PROFESA ALIYEKUWA ANAFANYA UTAFITI KUHUSU VIRUSI VYA CORONA AUAWA KWA KUPIGWA RISASI MAREKANI

Mauaji ya raia wa China, mtafiti wa masuala ya virusi vya corona kwenye ardhi ya Marekani yamesababisha nadharia mbalimbali duaniani kuwa kuna sababu iliyojificha kuhusu kifo chake.

Bing Liu, profesa msaidizi mwenye miaka 37 katika Chuo Kikuu cha Tiba cha Pittsburgh, Marekani alipatikana akiwa amekufa nyumbani kwake siku ya Jumamosi.

Wenzake walisema alikuwa karibu kupata "matokeo muhimu" ya tafiti kuhusu Covid-19, tukio lililosababisha kuwepo kwa maoni mitandaoni yanayoeleza kuwa yawezekana bwana Liu aliuawa lakini polisi wanasema ni tukio la kujiua.

Kwa nini Liu aliuawa?

Alikutwa akiwa na majeraha mengi ya risasi kichwani,shingoni katika eneo la Pittsburgh yalipo makazi yake kwa mujibu wa polisi wa eneo hilo.

Mtu aliyekuwa na silaha alitambulika kuwa na miaka 46, mhandisi wa programu ya kompyuta, Hao Gu. Mamlaka zinasema muuaji naye alijiua baada ya kurudi kwenye gari lake.

Liu na Gu walikuwa wanafahamiana, maafisa wapelelezi wa mauaji walieleza.

Uchunguzi umebaini kuwa lilikuwa tukio la kuua na kujiua lililotokana na ''mgogoro wa muda mrefu wa masuala ya kimapenzi''.

Wamesema ''hakuna ushahidi'' wa kuhusisha tukio hilo na utafiti wa Liu na mazingira ya sasa ya changamoto za kiafya.

Liu ni nani?

Katika taarifa yao , wenzake wamemwelezea kama mtafiti wa kipekee ambaye ''alikuwa ukingoni kufanikisha kupata matokeo muhimu '' ya kuelewa maambukizi ya Covid-19.

Waliomboleza kifo cha Liu na kuahidi kumalizia utafiti wake ''zikiwa ni juhudi za kuenzi ubora wake katika uwanja wa kisanyansi''.

Liu, raia wa China alipata shahada yake ya kwanza na shahada ya uzamivu katika masomo ya sayansi ya kompyuta nchini Singapore kabla ya kufanya utafiti nchini Marekani.

Aliwahi kuungana na wanabaiolojia wengine kufanya utafiti kuhusu kinga ya binaadamu, kwa mujibu wa wasifu wake mtandaoni.

Yanayozungumzwa mitandaoni.

''Mungu wangu'' mtumiaji mmoja wa mtandao wa kijamii wa Weibo aliandika. '' Labda alibaini kuwa virusi vilitengenezwa kwenye maabara nchini Marekani.''

Maoni kama hayo yalieleza kuwa Liu aliuawa kwa sababu pengine aligundua chanzo cha virusi vya corona.

Maafisa wa China na vyombo vya habari vya habari vya serikali vilisema kuwa madai yakuwa virusi vilitengenezwa Marekani na kupelekwa Wuhan na wanajeshi wa Marekani hayana msingi.

Wengine walisema ni tukio ambalo lina sababu iliyojificha.

''Inawezekana kuwa kuna siri iliyojificha gizani''. Alieleza mtu mmoja kwenye mtandao huo.

Maoni mengi ya watu kwenye mtandao huo yanasema kuwa historia ya Liu inaweza kuwa ndio iliyomuweka hatarini nchini Marekani, ingawa hakuna ushahidi ulioibuka kuwa Liu alikuwa akilengwa kwa sababu ya asili yake.

Gazeti ka Global Times linalofungamana na chombo cha habari cha taifa nchini china, lilichapisha makala kuhusu mazingira ya kifo cha Liu.

Kwenye mtandao wa Twitter, baadhi wameeleza hisia zao kuwa huenda serikali ya China ina mkono wake kwenye tukio hilo.

Kutokana na janga la Covid-19, nadharia mbalimbali kuhusu virusi na asili yake zimeendelea kusambaa kwenye mitandao ya kijamii.

Nyingine zikiwa na madai yasiyothibitishwa zimekuwa zikiungwa mkono na wanasiasa na vyombo vya habari vya China na Marekani.

CHANZO - BBC SWAHILI

Read More →

WAGONJWA WA CORONA ZANZIBAR WAFIKA 134

Read More →

Picha : WATOA HUDUMA ZA AFYA KAHAMA WAPEWA ELIMU YA CORONA..MGANGA MKUU ATAKA WAGONJWA WAPEWE HUDUMA STAHIKI

Mganga Mkuu wa Mkoa wa Shinyanga Dkt. Yudas Ndungile akifungua Mafunzo juu ya ugonjwa wa Corona kwa watoa huduma za afya kutoka katika vituo vya afya halmashauri ya wilaya ya Ushetu,Kahama Mji na Msalala yaliyofadhiliwa na Shirika la LifeWater International.

Na Kadama Malunde – Malunde 1 blog 

Mganga Mkuu wa Mkoa wa Shinyanga Dkt. Yudas Ndungile amewashauri watumishi wa sekta ya afya kutumia taaluma zao vizuri kuwa na ujasiri na moyo wa kulitumikia taifa katika kipindi hiki cha Janga la Corona huku akisisitiza kuwa siyo kila mgonjwa mwenye dalili za Corona na ana Corona hivyo asinyimwe haki ya kutibiwa magonjwa mengine. 

Dkt. Ndungile ameyasema hayo leo Alhamis Mei 7,2020 wakati akifungua Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' yaliyofadhiliwa na Shirika la LifeWater International linalojihusisha na masuala ya Upatikanaji wa Maji Safi na Salama,Afya na Usafi wa Mazingira. 

Alisema katika janga hili la Corona matumaini ya Watanzania yapo kwa watumishi wa sekta ya afya hivyo msingi mkubwa ni kutoa matibabu sahihi kwa mgonjwa bila kujali rangi,kabila ,dini ,uwezo wake ama mahali anapotoka ili kuzuia vifo visivyokuwa vya lazima. 

