeshaji wananchi kiuchumi, Prof. Shemdoe amesema wananchi watapata fursa ya kujifunza kupitia ushuhuda wa kikundi cha wanawake kilichopata mkopo wa shilingi milioni 15 kupitia asilimia 10 ya Halmashauri ya Wilaya ya Tanganyika na kufanikiwa kuzalisha mafuta ya mawese na sabuni, hatua iliyowawezesha kupata kipato.

“Akina mama na vijana mliopo hapa, nendeni mkajifunze namna kikundi hicho kilivyoweza kurejesha mkopo na kupata faida iliyowawezesha kununua sare za shule na madaftari kwa watoto wao wanaonufaika na elimu bila ada, huku wengine wakimudu gharama za kuwasomesha watoto wao katika shule binafsi,” amesisitiza Prof. Shemdoe.

Ili kuhakikisha maonesho hayo yanaendelea kufanyika kila mwaka, Prof. Shemdoe ameelekeza Viwanja vya Mizengo Pinda Kabungu kuwa eneo rasmi la maonesho ya Wiki ya Mwanakatavi.

Naye Mkuu wa Mkoa wa Katavi, Mhe. Mwanamvua Mrindoko, amesema maadhimisho hayo yanalenga kuwaunganisha wananchi, wakulima, wafugaji, wachakataji, wazalishaji wa bidhaa mbalimbali, taasisi za umma na binafsi pamoja na taasisi za kifedha, ili kujifunza teknolojia mpya na za kisasa za uzalishaji na uchakataji, na kuunganishwa na masoko mbalimbali.

Maadhimisho ya Wiki ya Mwanakatavi yalianza mwaka 2022 kufuatia tamko la kimkakati la Rais wa Jamhuri ya Muungano wa Tanzania, Mhe. Dkt. Samia Suluhu Hassan, aliyeelekeza kila mkoa kufanya maonesho ya wiki baada ya Maonesho ya Nane Nane, kwa lengo la kutoa mrejesho kwa wananchi kuhusu mafunzo na uzoefu uliopatikana.

HAYA HAPA MAGAZETI YA LEO JUMATATU OKTOBA 26,2026

Unknown 04:51:00 NEWS No comments

Magazeti

MBUNGE AZZA ATEMBELEA ZAHANATI MPYA YA NSHISHINULU, ATATUA BAADHI YA CHANGAMOTO KWA VITENDO

Unknown 07:51:00 NEWS No comments

Na Marco Maduhu, SHINYANGA

Mbunge wa Jimbo la Itwangi, Azza Hillal Hamad, ametembelea Zahanati mpya ya Kijiji cha Nshishinulu katika jimbo hilo na kutatua baadhi ya changamoto ambazo bado zinazoikabili, ikiwamo kuahidi kutoa kompyuta mpya ya kisasa aina ya HP pamoja na mizani ya kupimia uzito wa watoto wanapokwenda kliniki.

TAZAMA VIDEO👇👇

Ziara ya mbunge huyo imefanyika leo, Oktoba 24, 2026, akiwa ameambatana na Diwani wa Nsalala, Joseph Shoto, kwa lengo la kukagua utoaji wa huduma za matibabu katika zahanati hiyo tangu ilipofunguliwa rasmi Oktoba 20 mwaka huu.

Azza amesema, baada ya kufika katika zahanati hiyo na kuzungumza na Mganga Mfawidhi, ameelezwa mapungufu yaliyopo ambayo yanahitaji kutatuliwa, ili kuboresha huduma kwa wananchi.

Amesema, mojawapo ya changamoto kubwa ambayo ameelezwa na nihitaji la haraka, ni ukosefu wa kompyuta kwa ajili ya kutunza kumbukumbu za wagonjwa na kuwaandikia namba za malipo (Control Number), na ameahidi kutoa kompyuta hiyo leo.

“Changamoto ya ukosefu wa kompyuta nitaitatua leo leo, kwa sababu ni muhimu sana, pia nitanunua mizani ya kupimia uzito wa watoto wanapokuja kliniki,” amesema Azza.

Amesema, kwa changamoto nyingine zilizobaki, amezichukua na atakwenda kuikumbusha serikali ili izitatue na kuboresha huduma za afya katika zahanati hiyo.

Aidha, amewahimiza pia wananchi wa kijiji hicho kujiunga na mfuko wa bima ya afya kwa wote (NHIF), kwa kuchangia sh. 150,000 kwa mwaka, ambapo watu sita katika familia moja watanufaika na huduma za matibabu, zikiwamo zinazotolewa katika hospitali za rufaa pamoja na bugando.

Awali, Mganga Mfawidhi wa zahanati hiyo, Dk. Aman Kubuka, akiwasilisha baadhi ya changamoto kwa mbunge huyo, amesema kituo hicho kinakabiliwa na ukosefu wa umeme, hali inayosababisha jokofu la kuhifadhia chanjo kushindwa kufanya kazi.

Ametaja changamoto nyingine, ni ukosefu wa kompyuta, ambapo huduma za matibabu kwa sasa zinahitaji matumizi ya mifumo ya kielektroniki, ikiwamo kutengeneza namba za malipo (Control Number) kwa wagonjwa sababu kwa sasa hakuna malipo ya mkononi.

Changamoto zingine, amesema ni upungufu wa samani na vifaa muhimu, vikiwamo meza, viti, benchi za wagonjwa, makabati na rafu za kuhifadhia dawa.

Nao baadhi ya wananchi wa Kijiji cha Nshishinulu, akiwamo Happynes Kaji, wamemshukuru Mbunge Azza kwa jitihada za kuwezesha zahanati hiyo kuanza kutoa huduma za matibabu, wakisema imewaondolea adha ya kusafiri umbali mrefu kufuata huduma katika kituo cha afya Tinde.

TAZAMA PICHA👇👇