Friday, 10 November 2023
Thursday, 9 November 2023
BODI YA TASAC YAUNGA MKONO NA KUPONGEZA JITIHADA ZA TPA KUJENGA BANDARI YA KUHUDUMIA MZIGO MCHAFU KISIWA CHA MGAO
BODI ya Wakurugenzi ya Shirika la Wakala wa Meli Tanzania (TASAC) limeunga mkono na kupongeza jitihada za Mamlaka ya Bandari nchini (TPA) kujenga Bandari ya kuhudumua mizigo Mchafu eneo la Kisiwa -Mgao.
Ujenzi huo unatarajiwa kufanyika katika kisiwa hicho kilichopo katika Halmashauri ya wilaya ya Mtwara Mkoani Mtwara ikiwa ni mkakati wa kusogeza huduma karibu na wananchi.
Hayo yameelezwa na Mwenyekiti wa Bodi hiyo Capt. Mussa Mandia akiwa katika ziara hiyo ya kukagua shughuli mbalimbali zinazofanywa na TASAC chini ya usimamizi wa Bodi hiyo.
Wednesday, 8 November 2023
REA YATENGA BILIONI 10 KUSAMBAZA MITUNGI YA GESI VIJIJINI
Mkurugenzi Mkuu wa Wakala wa Nishati Vijijini (REA), Mhandisi Hassan Saidy (kulia), akiwasilisha Taarifa ya Utendaji Kazi wa Wakala hiyo kwa Naibu Waziri wa Nishati, Judith Kapinga (katikati), Novemba 7, 2023. Naibu Waziri alitembelea Makao Makuu ya REA jijini Dodoma na kuzungumza na Menejimenti ikiwa ni mara yake ya kwanza tangu ateuliwe kushika wadhifa huo. Kushoto ni Naibu Katibu Mkuu wa Wizara ya Nishati, Athumani Mbuttuka.
*********************
Na Veronica Simba – REA
Wakala wa Nishati Vijijini (REA), katika Mwaka huu wa Fedha (2023/24), umetenga shilingi bilioni 10 kwa ajili ya kusambaza mitungi ya gesi ya LPG, majiko na vifaa vyake katika maeneo ya vijijini kwa njia ya ruzuku.
Mkurugenzi Mkuu wa REA, Mhandisi Hassan Saidy ameyasema hayo wakati akiwasilisha Taarifa ya Wakala kwa Naibu Waziri wa Nishati, Judith Kapinga, Novemba 7, 2023.
Alisema kuwa, kiasi cha mitungi kati ya 200,000 hadi 500,000 inatarajiwa kusambazwa katika maeneo ya vijijini kutegemea kiwango cha ruzuku kitakachotolewa.
Akielezea Mradi wa usambazaji gesi ya kupikia kwa ujumla, Mhandisi Saidy alisema unategemewa kusambaza mitungi ya gesi 70,020 ambapo hadi kufikia Agosti 15 mwaka huu, mitungi 23,806 (sawa na asilimia 34) ilikuwa imeshasambazwa kwa wananchi mbalimbali kupitia kwa Wabunge ambao ni wawakilishi wao.
“Lengo la Serikali kupitia REA katika utekelezaji wa Mradi huo ni kuhamasisha matumizi ya nishati safi na salama ya kupikia katika maeneo yao,” alifafanua.
Aidha, Mkurugenzi Mkuu alieleza kuwa, katika hatua nyingine, REA inatekeleza Mradi wa usambazaji gesi asilia kwa ajili ya kupikia katika mikoa ya Lindi na Pwani kupitia Shirika la Maendeleo ya Petroli Tanzania (TPDC), ambapo alisema Mkataba umesainiwa na maombi ya fedha za awali, yapo Wizara ya Fedha kwa ajili ya uhakiki.
“Mkataba huu una jumla ya shilingi bilioni 6.8 ambapo unatarajiwa kuunganisha wananchi 980 na nishati ya kupikia katika maeneo ya Mnazi Mmoja mkoani Lindi na Mkuranga mkoani Pwani.”