“Sisi watumishi wa afya ni sawa na pale inapotokea vita matumaini ya wananchi yanakuwa kwa askari. Kwenye janga hili la Corona sisi ndiyo kimbilio. Tunatakiwa kuwa na ujasiri na moyo wa kulitumikia taifa letu. Hatutarajii mtu amekuja kwenye kimbilio halafu na wewe unamkimbia au unamnyima huduma stahiki au unamtenga au unamnyanyapaa kwa sababu umehisi ana Corona”,alisema Dkt. Ndungile. 

Aliwataka wataalamu wa afya kutumia taaluma yao vizuri ili kuokoa maisha ya Watanzania huku akiwataka kuondoa hofu,wasiwasi na mashaka akisisitiza kuwa kitendo cha mtu kuwa na dalili za Corona kisimnyime haki ya kutibiwa magonjwa mengine. 

“Kuna wagonjwa wengine watakuja na magonjwa mengine tofauti na Corona. Historia ya mgonjwa ichukuliwe kwa mujibu wa taratibu za kitabibu,huenda mtu ana homa,anakohoa, ana kifua Kikuu,Maleria, shinikizo la damu,tatizo la moyo,Kisukari, Aleji, Pumu, HIV nk. Kwa hiyo lazima tutambue kuwa mgonjwa atatibiwa kwa ujumla wake na siyo tu kuangalia kipengele cha Corona”,alieleza Dkt. Ndungile. 

“Niwaombe sana wataalamu tusiwanyanyapae wagonjwa maana unaweza kuzuka mtindo..Hivi wewe umetokea wapi? Dar wiki mbili zilizopita..Aaah! kaa huko kwenye hicho chumba! Na pengine anaweza tu akawa na hofu kuwa ana Corona…Yaani wewe hujachukua hata historia ya mgonjwa,hata vipimo tayari wewe unamtenga,halafu humpi huduma yoyote akisubiri mpaka vipimo vya Corona”,alisema Dkt. Ndungile. 

“Kuna mwingine unakuta ana pumu, mwingine matatizo tu ya presha,hajatumia dawa,presha imepanda na presha ikiwa juu sana mtu anaweza kubanwa na kifua,mbavu na wakati mwingine vichomi, Sasa wewe ukisikia tu mbavu zinauma unasema hii ni Corona halafu unamfungia hapo unasubiri hadi DMO akupe maelekezo matokeo yake mtu anapoteza maisha”,aliongeza Dkt. Ndungile. 

Mganga huyo wa Mkoa alisema mafunzo hayo ni mwendelezo wa mafunzo juu ya Corona kwa watoa huduma za afya mkoani Shinyanga ili wawe na uelewa mzuri kuhusu namna ya kutambua na kubaini mgonjwa wa Corona,kutoa matibabu sahihi kwa wagonjwa,namna ya kuzuia maambukizi yasienee na kujilinda wasipate maambukizi.

"Ninalishukuru Shirika la LifeWater International kwa kuwezesha mafunzo haya ya Corona kwa watoa huduma za afya mkoani Shinyanga.Tayari tumetoa mafunzo kama haya katika halmashauri ya Shinyanga,Manispaa ya Shinyanga na Kishapu na kwa upande wa Halmashauri ya Wilaya ya Kahama Mji, Msalala na Ushetu mafunzo yanafanyika leo na kesho",alisema Dkt. Ndungile. 

Kwa upande wake, Meneja wa Shirika la LifeWater International Mkoa wa Shinyanga, Benety Malima alisema wameamua kushirikiana na serikali kutoa mafunzo ya COVID -19 kwa watoa hudumza a afya kwa sababu wapo mstari wa mbele katika mapambano dhidi ya COVID- 19. 

“Tumeona nyinyi ni watu muhimu sana ambao mnatakiwa kupata mafunzo haya na mkayafanyie kazi kwa kujilinda nyinyi wenyewe na kusaidia wale mnaowahudumia. Bila wataalamu wa afya pengine tunaweza kuwa na tatizo kubwa sana la COVID -19”,alisema Malima. 

“Nyinyi ndiyo mnakutana na wagonjwa,nyinyi ndiyo mnakutana na washukiwa kwa hiyo msipokuwa na uelewa mpana kuhusu COVID 19,msipotoa huduma kwa kuwajali na kujijali nyinyi wenyewe inaweza kuwa tatizo jingine”,aliongeza Malima.

ANGALIA PICHA HAPA CHINI

Mganga Mkuu wa Mkoa wa Shinyanga Dkt. Yudas Ndungile akizungumza wakati akifungua Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' yaliyofadhiliwa na Shirika la LifeWater International linalojihusisha na masuala ya Upatikanaji wa Maji Safi na Salama,Afya na Usafi wa Mazingira leo Alhamis Mei 7,2020 kwenye Ukumbi wa Kahama College of Health Sciences mjini Kahama. Kulia ni Meneja wa Shirika la LifeWater International Mkoa wa Shinyanga,Benety Malima,kushoto ni Afisa Afya Mkoa wa Shinyanga, Neema Simba Picha zote na Kadama Malunde - Malunde 1 blog

Mganga Mkuu wa Mkoa wa Shinyanga Dkt. Yudas Ndungile akiwasisitiza wataalamu wa afya kutumia taaluma yao vizuri ili kuokoa maisha ya Watanzania huku akiwataka kuondoa hofu,wasiwasi na mashaka akisisitiza kuwa kitendo cha mtu kuwa na dalili za Corona kisimnyime haki ya kutibiwa magonjwa mengine.

Watoa huduma za afya kutoka kwenye vituo vya afya wilayani Kahama wakimsikiliza Mganga Mkuu wa Mkoa wa Shinyanga Dkt. Yudas Ndungile ambaye alisema katika janga la Corona matumaini ya Watanzania yapo kwa watumishi wa sekta ya afya hivyo msingi mkubwa ni kutoa matibabu sahihi kwa mgonjwa bila kujali rangi,kabila ,dini ,uwezo wake ama mahali anapotoka ili kuzuia vifo visivyokuwa vya lazima.

