MASHIRIKA YA VIWANGO EAC YAJIDHATITI KWENYE MASUALA YA BIDHAA NA VIPIMO

MASHIRIKA ya viwango vya ubora wa bidhaa kutoka nchi za Jumuiya ya Afrika Mashariki (EAC), yamejipanga kuhakikisha masuala ya bidhaa na vipimo yanakuwa sawa, husasan upimaji na magari yanayosafirisha mafuta.

Wakizungumza na waandishi wa habari jijini Arusha wakati wa mkutano wa 25 wa kujadili masuala ya viwango kwa nchi wanachama wa EAC, Mkurugenzi Udhibiti Ubora Shirika la Viwango Tanzania (TBS), Lazaro Msasalaga, anasema mkutano huo wa siku tatu umejumuisha wakurugenzi wa viwango kutoka nchi za EAC ni muhimu kwa ajili ya kujadili masuala yahusuyo ubora wa bidhaa.

Anasema mashirika hayo yanakutana kupitia kamati za kitaalam katika masuala ya udhibiti ubora  ikiwemo kupitisha viwango 69 za bidhaa za chakula na vipodozi, ikiwemo viwango vitatu vinavyotoa maelekezo ya taarifa zinawekwa katika vifungashio vya bidhaa kama matumizi ya bidhaa husika na jinsi ya kuhifadhi.

“Hiki ni kikao muhimu na nchi ya Tanzania tutanufaika katika ubora wa viwango ikiwemo uwekaji wa maneno yanayoelezea bidhaa wanazotumia walaji zitaboresha vitu gani, ikiwemo viambata vya kilishe sanjari na ujumla wa kuweka maelezo ya aina mbalimbali katika bidhaa,” amesema.

Mkurugenzi wa Shirika la Ukaguzji wa Ubora wa Bidhaa  kutoka nchini Kenya (KEBS),  Bernard Njiraini, alisema mashirika hayo yanajadiliana viwango walivyokubaliana kwa pamoja,  ili waweze kufanya biashara  kirahisi ndani ya nchi wanachama wakati wa kupitisha bidhaa mipakani.

Meneja Upimaji Wakala wa Vipimo Tanzania, Magesa Biyani, anasisitiza masuala ya vipimo ni eneo muhimu kuhakikisha bidhaa na vipimo vinakua sahihi katika ufanyaji biashara kwa nchi za EAC hususan masuala ya upimaji katika magari yanayosafirisha mafuta, ambapo awali upimaji ulitofautina baina ya nchi na nchi, lakini pia wanatarajia kuanzisha kanuni itayoondoa vikwazo kwa wafanyabishara wanaosafirisha mafuta kwa nchi za EAC, ikiwemo usahihi wa vipimo vya bidhaa zilizofungashwa.

Read More →

DKT. CECILIA KUTOKA TAASISI YA NELSON MANDELA ABUNI DAWA YA ASILI YA KUSINDIKA NGOZI

Mhadhiri kutoka Taasisi ya Afrika ya Sayansi na Teknolojia ya Nelson Mandela Dkt. Cecilia China (Kulia) akionyesha dawa ya asili ya kusindika ngozi ambayo inasaidia kuondoa matumizi na utegemezi wa kemikali kutoka nje kwa wananchi waliotembelea banda la taasisi hiyo wakati wa Maonesho ya Wiki ya Ubunifu katika Uwanja wa Jamhuri Jijini Dodoma.

Afisa Usimamizi wa Tafiti kutoka Taasisi ya Afrika ya Sayansi na Tekinolojia ya Nelson Mandela Bw, Okuli Andrea akieleza jambo kwa mwananchi aliyetembelea banda la taasisi hiyo wakati wa Maonesho ya Wiki ya Ubunifu katika Uwanja wa Jamhuri Jijini Dodoma.

Baadhi ya Bidhaa zilizotengenezwa dawa ya asili ya kusindika ngozi ambayo inasaidia kuondoa matumizi na utegemezi wa kemikali kutoka nje iliyobuniwa na Mhadhiri kutoka Taasisi ya Afrika ya Sayansi na Teknolojia ya Nelson Mandela Dkt. Cecilia China.