Alisema kuwa, katika Mwaka huu wa Fedha (2023/24), REA imetenga shilingi bilioni 18.5 kwa ajili ya kuiwezesha TPDC kujenga miundombinu ya kusambaza gesi asilia katika maeneo yaliyopo pembezoni mwa Mkuza wa Bomba Kuu la kusafirisha gesi asilia linalopita katika mikoa ya Mtwara, Lindi na Pwani ili wananchi wanaoishi kwenye maeneo hayo waweze kutumia gesi asilia kwa ajili ya kupikia.
Mkurugenzi Mkuu pia alieleza kuhusu Mradi wa ufungaji mifumo ya kupikia katika taasisi zinazohudumia watu zaidi ya 300 ambapo alisema Wakala unalenga kujenga mifumo hiyo kwa Taasisi 100.
Akifafanua, alisema kuwa Mradi huo ni sehemu ya utekelezaji wa maelekezo ya Rais Samia Suluhu Hassan aliyoyatoa wakati akifungua Kongamano la Nishati ya Kupikia jijini Dar es Salaam, Novemba 2022.
Kuhusu usambazaji wa majiko banifu, alieleza kuwa kupitia ruzuku ya Dola za Marekani milioni sita iliyotolewa na Benki ya Dunia, Serikali kupitia REA inatarajia kusambaza majiko banifu 70,000 yaliyotengenezwa kwa teknolojia yenye ubunifu wa kupunguza matumizi ya kuni na mkaa pamoja na kupunguza uharibifu wa mazingira.
Naibu Waziri Kapinga alitembelea Makao Makuu REA jijini Dodoma na kuzungumza na Menejimenti yake ikiwa ni mara ya kwanza tangu ateuliwe kushika wadhifa huo.
Naibu Waziri wa Nishati ambaye pia ni Mbunge anayewakilisha Vijana Mbinga, Judith Kapinga akiwasha jiko la gesi muda mfupi kabla ya kugawa majiko hayo kwa umoja wa vijana wa Chama Cha Mapinduzi Mkoa wa Ruvuma hivi karibuni. Mheshimiwa Kapinga aligawa majiko hayo ikiwa ni sehemu ya Mpango Maalumu wa Serikali kupitia Wakala wa Nishati Vijijini (REA) kuwawezesha wananchi wa vijijini kupitia Wabunge wao, kutumia nishati safi ya kupikia.
Baadhi ya wafanyakazi wanawake wa Wakala wa Nishati Vijijini (REA), wakiwa katika picha ya pamoja. Wanawake hawa wamejiwekea utaratibu wa kuchanga fedha na kununua majiko na mitungi ya gesi ambapo hugawa katika maeneo mbalimbali kwa ajili ya kuwawezesha wanawake waishio vijijini kutumia nishati safi ya kupikia.
Mitungi yenye majiko ya gesi ikiwa imeandaliwa tayari kwa kugawiwa kwa umoja wa vijana wa Chama Cha Mapinduzi mkoani Ruvuma hivi karibuni ikiwa ni Mpango maalumu wa uwezeshaji wanawake waishio vijijini kutumia nishati safi ya kupikia. Uwezeshaji huu kwa njia ya ruzuku unatolewa na Serikali kupitia Wakala wa Nishati Vijijini (REA).
WAFANYABIASHARA MKURANGA,KIBITI WAMSIFU SAMIA UHURU WA BIASHARA
Na Mwandishi Wetu, Mkuranga
WAFANYABISHARA wilayani Mkuranga na Kibiti, wamempongeza Rais Samia Suluhu Hassan kwa kutuliza dhorobu ya hali ya biashara nchini.
Wamesema kwenye wilaya hizo biashara zinafanyika kwa amani na utulivu bila usumbufu tofauti na miaka ya nyuma.
Wametoa pongezi hizo kwa nyakati tofauti kwenye mkutano kati ya wafanyabishara wa wilaya hizo na viongozi wa Jumuiya ya Wafanyabiashara (JWT) inayoendelea mkoani Pwani yenye lengo la kusikiliza na kutatua kero za wafanyabishara.
Mfanyabiashara Hassan Mbwana Kambangwa, amesema wafanyabiashara kwa asilimia kubwa wilayani humo wananufaidika sana tangu kuingia kwa utawala wa Rais Samia.