Meneja wa Shirika la LifeWater International Mkoa wa Shinyanga,Benety Malima akizungumza wakati wa Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' ambapo alisema wameamua kushirikiana na serikali kutoa mafunzo ya COVID 19 kwa watoa hudumza a afya kwa sababu wapo mstari wa mbele katika mapambano dhidi ya COVID 19.

Meneja wa Shirika la LifeWater International Mkoa wa Shinyanga, Benety Malima akizungumza wakati wa Mafunzo juu ya ugonjwa wa Corona kwa watoa huduma za afya wilayani Kahama "..alisema “Tumeona nyinyi ni watu muhimu sana ambao mnatakiwa kupata mafunzo haya na mkayafanyie kazi kwa kujilinda nyinyi wenyewe na kusaidia wale mnaowahudumia. Bila wataalamu wa afya pengine tunaweza kuwa na tatizo kubwa sana la COVID 19”

Meneja wa Shirika la LifeWater International Mkoa wa Shinyanga,Benety Malima akizungumza wakati wa Mafunzo juu ya ugonjwa wa Corona kwa watoa huduma za afya wilayani Kahama 

Watoa huduma za afya katika vituo vya afya wilayani Kahama wakiwa ukumbini.

Afisa Afya Mkoa wa Shinyanga, Neema Simba akizungumza wakati wa Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' yaliyofadhiliwa na Shirika la LifeWater International linalojihusisha na masuala ya Upatikanaji wa Maji Safi na Salama,Afya na Usafi wa Mazingira.

Mratibu wa Huduma za Afya mkoa wa Shinyanga, Dkt. Daniel Mzee akitoa mada wakati wa Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' yaliyofadhiliwa na Shirika la LifeWater International linalojihusisha na masuala ya Upatikanaji wa Maji Safi na Salama,Afya na Usafi wa Mazingira.

Watoa huduma za afya katika vituo vya afya wilayani Kahama wakiwa ukumbini.

Afisa Afya ofisi ya Mkuu wa Mkoa wa Shinyanga, Musa Makungu akijibu swali la mshiriki wa mafunzo hayo.

Dkt. Geofrey Mboye akitoa mada wakati wa Mafunzo juu ya ugonjwa wa Corona kwa watoa huduma za afya 43 kutoka katika vituo vya afya vya serikali na watu binafsi wilayani Kahama 'halmashauri ya wilaya ya Ushetu,Kahama Mji na Msalala' yaliyofadhiliwa na Shirika la LifeWater International linalojihusisha na masuala ya Upatikanaji wa Maji Safi na Salama,Afya na Usafi wa Mazingira.

Watoa huduma za afya katika vituo vya afya wilayani Kahama wakiwa ukumbini.

Watoa huduma za afya katika vituo vya afya wilayani Kahama wakiwa ukumbini.

Picha zote na Kadama Malunde - Malunde 1 blog

Read More →

Picha : MBUNGE AZZA HILAL ATOA MSAADA WA KOMPYUTA OFISI YA UWT SHINYANGA NA FEDHA OFISI YA CCM KITANGILI

Mbunge wa viti maalum mkoani Shinyanga Azza Hilal Hamad (kushoto), akikabidhi Computer kwa Mwenyekiti wa UWT wilaya ya Shinyanga Mjini Shambuo Katambi, kwa ajili ya matumizi ya ofisi. 

 Na Marco Maduhu - Malunde 1 blog
Mbunge wa viti maalum mkoa wa Shinyanga Azza Hilal Hamad, ametoa msaada wa seti moja ya Kompyuta kwa Umoja wa Wanawake wa Chama Cha Mapinduzi CCM (UWT) Wilaya ya Shinyanga, pamoja na fedha taslimu shilingi 180,000/= kwa ajili ya kununua mifuko 10 ya saruji ili kusukuma ujenzi wa ofisi ya CCM Kitangili.

Zoezi la kukabidhi Kompyuta na fedha hizo za kununua saruji limefanyika leo, Mei 7, 2020 katika ofisi za CCM wilaya ya Shinyanga Mjini, na kushuhudiwa na wajumbe wa chama hicho akiwamo na mkuu wa wilaya ya Shinyanga Mhe. Jasinta Mboneko, ambaye ndiye aliomba msaada wa Kompyuta hiyo.

Akizungumza wakati wa kukabidhi Kompyuta hiyo na fedha taslimu kwa ajili ya ununuzi wa saruji mifuko 10 ili kusukuma ujenzi wa ofisi ya CCM Kitangili, Mhe. amesema yeye ni mbunge wa mkoa mzima, hivyo ana jukumu la kuhudumia wananchi wote wa mkoa wa Shinyanga pamoja na chama chake kwa ujumla.

Amesema baada ya kuambiwa na mkuu wa wilaya ya Shinyanga Jasinta Mboneko, kuwa Kompyuta ya UWT Wilaya ya Shinyanga ni Mbovu, akaguswa na kuamua kutoa msaada huo ili kazi za Chama zisiweze kulala sababu ya ubovu wa kifaa hicho na kutoa huduma kwa wananchi.

“Nimeamua kutoa msaada wa Computer kwenye ofisi hii ya UWT wilaya ya Shinyanga, na mimi UWT ndiyo wamenilea hadi nikapata ubunge, na baada ya kuambiwa na DC kuwa Computer yao ni mbovu ikabidi niitafute haraka, na leo hii naikabidhi rasmi ili iweze kufanya kazi za chama,” amesema Mhe. Azza.

“Computer hii ina thamani ya Shilingi Milioni 2, ambapo pia natimiza na ahadi yangu ya kutoa mifuko 10 ya saruji ili kusukuma ujenzi wa ofisi ya CCM Kitangili, ambapo natoa pesa Taslimu Shilingi 180,000 ,” ameongeza.

Aidha amesema ameshachangia pia vifaa tiba katika kituo cha afya cha Kambarage mjini Shinyanga, ambapo ametoa vitanda vitatu kwa ajili ya wazazi pamoja na mashuka 30.