Na Mwandishi Wetu-DODOMA

Mhadhiri kutoka Taasisi ya Afrika ya Sayansi na Teknolojia ya Nelson Mandela Dkt. Cecilia China amebuni dawa ya asili ya kusindika ngozi ambayo itasaidia kuondoa matumizi na utegemezi wa kemikali kutoka nje.

Dkt. Cecilia alisema hayo wakati wa Maonesho ya Wiki ya Ubunifu yaliyofanyika Jijini Dodoma katika Uwanja wa Jamhuri yaliyoanza Aprili 24 hadi aprili 28,2023 ,ambapo alieleza kuwa ubunifu wa dawa hiyo ambayo imetengenezwa kwa kutumia mitishamba itasaidia kutatua tatizo la upatikanaji wa kemikali za kusindika ngozi.

“Kwa sasa hapa nchini hatuna kiwanda cha kuzalisha kemikali za kusindika ngozi tunaingiza hizi dawa kutoka nje na wajasiriamali wengi ambao wanasindika ngozi na ambao ni wengi hawana uwezo wa kumudu zile dawa kwasababu viwanda vyao vidogo.” amesema Dkt. Cecilia.

Alisema pia matumizi ya dawa isiyo na kemikali itasaidia katika utunzaji mazingira.

“Hata ikitokea mtu amepata hizo dawa, hana uwezo wa kusafisha majitaka kwasababu hawana miundombinu mizuri na zile dawa ni sumu na matokeo yake wanaishia kufungiwa.”Dkt.Cecilia.

Dkt. Cecilia alisema ubunifu huo aliouanza akiwa anasoma shahada yake ya Uzamivu (PhD) katika Taasisi hiyo, ulipata ushindi wa kwanza katika kundi la vyuo vikuu wakati wa MAKISATU ya mwaka 2020.

“Hiyo ilinipa fursa ya kufadhiliwa na COSTECH kwa ajili ya kuendelea, fedha nilizopewa ziliwezesha kubuni mtambo wa kutengeneza dawa na kuilinda kisheria.” Dkt. Cecilia

Alisema kupitia mradi wa Kongani Bunifu COSTECH ilimfadhili ili kuhamisha teknolojia kwa kikundi cha wasindika ngozi chenye wanachama 15 kilichomo Usangi mkoani Kilimanjaro.

Aidha, Dkt. Cecilia alisema kwa sasa wanampango wa kusajili kampuni ya jamii ambayo itahusika kutengeneza dawa kwa ajili ya wajasiliamali wadogo, kufundisha namna ya kutumia na kutafutiwa masoko.

Alisema pia Taasisi ya Afrika ya Sayansi na Teknoloji ya Nelson Mandela tayari imefanya upembuzi yakinifu wa soko la dawa hiyo na kugundua kuwapo kwa mahitaji makubwa.

Anazidi kueleza kuwa ili kuongeza uzalishaji unahitajika mtambo wenye thamani ya Sh. milioni 500 hatua ambayo itasaidia kutosheleza soko la ndani na kuunza nje ya nchi.

“Tunahitaji mtambo mkubwa ambao thamani yake ni takribani shilingi milioni 500 ili tuweze kuzalisha dawa inayoweza kukidhi mahitaji. Na uwekezaji huu unaweza kulipa ndani ya miaka mitatu.” Alisema Dkt. Cecilia.

“Lengo letu ni tuchangie kwenye mnyororo wa thamani wa ngozi hasa kutokana na Tanzania kuwa nchi ya pili kwa kuwa na mifugo mingi barani Afrika na tumekuwa tunazalisha ngozi takribani milioni 11 lakini asilimia 80 mpaka 90 tunaziuza nchi za nje zikiwa mbichi.” Alisema Dkt. Cecilia

Alisema pia uongezaji thamani ngozi utawezesha nchi kupunguza uingizaji wa viatu vya plastiki ambapo kwa sasa mahitaji ni mpaka milioni 60 na uzalishaji wa ndani ni jozi milioni 1.2 za viatu.