Amesema "Kimsingi namshuruku Rais Samia kwa kutuletea ugeni uliotupa fursa ya kuzungumza changamoto zinazotukabili, lakini sisi tangu kuingia kwa utawala huu wa Mama Samia tunafaidika nao kwa asilimia kubwa."
Mfanyabiasha huyo ametolea mfano wa mambo wanayofaidika nayo kuwa ni mikopo, uhusiano mazuri na halmashauri lakini pia taasisi mbalimbali za kifedha ziko huru kuwasaidia wafanyabiashara.
Amesema serikali imezingatia suala la amani na utulivu na kwa mikoa mingi ilikua inapata changamoto nyingi lakini hapa wilaya ya Mkuranga wafanyabiashara wako huru na wanafanyabiashara bila bugudha.
"Tunamshukuru sana Rais Samia Suluhu Hassan tunafanyabiashara kwa amani lakini pia tunashukuru ujio huu wa leo umefanya tuweza kufunguka yale ambayo yako ndani ya moyo na tunaamini mtayafikisha," Kambangwa.
Naye mfanyabishara Wilaya ya Kibiti, Salim Juma, amempongeza Rais Samia kwa kuona sekta ya wafanyabishara ni sehemu ya uchumi wa Taifa na kuamua kuungana kwa pamoja kutatua kero zao.
"Ili kuwa na ustawi tumefanikiwa kumpa Rais Samia, ambaye ameona umuhimu wetu na kutambua mchango wetu ndio maana leo viongozi mpo hapa," amesema Juma.
.jpeg)
.jpeg)
DKT. SEMAKAFU : VITI MAALUM VIONDOLEWE, TOZO ZA SIMU ZITUMIKE KULIPIA BIMA ZA WATOTO
Mratibu wa Taasisi ya Uringo Dkt. Ave - Maria Semakafu akitoa mada kuhusu Madai ya Mabadiliko kwenye Katiba na Mtandao wa Wanawake na Katiba leo Jumatano Novemba 8,2023 wakati wa Warsha ya Ujenzi wa Harakati katika kuhamasisha uongozi kwa wanawake, kukuza sauti zao na Ushiriki katika siasa na nafasi za uongozi kwenye Tamasha la 15 la Jinsia na Miaka 30 ya Mtandao wa Jinsia Tanzania (TGNP) linalofanyika katika viwanja vya TGNP Mabibo jijini Dar es salaam. Picha na Kadama Malunde - Malunde 1 blog
Mratibu wa Taasisi ya Uringo Dkt. Ave - Maria Semakafu akitoa mada kuhusu Madai ya Mabadiliko kwenye Katiba na Mtandao wa Wanawake na Katiba
Mratibu wa Taasisi ya Uringo Dkt. Ave - Maria Semakafu akitoa mada kuhusu Madai ya Mabadiliko kwenye Katiba na Mtandao wa Wanawake na Katiba
Na Kadama Malunde – Malunde 1 blog
Imeelezwa kuwa kuendeleza mfumo wa Viti Maalum kwa wanawake unaathiri wanawake kwani umejaa ubaguzi na udhalilishaji wa Kijinsia hivyo unapaswa kubadilishwa au kuondolewa kabisa.
Hayo yamesemwa leo Jumatano Novemba 8,2023 na Mratibu wa Taasisi ya Uringo Dkt. Ave - Maria Semakafu wakati akitoa mada kuhusu Madai ya Mabadiliko kwenye Katiba , Mtandao wa Wanawake na Katiba wakati wa Warsha ya Ujenzi wa Harakati katika kuhamasisha uongozi kwa wanawake, kukuza sauti zao na Ushiriki katika siasa na nafasi za uongozi kwenye Tamasha la 15 la Jinsia na Miaka 30 ya Mtandao wa Jinsia Tanzania (TGNP) linalofanyika katika viwanja vya TGNP Mabibo jijini Dar es salaam.
“Tunahitaji usawa 50 kwa 50,tunataka wanawake wengi wajitokeze kushika nafasi za uongozi na ngazi za maamuzi. Kwa upande wa ushiriki wa wanawake kwenye siasa, waleteni wanawake tuje tuwapigie kura badala ya kuchaguliwa na chama cha siasa",amesema Dkt. Semakafu.