Naye Mwenyekiti wa UWT Wilaya ya Shinyanga Shambuo Katambi, amempongeza Mbunge huyo kwa kutoa msaada wa Computer ambao utasaidia kusaidia kazi za chama kusonga mbele, huku akimuomba aendelee na moyo huo huo wa kujitoa kusaidia jamii pamoja na chama.

Kwa upande wake mkuu wa wilaya ya Shinyanga Mhe. Jasinta Mboneko, amempongeza mbunge huyo kwa kuitikia ombi lake na kutoa msaada huo wa Computer, pamoja na kuwabeba kidedea wanawake kwenye nafasi za uongozi kwa kuchapa kazi kwa bidii.

Pia Mboneko ametumia nafasi hiyo kuwataka wananchi wa Shinyanga, kuendelea kuchukua tahadhari ya kujikinga na maambukizi ya virusi vya Corona, pamoja na kuacha kufukiza watoto wadogo na kuwazuia wasizurure hovyo mitaani.



TAZAMA PICHA HAPA CHINI

Mbunge wa viti maalum mkoani Shinyanga Azza Hilal Hamad (kushoto), akikabidhi Computer kwa Mwenyekiti wa UWT wilaya ya Shinyanga Mjini Shambuo Katambi, kwa ajili ya matumizi ya ofisi. Picha zote na Marco Maduhu- Malunde 1 blog.

Mbunge wa viti maalum mkoani Shinyanga Azza Hilal Hamad (kushoto), akikabidhi Computer kwa Mwenyekiti wa UWT wilaya yaShinyanga Mjini Shambuo Katambi, kwa ajili ya matumizi ya ofisi.

Mbunge wa viti maalum mkoani Shinyanga Mhe. Azza Hilal Hamad (kushoto) akimkabidhi fedha taslimu Shilingi 180,000 katibu wa CCM wilaya ya Shinyanga Mjini Agnes Gregrory kwa ajili ya ununuzi wa mifuo 10 ya saruji ambayo itasukuma ujenzi wa ofisi ya CCM Kitangili.

Mbunge wa viti maalum mkoa wa Shinyanga Mhe. Azza Hilal Hamad akizungumza mara baada ya kukabidhi Computer na fedha Taslimu Shilingi 180,000 ahadi yake ya ununuaji wa mifuko 10 ya saruji.

Katibu wa UWT Mkoa wa Shinyanga Mjini  Hadija Magoma Hassani, akimshukuru mbunge Azza kwa msaada huo alioutoa.

Mwenyekiti wa umoja wa UWT Wilaya ya Shinyanga Mjini Shambuo Katambi akishukuru kwa msaada huo kutoka kwa Mbunge Azza.

Katibu wa CCM Wilaya ya Shinyanga Mjini Agnes Gregory akishukuru kwa msaada ambao ameutoa mbunge Azza.

Mkuu wa wilaya ya Shinyanga Mhe. Jasinta Mboneko, akimshukuru Mbunge Azza, kwa moyo wake wa kujitoa kusaidia jamii na chama katika nyanja mbalimbali zikiwamo huma za afya na elimu.

Picha zote na Marco Maduhu- Malunde 1 blog.

Read More →

Vifo Vya Corona Kuchunguzwa

Na WAMJW – Mwanza

Vituo vya kutolea huduma za afya nchini vyatakiwa kufanya uchunguzi juu ya kifo chochote kitakachotokana na ugonjwa wa corona ili kubaini kama mgonjwa alihudumiwa ipasavyo kabla ya kifo kutokea.

 

Agizo hilo limetolewa na Mganga Mkuu wa Serikali Prof. Abel Makubi akiwa Jijini Mwanza mara baada ya kuagana na uongozi wa Hospitali ya Rufaa ya Kanda ya Ziwa – Bugando alipokuwa akifanya kazi awali kama Mkurugenzi Mtendaji kabla ya kuteuliwa na Rais wa Jamhuri ya Muungano wa Tanzania Mhe. Dkt. John Pombe Magufuli kuwa Mganga Mkuu wa Serikali.

 

“Kwakweli tusingependa kuona mgonjwa anafariki kwa sababu zisizo na msingi, naagiza hospitali zote zenye kamati ya uchunguzi (Clinical Audit) kufanya uchunguzi wa vifo vinavyohusiana au kutokana na corona ili kuona kama kulikuwa na tatizo lolote katika kumpokea mgonjwa au katika kumhudumia” alisema Prof. Makubi

 

Prof. Makubi amewataka wananchi kuelewa kuwa sio kila kifo kinachotokea hivi sasa kinasababishwa na ugonjwa wa corona kwa kuwa yapo magonjwa mengine pia ambayo yanatushamblia binadamu. 

 

“Siyo kweli kwamba mgonjwa akiwa na presha, kisukari, figo au kansa akifariki iwe imesababishwa na corona, tuendelee kuwahudumia wananchi, kuepusha vifo vinavyoweza kuwa na uhusiano wa corona”. Alisema Prof. Makubi.

 

Aidha, Prof. Makubi ametoa rai kwa vituo vya afya kuwapokea wagonjwa wote na kuwapatia matibabu bila kuwabagua kuwa na dalili za corona.

 

“Serikali inapenda kuona wagonjwa wa corona wanapokelewa nakupata matibabu, tuendelee kuwapokea na kuwahudumia huku tukichukua tahadhari ya maambukizi”. Alisema Prof. Makubi.

 

“Watumishi wa afya wasiwe na ubaguzi wa kuchagua wagonjwa wa kuwahudumia au mpaka apimwe kipimo cha covid-19 ndio ahudumiwe, tuwapokee wote lakini wakati huo tukichukua tahadhari zote za kujikinga na ugonjwa”.  Alisisitiza Prof. Makubi.

 

Katika hatua nyingine Prof. Makubi amesema kuwa Serikali inaendelae kusambaza vifaa kinga kwa ajili ya kuwawezesha watoa huduma kujikinga na ugonjwa huo wakati wakitoa huduma.