“Sasa kwanini tusitumia tekinolojia za ndani na malighafi za ndani tukaongeza thamani ya ngozi, tukazalisha viatu na watanzania wakavaa. Sisi tunataka tuchangie kwenye sekta ya ngozi iweze kukua kwasababu inauwezo wa kuajiri vijana wengi.”Alisema Dkt. Cecilia

Naye Afisa Usimamizi wa Tafiti kutoka Taasisi hiyo, Okuli Andrea alisema Taasisi ya Afrika ya Sayansi na Tekinolojia ya Nelson Mandela imejikita katika kutoa shahada za Uzamili na Uzamivu na kufanya tafiti mbalimbali za kutatua changamoto mbalimbali katika jamii.

“Katika maonesho ya Wiki ya Ubunifu mwaka 2023 tumekuja na bunifu mbalimbali ambazo zinatatua changamoto katika jamii ambazo ni bidhaa za ngozi zisizotumia kemikali, ngwara yenye virutubisho, vyakula lishe na mtambo wa kusafisha maji na bidhaa nyingine mbalimbali.” Alisema Bw. Okuli

Read More →

WAKALA WA VIPIMO MKOA WA KIGOMA YAHIMIZWA KUENDELEA KUSIMAMIA MATUMIZI SAHIHI YA VIPIMO KWENYE MAWESE

Kufuatia ziara ya Waziri Mkuu wa Jamhuri ya Muungano wa Tanzania Mhe. Kassim Majaliwa (Mb) aliyofanya Mkoa wa Kigoma akiwa na lengo la kuhamasisha kilimo cha mchikichi ambapo katika ziara hiyo aliagiza kutokomezwa kwa vipimo batili maarufu kama bidoo kwenye biashara ya mawese kwa kuwa vinawapunja wakulima wa zao hilo.

Katika utekelezaji wa agizo hilo wakala wa vipimo imefanya kikao na viongozi mbalimbali wa Mkoa wa Kigoma ambapo katika ufunguzi wa kikao hicho akizungumza mgeni rasmi Mhe. Kanali Michael Ngayalina Mkuu wa Wilaya ya Buhigwe ambaye alimuwakilisha Mkuu wa Mkoa wa Kigoma amesema ni ukweli usiopingika kwamba matumizi ya vipimo na udhibiti wake, hususani kwenye biashara ya mawese umekuwa na changamoto nyingi.

Baadhi ya changamoto hizo ni kukosekana kwa masoko/vituo rasmi vya kufanyia biashara ya mawese kwenye maeneo mengi, hali inayotoa mwanga kwa wanunuzi kununua mawese kwenye vinu vya uzalishaji na wakati mwingine kwenye nyumba za wananchi (wakulima) wetu. Hali hii siyo tu kwamba inafanya kazi ya udhibiti wa matumizi ya vipimo kuwa ngumu, bali huikosesha serikali (mamlaka zetu) sehemu ya ushuru pamoja na kushindwa kupata takwimu sahihi za uzalishaji na mauzo ya mawese.

Kadhalika, Mgeni rasmi Kanali Michael Ngayalina ameipongeza taasisi ya Wakala wa Vipimo kwa kuendelea kusimamia matumizi ya vipimo kwenye maeneo mbalimbali ya biashara na huduma pamoja hatua walizokwisha chukuwa kufikia sasa kudhibiti matumizi ya BIDOO kwenye biashara ya mawese kwenye maeneo mbalimbali ya mkoa wetu ili kuhakikisha biashara hiyo inafanyika kwa haki na usawa bila upande wowote kupunjika na ameitaka Wakala wa Vipimo kusaidia upatikanaji wa vibaba vya gharama nafuu ambavyo vitatumika kupimiwa mafuta ya mawese.

Akizingumza wakati wa kikao Meneja wa Wakala wa Vipimo Mkoa wa Kigoma Bw. Laurent Kabikiye ameeleza kuwa wakala wa Vipimo inatoa elimu mara kwa mara kuhusiana na madhara ya kutumia vipimo batili (Bidoo) ili kuweza kumlinda mkulima wa zao la chikichi na mnunuzi pia. Pamoja na elimu hiyo wakala wa vipimo inafanya jitihada za kutafuta vipimo vitakavyo patikana kwa gharama nafuu (Kibaba) ambavyo vitakuwa na ujazo mbalimbali ili kuwasaidia wafanyabiashara wa mawese kuweza kuuza bidhaa zao kwa kutumia kipimo hicho ambacho ni sahihi ili kuwasaidia kupata faida bila kupunjwa.