Amesema Mtandao wa Wanawake na Katiba haukubali kwamba mfumo wa viti maalum uliopo sasa uendelee kutumika kama njia ya kupata uzoefu na kisha kupisha wanawake wengine wenye nia ya kuongeza uzoefu na ujuzi wa masuala ya siasa.
“Kwetu sisi Wanamtandao wa Wanawake, Katiba, Uongozi na Uchaguzi, tunaona pendekezo la kuendeleza Viti Maalum ambavyo sisi kama wadau tunaoathirika na mfumo huu uliopo ambao tunaona umejaa ubaguzi na udhalilishaji wa Kijinsia, tunashauri ubadilishwe au kuondolewa kabisa”,amesema Dkt. Semakafu.
Ameeleza kuwa kuendeleza mfumo wa Viti Maalum wa sasa ni kuijengea jamii imani kwamba wanawake bado hawana uwezo, uzoefu wala ujuzi wa masuala ya siasa kwamba hao walioko kwenye uwanda wa siasa tayari wanahitaji takriban miaka kumi ya kujenga uwezo huo ili kuwapisha wengine wanaowania kuingia kwenye uwanda wa siasa.
Aidha ameshauri wanawake washiriki kwenye mchakato wa katiba mpya “Tusikubali Mchakato wa Katiba Mpya uendelee bila ya ajenda ya mwanamke”.
“Bima ya Watoto imeondolewa tupo kimya, tunatakiwa tujadili, tujishirikishe. Watoto waliokuwa wanatibiwa kwa shilingi 50400/= hivi sasa hawapati huduma za matibabu kutokana na masharti mapya ya Bima za Afya. Hili suala la bima linatugusa sisi wanawake, sisi ni wauguzaji wa watoto, waume zetu.Tunaomba Tozo za simu zitumike kulipia bima za watoto na wazee wa TASAF, lakini pia tunataka kuona mtanzania yeyote ananufaika na rasilimali za nchi”,ameongeza Dkt. Semakafu.
TUELEKEZE JUHUDI ZETU KWENYE AFYA NA MALEZI YA WATOTO NJITI - BITEKO
Naibu Waziri Mkuu na Waziri wa Nishati Mhe. Dkt. Dotto Biteko ameitaka Jamii, Wadau na Serikali kwa ujumla kuelekeza nguvu na juhudi katika kuwasaidia watoto wanaozaliwa kabla ya Wakati.
Ameyasema hayo jana kwenye Hotuba iliyosomwa na Waziri wa Maendeleo ya Jamii, Jinsia, Wanawake na Makundi Maalumu Dkt. Dorothy Gwajima kwenye Hafla ya Kusherekehea Mafanikio ya Ajenda ya Mtoto Njiti 2021 iliyowashirikisha Mawaziri, wabunge, Wawakilishi wa Asasi zisizo za Kiserikali na Wawakilishi wa Taasisi za Taifa za Afya, Elimu, Kazi, Maendeleo ya Jamii na Sheria kutoka taasisi mbalimbali Novemba 07, 2023 Jijini Dodoma.
"Dunia inatualika sote tuelekeze juhudi zetu kwenye afya na malezi ya watoto njiti. Tunaalikwa kusikiliza kwa huruma vilio vya mamilioni ya akina mama na akina baba wanaolazimika kurudi kazini ilihali wakiwa na watoto njiti. Tunaishukuru sana Doris Mollel Foundation kwa kuchukua jukumu la kutatua changamoto hii katika kupigania maisha ya watoto njiti.
Kwa niaba ya Serikali, napenda kutoa shukrani zangu za dhati kwa Doris Mollel Foundation, ambayo kimsingi inafanya kazi ya kunuru maisha ya watoto njiti kwa kama kufanya hivi leo, ambapo tunaalikwa kwa mara nyingine kuangalia namna bora tunayoweza kutatua changamoto ya Maisha ya watoto njiti nchini Tanzania. Juhudi zenu, hazithaminiwi ndani tu, bali hata nje kwa vile sasa tunaishi kwenye zama za utandawazi." Dkt. Dotto Biteko, Naibu Waziri Mkuu na Waziri wa Nishati.