 

“Serikali imeanza kugawa vifaa kinga kama vile PPE, masks pia sanitizer kwa ajili ya vituo vyote vya afya Tanzania, kwahiyo pasiwepo kisingizio chochote cha kushindwa kumhudumia mgonjwa wa corona kwa sababu ya vifaa kinga”

Read More →

Wenye Virusi Vya Corona Nchini Kenya Wafika 607...Ni Baada ya Wengine 25 Kuongezeka Leo

Kenya imethibitisha maambukizi mapya 25 ya virusi vya Corona, hii ni baada ya watu  632 kupimwa katika muda wa saa 24 zilizopita  na kufanya jumla ya wealioambukizwa kufikia  607 .

Wagonjwa hao ni wakenya 22,raia mmoja wa Tanzania,mmoja wa Uganda na mmoja wa China.

Naibu waziri wa afya Dkt Rashid Aman ametoa wito kwa wakazi wa Mtaa wa Eastleigh kufuata kanuni zilizotangazwa na wizara ya afya kusalia nyumbani baada ya idadi kubwa ya watu kudaiwa kuhamia mitaa mingine.

Aidha idadi ya waliofariki kutokana na virusi vya Corona imeongezeka na kufikia 29 baada ya watu watatu zaidi kufariki.

 

Idadi ya waliopona imefikia 197 baada ya watu 7 zaidi kupona.

Read More →

Dkt. Ndugulile: Endeleeni kutibu watu wenye magonjwa mengine na si wa Covid -19 tu

Na John Stephen, WAMJW – Dar es Salaam

Wizara ya Afya, Maendeleo ya Jamii, Jinsia, Wazee na Watoto imewataka wataalamu wa afya kuendelea kutibu watu wenye magonjwa mengine kama vile matatizo ya moyo na figo katika kipindi hiki cha ugonjwa wa Covid-19.

Hayo yamesemwa na Naibu Waziri wa Afya, Dkt. Faustine Ndugulile baada ya kuitembelea Taasisi ya Moyo Jakaya Kikwete (JKCI) na kuwaona wagonjwa waliofanyiwa upasuaji wa kupandikiza mishipa kwa wagonjwa wenye matatizo ya moyo.

Dkt. Ndugulile amesema pamoja na kuwapo kwa maambukizi ya ugonjwa wa Corona, watu wenye matatizo ya moyo, kupumua, figo, kisukari pamoja na matatizo mengine wanapaswa kupatiwa matibabu.

“Tunaweza tukawa tunapambana na Corona, tukawapoteza wagonjwa wengi kwa sababu tu hatujaweza kuwapatia huduma ya matibabu ya kisukari, figo, presha au moyo, hivyo nitoe rai kwa wahudumu wa afya wahakikishe wanaendelea kuwatibu watu wenye magonjwa haya pamoja na magonjwa mengine,” amesema Dkt. Ndugulile.

Katika hatua nyingine, Dkt. Ndugulile amewapongeza wataalamu wa JKCI kwa kufanya upasuaji wa kupandikiza mishipa kwenye moyo kwa wagonjwa waliokuwa na matatizo ya moyo.

 “Sisi kama Wizara ya Afya, tunapata faraja sana, mambo kama haya ni mazuri na lazima tuseme kwa hiyo hii operesheni mliofanya ni kubwa na nje ya nchi ingetugharimu shilingi milioni 80 hadi 90 kwa mtu mmoja, lakini hapa tumefanya kwa shilingi milioni 29 kwa kutumia wataalamu wetu na wagonjwa wetu wanaendelea vizuri,” amesema Dkt. Ndugulile. 

Amesema awali wataalamu kutoka nje ya nchi walikuwa wanakuja kufanya upasuaji kama huo, lakini sasa Watanzania wazalendo wanafanya baada ya kutoa mishipa kwenye paja na kwenye kifua cha mgonjwa husika.

“Leo nimekuja kuona kazi kubwa iliyofanywa na wataalamu wazalendo wa JKCI ya upasuaji wa kupandikiza mishipa kwenye moyo ili uweze kufanya kazi kwa wagonjwa waliokuwa wakikabiliwa na matatizo ya moyo,” amesema Dkt. Ndugulile.

Naye Mkurugenzi wa Upasuaji wa JKCI, Dkt. Angella Muhozya amesema kuwa wagonjwa wote waliofanyiwa upasuaji na wataalamu wazalendo wanaendelea vizuri na kwamba wataruhusiwa muda wowote kuanzia sasa.

Mmoja wa wagonjwa aliyefanyiwa upasuaji wa moyo, Bw. Hamid Nassoro amesema baada ya kufanyiwa upasuaji hivi sasa anaweza kuzungumza vizuri tofauti na awali alikuwa hawezi kuzungumza na kwamba tayari ameshaanza mazoezi.

Read More →

Tanzia: Mkuu wa Wilaya ya Nyang'wale Mkoani Geita, Hamim Buzohera Gwiyama afariki dunia

Mkuu wa Wilaya ya Nyang'wale Mkoa wa Geita,  Hamim Buzohera Gwiyama, amefariki leo Mei 7, 2020 Saa 5:00 Asubuhi katika Hospitali ya Rufaa Bugando baada ya kuugua kwa muda mfupi.

Taarifa ya msiba huo imetolewa na Waziri wa Nchi - TAMISEMI Selemani Jafo.

Marehemu Hamim Buzohera Gwiyama aliteuliwa na Rais John Magufuli Juni 26, 2016 kuwa mkuu wa Wilaya ya Nyang'wale.

Aidha Waziri wa Nchi - TAMISEMI Selemani Jafo ametoa pole wa familia na ndugu na kueleza taarifa zaidi kuhusu mazishi zitatolewa na Ofisi ya Mkuu wa mkoa wa Geita.

Read More →

Naibu Waziri Wa Afya Afya Dr Ndugulile aagiza NIMR kufanya utafiti kuhusu Corona

Wizara ya Afya, Maendeleo ya Jamii, Jinsia, Wazee na Watoto imeitaka Taasisi ya Taifa ya Utafiti wa Magonjwa ya Binadamu (NIMR) kufanya utafiti kuhusu ugonjwa wa Corona (Covid-19) kwa kuwa kuna tofauti kubwa ya dalili zilizojitokeza kwa wagonjwa hapa nchini ukilinganisha na wagonjwa waliopo nje ya  nchi.