Katika kikao hicho ambacho kilihudhuriwa na viongozi na watendaji mbalimbali wa Mkoa wa Kigoma kama Waheshimiwa Wakuu wa Wilaya za Mkoa wa Kigoma, Makatibu Tawala wasaidizi sekretariet ya Mkoa, Makatibu Tawala wa Wilaya, Wakurugenzi watendaji wa Halmashauri za Mkoa, Maafisa Tarafa, Maafisa Biashara kutoka Halmashauri zote za Mkoa, Meneja wa SIDO na TBS pamoja na watumishi wa Wakala wa Vipimo.

Aidha, washiriki wa kikao kazi hicho kwa pamoja wamekubaliana kuwa Halmashauri zianzishe masoko (Buying Centres) za kuuzia na kununulia mawese pamoja na kununua vipimo vilivyohakikiwa na Wakala wa Vipimo na kuhamasisha wauzaji wa mawese kununua vipimo ili vitumike kununua na kuuzia mawese na kutokomeza matumizi ya vipimo batili (Bidoo).

Read More →

MANISPAA YA SHINYANGA YAELEZA KUIMARIKA UKUSANYAJI MAPATO, YAPONGEZWA KASI UTEKELEZAJI MIRADI

Mkurugenzi Mtendaji wa Halmashauri ya Manispaa ya Shinyanga Jomaary Satura (kushoto) na Mstahiki Meya wa Halmashauri ya Manispaa ya Shinyanga Mhe. Elias Ramadhani Masumbuko wakizungumza kwenye kikao cha Baraza la Madiwani

Mkurugenzi Mtendaji wa Halmashauri ya Manispaa ya Shinyanga Jomaary Satura akizungumza wakati wa Kikao cha Baraza la Madiwani leo Alhamisi Mei 4,2023.

Na Kadama Malunde - Malunde 1 blog

Halmashauri ya Manispaa ya Shinyanga imefanikiwa kuongeza kasi ya makusanyo ya mapato ya ndani ambapo kwa kipindi cha Julai mwaka 2022 hadi Aprili 30, 2023 imekusanya shilingi Bilioni 5 sawa na asilimia 108% ikiwa malengo ni kukusanya shilingi Bilioni 6 sawa na asilimia 140% ifikapo Juni 31,2023.

Hayo yamesemwa leo Alhamisi Mei 4,2023 na Mkurugenzi wa Manispaa ya Shinyanga Jomaary Satura kwenye kikao cha Baraza la Madiwani kilichokuwa na ajenda mbalimbali ikiwemo kupokea mihtasari ya kamati za kudumu kwa robo ya pili ya mwaka 2022/2023, kupokea taarifa za utekelezaji wa idara mbalimbali za kamati za kudumu kwa robo ya tatu 2022/2023 na taarifa kutoka kwa mkurugenzi wa Manispaa ya Shinyanga.

Mkurugenzi Mtendaji wa Halmashauri ya Manispaa ya Shinyanga Jomaary Satura.

Mkurugenzi huyo wa Manispaa ya Shinyanga amesema  Julai 2022 hadi kufikia 30 Aprili 30,2023 mwenendo wa makusanyo ya mapato ya ndani umeimarika kwani wamekusanya asilimia 108% sawa na shilingi Bilioni 5.

“Matarajio yetu ifikapo Juni 31,2023 tutafikia lengo la makusanyo ya asilimia 140 sawa na shilingi bilioni 6 kama tulivyojiwekea malengo kwa mwaka 2023/2024 ili kuendelea kuwahudumia wananchi kwa kutekeleza miradi mbalimbali ya maendeleo”, amesema Satura.