Agizo hilo limetolewa na Naibu Waziri wa Afya, Maendeleo ya Jamii, Jinsia, Wazee na Watoto, Dkt. Faustine Ndugulile wakati alipokutana na watafiti wa taasisi hiyo wakati  wakijadili maambukizi ya ugonjwa wa Corona na aina ya matibabu ambayo wagonjwa wanatakiwa kupatiwa hasa baada ya kubainika kuwa dalili za ugonjwa huo zinatofautiana na dalili za wagonjwa wa mataifa mengine.

Pia, amesema kupitia utafiti huo wanataka kujua aina za matibabu ambayo wagonjwa wanatakiwa kupatiwa ili kuhakikisha ugonjwa wa Covid-19 unadhibitiwa hapa nchini.

Naye Mkurugenzi Mkuu  wa NIMR, Prof. Yunus Mgaya amesema mapambano dhidi ya ugonjwa Covid-19  ni vita ambayo inapaswa kufanyiwa utafiti ambao utasaidia kupatikana kwa njia sahihi za kukabiliana na maambukizi ya ugponjwa huo.

Read More →

EWURA yatakiwa kudhibiti changamoto zinazoikabili Sekta ya Maji.

Read More →

AWESO AITKA EWURA KUTOWABAMBIKIA WANANCHI ANKARA KIHOLELA

Naibu Waziri wa Maji, Juma Aweso wakati akizungumza leo jijini Dodoma na Menejimenti ya Mamlaka ya Udhibiti wa Huduma za Nishati na Maji (EWURA) kuhusu malalamiko ya wateja wa maji nchini kuhusu Ankara za Maji

Naibu Waziri wa Maji.Juma Aweso wakati akisisitiza jambo wakati akizungumza na Menejimenti ya Mamlaka ya Udhibiti wa Huduma za Nishati na Maji (EWURA) kuhusu malalamiko ya wateja wa maji nchini kuhusu Ankara za Maji

Kaimu Mkurugenzi Mkuu EWURA,akizungumza wakati Naibu Waziri wa Maji,Juma Aweso alipokutana na Menejimenti ya Mamlaka ya Udhibiti wa Huduma za Nishati na Maji (EWURA) kuhusu malalamiko ya wateja wa maji nchini kuhusu Ankara za Maji

Mkurugenzi wa Udhibiti Uchumi Bw.Nzinyangwa Mchany akitoa maelezo kwa Naibu Waziri wa maji, Juma Aweso (hayupo pichani) alipokutana na Menejimenti ya Mamlaka ya Udhibiti wa Huduma za Nishati na Maji (EWURA) kuhusu malalamiko ya wateja wa maji nchini kuhusu Ankara za Maji

.....................................................................................

Na. Mwandishi Wetu, Dodoma

Mamlaka ya Udhibiti wa Huduma za Nishati na Maji (EWURA) imetakiwa kuhakikisha inadhibiti bei za Ankara maji nchini zinazopandishwa kiholela na kubambikiwa Ankara kwa wananchi zinazofanywa na mamlaka za maji nchini bila kupata kibali kutoka EWURA na kutoa elimu kwa wananchi.

Kauli hiyo imetolewa leo jijini Dodoma na Naibu Waziri wa maji,Juma Aweso wakati akizungumza na Menejimenti ya EWURA kuhusu malalamiko ya wateja wa maji nchini kuhusu Ankara za Maji.

Aweso ameitaka EWURA kuwarejeshea huduma za maji wateja wote nchini waliokatiwa maji kwa makubaliano ili waweze kupata huduma hiyo katika kipindi hiki cha kupambana dhidi ya ugonjwa wa Homa ya mapafu inayosababishwa na Virusi vya Corona(COVID 19).

"Taifa liko katika mapambano na vita dhidi ya Corona, ugonjwa unaua kama yanavyouwa magonjwa mengine kikubwa ni kuchukua tahadhari na kuzingatia maelekezo yanayotolewa na wataalam, silaha pekee ya kukabiliana nayo ni maji tiririka na sabuni, sasa tunaagiza warejesheeni wananchi maji, mliowakatia kwa kuweka utaratibu mzuri wa kulipa madeni yao,"Am.Aweso

Aidha Mhe.Aweso amesema licha ya Mambo mazuri na kazi kubwa inayofanywa na EWURA ila bado kuna matatizo na changamoto ambazo zinahitaji kupatiwa ufumbuzi wa kina ili kutoa huduma Bora kwa wananchi na hasa masikini.

"Mnafanya kazi nzuri lakini nataka nisiwapake mafuta maana haitawasaidia nawaeleza ukweli kuna malalamiko makubwa, Hali inayosababishwa ninyi muonekane kama taasisi ya kutoa tunzo na kushindwa kushughulikia na kero hizo,"Amesema Naibu Waziri Aweso

Aidha amebainisha kuwa, zipo mamlaka ambazo ni vinara kwa kuwabambikia na kuwapandishia wananchi bei za maji kiholela, akiwataka EWURA kuhakikisha wanafikisha ripoti ya mamlaka za aina hiyo wizarani ili ziweze kuchukuliwa hatua stahiki maana wizara ndio yenye kauli ya mwisho.

Pia Aweso amesema kuwa changamoto kubwa ni elimu, EWURA hawajafanya kazi ya kutoa elimu kwa watumiaji wa maji, juu ya wajibu na haki yao pia kwa mtoa huduma Jambo ambalo litazaidia kuondoa malalamiko tofauti na hivi sasa ambapo wananchi wanapata haki ya kutumiwa Ankara kwa njia ya simu bila ushirikishwaji.

Kwa upande wake, Kaimu Mkurugenzi wa Maji na Usafi wa Mazingira, Titus Safari, amesema kuwa EWURA, imefanikiwa kutoa jumla ya leseni 119 katika kipindi cha Juni 2019.

Safari amesema kuwa EWURA imekuwa ikifanya ukaguzi kwa mamalaka za maji nchini zisizopungua 50, na kutoa maelekezo ya kuboresha na kuongeza ufanisi katika kutoa huduma Bora kwa wananchi.

Read More →

CCM UBUNGO YAMPONGEZA DC MAKORI KWA UTENDAJI

 Mkuu wa Wilaya ya Ubungo, Kisare Makori, (kushoto) akiwasilisha taarifa yake mbele ya Kamati ya Siasa Wilaya ya Ubungo, katikati ni Mwenyekiti wa CCM wa Wilaya  ya Ubungo, Lucas Mgonja pamoja na Katibu wa wilaya hiyo, Chifu Silvester Yaredi

Wajumbe wa Kamati ya Siasa Wilaya ya Ubungo, wakijadili taarifa ya utendaji ya Mkuu wa Wilaya

Na MWANDISHI WETU-DAR ES SALAAM

 

KAMATI ya Siasa ya Halmashauri Kuu ya CCM Wilaya ya Ubungo, chini ya mwenyekiti wake Lucas Mgonja, imempongeza Mkuu wa Wilaya ya Ubungo, Kisare Makori kwa utendaji wake ikiwamo vita dhidi ya ugonjwa wa corona wilayani humo.

Taarifa ilitolewa leo na Katibu wa Siasa ya Uenezi, Wilaya ya Ubungo, Mbaruku Masudi, imeeleza kuwa katika kikao hicho pamoja na mambo kilipokea taarifa ya Mkuu wa Wilaya ya Ubungo, Kisare Makori  ikiwamo hali ya ugonjwa wa corona, ujenzi wa vyumba vya madarasa na matundu ya vyoo kwa shule za msingi na sekondari wilayani Ubungo.

“Jana tarehe 6/05/2020  Kamati ya Siasa ya Halmashauri Kuu ya CCM Wilaya ya Ubungo ilikuwa na kikao chake cha kwanza cha kawaida kwa mwaka 2020.

“Katika Kikao hicho pamoja na mambo mengine kilipokea taarifa kutoka kwa Kamisaa wa chama Mkuu wa Wilaya Kisare Makori ikiwamo taarifa ya hali ya ugonjwa wa corona katika wilaya yetu (Ubungo) na jitihada zinazofanyika.

“Ujenzi wa vyumba vya madarasa, ofisi za walimu, matundu ya vyoo na ununuzi wa viti, meza na madawati. Pia kikao kilijadili hali ya uharibifu wa miundombinu ya barabara nahatua zilizochukuliwa hasa katika kipindi hicho cha mvua,” amesema Mbaruku

Katibu huyo Mwenezi wa Wilaya ya Ubungo, amesema kuwa pamoja na hali hiyo pia walipokea taarifa ya kutoka kwa DC Makori kuhusu kupatikana kwa eneo la ujenzi wa mahakama ya wilaya, polisi, Zimamoto na Uokoaji pamoja na ujenzi wa ofisi ya Katibu Tarafa Kibamba eneo lenye ukubwa wa takribani ekari 11.9.

“Pia Kamati ya Siasa ya Wilaya chini ya Mwenyekiti Mgonja ilipokea taarifa kuhusu suala la bei elekezi ya sukari na hatua zilizochukuliwa,” amesema

Kutokana na hali hiyo amesema kuwa CCM Wilaya ya Ubungo, kimeipongeza Serikali ngazi ya wilaya na kuishauri kuongeza jitihada katika kutoa elimu kuhusu kingi dhidi ya ugonjwa wa corona ikiwamo kujilinda na janga hilo.

Pamoja na hali hiyo Mwenyekiti wa CCM Wilaya ya Ubungo, Lucas Mgonja, alitoa wito kwa wana CCM kuendelea kushirikiana na Serikali katika kipindi hiki ili kuhakikisha maelekezo yote muhimu yanatolewa yanazingatiwa.

Read More →

Trump atumia veto kuukataa muswada wa Kongresi uliompunguzia mamlaka ya kuanzisha vita dhidi ya Iran

Rais Donald Trump wa Marekani ametumia mamlaka yake ya veto kuukataa muswada uliopitishwa na Kongresi, ambao umetaka mamlaka aliyopewa ya kuchukua hatua ya kijeshi dhidi ya Iran yapunguzwe.

Kufuatia hatua hiyo ya Trump, muswada huo sasa unahitaji theluthi mbili za kura za uungaji mkono za bunge hilo la Marekani ili uweze kuwa sheria moja kwa moja bila kuhitaji kusainiwa na rais wa nchi hiyo.

Tarehe 14 ya mwezi uliopita wa Aprili, Spika wa Baraza la Wawakilishi la Marekani, Nancy Pelosi alisaini azimio la kupunguza mamlaka ya rais wa nchi hiyo ya kuanzisha vita dhidi ya Iran ambalo lilipitishwa na baraza hilo mwezi Machi.

Vitisho vya kuanzisha vita dhidi ya Iran ambavyo Rais wa Marekani Donald Trump alivitoa baada ya mauaji ya Kamanda wa Jeshi la Iran,  Qassem Soleimani na watu alioandamana nao yaliyofanywa na jeshi  la Marekani, vilizidi kulitia wasiwasi bunge la nchi hiyo na kuwafanya wabunge wa chama cha Democrat wachukue hatua ili kupunguza mamlaka ya Trump yanayohusiana na kuanzisha vita dhidi ya Iran.

-Parstoday

Read More →

Trump Aendelea Kuishambulia China Kuhusu Virusi Vya Cona......Waliofariki Kwa Virusi Hivyo Marekani Wafika 74,809

Kwa mara nyingine rais wa Marekani Donald Trump ameishambulia China kwa jinsi ilivyoshughulikia mlipuko wa virusi vya corona huku akisema janga hilo limekuwa na madhara makubwa kwa Marekani.

Rais Trump amewaambia waandishi habari mjini Washington kuwa ugonjwa wa COVID-19 umeiathrii Marekani  kwa kiwango kikubwa kuliko mashambulizi ya mabomu dhidi ya kambi ya kijeshi ya Pearl Harbor ya mwaka 1941 au tukio la kigaidi la Septemba 11.

Hayo ni moja ya matukio makubwa kabisa na yaliyosababisha athari pana katika historia ya Marekani.

Mashambulizi ya Japan kwenye kambi ya Pearl Harbor iliyokuwepo Hawaii  yaliilazimisha Marekani kuingia katika vita kuu ya pili ya dunia huku mkasa wa Septemba 11 uliwauwa wamarekani zaidi ya 3,000 na kuisukuma Washington kuanzisha operesheni dhidi ya ugaidi nchini Iraq, Afghanistan na kwingineno.

Trump ameilaumu China akisema virusi vya corona visingesababisha athari kubwa iwapo Beijing ingefanikiwa kuvidhibiti kikamilifu vilipozuka mwishoni mwa mwaka uliopita.

Huo ni mfululizo wa lawama za Marekani kwa China kuhusu virusi vya corona na katika siku za karibuni rais Trump na viongozi wake waandamizi wamesema wana ushahidi kuwa virusi vya corona vilizuka kutoka maabara moja mjini Wuhan nchini China.

Madai hayo yamepingwa vikali na China na wanasayansi bado wanaamini virusi hivyo vialinzia kwa wanyama kabla ya kuingia kwa binadamu hususan kupitia soko la nyamapori la mjini Wuhan.

Hadi sasa zaidi ya watu 74,809 wamekufa nchini Marekani kutokana na ugonjwa wa COVID-19 na mkuu wa zamani wa taasisi ya kuzuia magonjwa nchini humo amebashiri idadi ya vifo inaweza kufikia 100,000 mwishoni mwa mwezi Mei.

Read More →

Mafuriko Yaua Watu 194 Nchini Kenya

Mvua kubwa zilizonyesha nchini Kenya zimeua  watu 194, kwa mujibu wa maafisa wakinukuliwa na vyombo vya habari nchini humo. 

Kwa mujibu wa  gazeti la kila siku la Daily Nation, watu 194 wamefariki dunia kote nchini kutokana na mvua kubwa zinazonyesha na kusababisha mafuriko.

Mamlaka nchini Kenya imewataka watu wanaoishi katika maeneo yanayokumbwa na mafuriko, kama vile kando ya mito, kuondoka haraka maeneo hayo.

Gazeti la Daily Nation limemnukuu  Waziri wa Mambo ya Ndani, Dk Fred Matiangi akisema kwamba viongozi wako tayari kuwatoa  "kwa nguvu" watu walio katika hatari .

"Hatuna chaguo jingine. Tutahamisha watu kwa nguvu, hata ikiwa tutawasafirisha wenyewe kwa malori, tutafanya hivyo," afisa mmoja ameliambia Gazeti la kila siku la Standard Digital.

Kwa wale ambao hawajui wapi pa kwenda, mamlaka imetenga shule zilizofungwa kwa sababu ya marufuku ya watu kutotembea kutokana na janga la Corona. Shule hizi zitatumiwa kama hifadhi kwa muda kwa familia zilizohamishwa.

Mamlaka pia inasema serikali itatoa msaada wa chakula, maji na fedha kupitia simu kwa familia zilizohamishwa.

Read More →

Spika Ndugai Aigomea Barua Ya CHADEMA ya kutomtambua Cecili Mwambe kama Mbunge

Spika Job Ndugai  jana alisoma barua ya Katibu wa Chadema, John Mnyika, iliyotaka bunge kutomtambua Cecili Mwambe kama Mbunge na kumlipa stahiki zake.

“Barua yenyewe ni fupi ngoja niwasomee, anasema Ceceli Mwambe, alikuwa mbunge wa jimbo la Ndanda aliyedhaminiwa na Chadema na Februari mwaka huu alitangaza kupitia vyombo vya habari amehama chama hicho,”alisema na kuongeza:

“Kwa mujibu wa ibara ya 7(f) ya Katiba amekoma kuwa mbunge na ameacha kiti chake katika bunge, kwahiyo bunge lisiendelee kumpatia stahiki zozote.”

Spika alisema anamshangaa Mnyika kwa kuwa maneno anayosema alipaswa aambatanishe na barua ya Mwambe inayothibitisha anayosema Mnyika na hajafanya hivyo.

“Pili sina barua ya Mwambe kusema kaacha ubunge kwa hiyari yake mwenyewe, na kama ni chama hiki kimechukua hatua sina viambatanisho vinavyoonyesha vikao halali vilivyofanya maamuzi haya, kwahiyo hii barua haina maana, haina mantiki,”alisema.

“Nawaambia wabunge wote ikiwamo wa Chadema mnaotishwatishwa huko kuwa mnaye Spika imara atawalinda mwanzo mwisho, habari ya ukandamizaji na ubabaishaji hauna nafasi, fanyeni kazi zenu kwa kujiamini, mmeaminiwa na wananchi,”amesisitiza

Read More →

Spika Ndugai Awataka CHADEMA Wajiandae Kulipa gharama za kesi iliyofunguliwa na Tundu Lissu

Spika wa Bunge ,Job Ndugai amekitaka Chama cha Demokrasia na Maendeleo(Chadema) kujiandaa kulipa gharama za kesi iliyofunguliwa na Makamu Mwenyekiti wa chama hicho,Tundu Lissu.

Spika Ndugai amesema amepewa nakala ya hukumu kutoka Mahakama Kuu iliyotupilia mbali rufaa yake namba 42 ya mwaka 2019 iliyowashitaki yeye (Spika ) na Mwanasheria Mkuu wa Serikali kuhusu ubunge wa Singida Mashariki.

“Nimepata nakala ya hukumu Spika na Mwanasheria Mkuu wa Serikali walikuwa wameshitakiwa na bwana Tundu Lissu katika shauri la Mahakama Kuu namba 42 la mwaka 2019 ya kwamba Mahakama imetupilia mbali madai hayo tena kwa gharama kwa hio wajiandae kulipa ” amesema Spika Ndugai

Lissu alifungua kesi hiyo akipinga kuvuliwa ubunge wake wa Singida Mashariki ambalo kwa sasa linaongozwa na Miraji Mtaturu kutoka Chama cha Mapinduzi.

Read More →