Akizungumzia kuhusu mwenendo wa ujenzi wa miradi ya maendeleo, Satura amesema miradi inayoendelea kujengwa itakamilika haraka ili ianze kuwahudumia wananchi huku akiwaomba madiwani na wananchi waendelee kutoa ushirikiano ili miradi ikamilike vizuri.

“Miradi inaendelea vizuri hata ule ujenzi wa soko kuu Mjini Shinyanga na Ngokolo Mtumbani unaendelea vizuri na kwa weledi mkubwa na wafanyabiashara wana amani na matumaini makubwa juu ya miradi hii”,amesema Satura.

Kikao cha Baraza la Madiwani wa Halmashauri ya Manispaa ya Shinyanga

“Tuendelee kuvumilia wakati miradi inaendelea kutekelezwa kwa viwango vinavyotakiwa. Ni matumaini yetu pindi ujenzi utakapokamilika mauzo na mapato ya Halmashauri yataongezeka maradufu”,ameongeza Satura.

Katika hatua nyingine amewaomba Madiwani pindi panapotokea matatizo yanayoathiri wananchi kwenye maeneo yao, wasisubiri vikao vya Baraza la Madiwani bali wawasiliane na ofisi ya Mkurugenzi ili kutatua changamoto hizo haraka.

Kuhusu taarifa ya mifugo katika kata ya Mwamalili kufa kwa ugonjwa ambao haujafahamika, amesema ofisi yake imepokea taarifa hizo na inazifanyia kazi haraka iwezekanavyo na majibu yatapatikana haraka kwani mwananchi ni haki yake kuhudumiwa kwa viwango vinavyokidhi.

Naye Mchumi wa Manispaa ya Shinyanga Mensari Mrema amesema Halmashauri ya Manispaa ya Shinyanga kwa kipindi cha robo ya tatu imepokea kiasi cha shilingi 1,715,900,000/= ikiwa ni fedha za bajeti ya mwaka wa fedha 2022/2023 kwa ajili ya kutekeleza miradi ya ujenzi wa matundu ya vyoo, ukamilishaji wa maboma ya madarasa, ujenzi wa vyumba vya walimu za 2 in 1 katika shule za msingi, ukarabati wa miundombinu katika shule za msingi tatu kongwe, ukamilishaji wa miundombinu ya bweni la wanafunzi na bwalo la chakula katika shule ya Sekondari Old Shinyanga.

Mbali na Mapokezi ya fedha za miradi ya maendeleo za mwaka 2022/2023 kutoka serikali kuu kwa kipindi cha robo ya tatu na nne kiasi cha shilingi 1,715,900,000/=,  Halmashauri pia imepokea fedha za kutekeleza miundombinu ya elimu msingi kupitia mradi wa Boost pamoja fedha kwa ajili ya ujenzi wa nyumba za viongozi ambao ni nyumba ya mkurugenzi na Mkuu wa Idara. 

Mstahiki Meya wa Halmashauri ya Manispaa ya Shinyanga Mhe. Elias Ramadhani Masumbuko.

Kwa upande wake, Meya wa Manispaa ya Shinyanga Elias Masumbuko amesema mafanikio makubwa yanayoonekana katika Manispaa ya Shinyanga yanatokana na ushirikiano mkubwa uliopo baina ya viongozi, wadau na wananchi.

“Tunamshukuru sana Mhe. Rais Samia kwa kuendelea kutupatia fedha kwa ajili ya maendeleo. Na sisi Shinyanga tuna kila sababu ya kumpongeza Mhe. Rais Samia kwa fedha anazoleta, Shinyanga inapiga hatua kimaendeleo. Waheshimiwa madiwani tuendelee kushirikiana katika kuhakikisha tunafanikisha miradi, tuna hofu ya Mungu hakuna atakayedokoa fedha za miradi”,amesema Masumbuko.

Meya huyo pia amewataka Madiwani kufanya mikutano ya hadhara kuhamasisha wananchi kuchangia chakula kwa ajili ya wanafunzi shuleni ili watoto wote wapate lishe shuleni.

Kwa upande wake Mkuu wa wilaya ya Shinyanga Mhe. Johari Samizi ameitaka Madiwani na Watumishi wa Halmashauri waendelee kuwa wabunifu katika ukusanyaji mapato na utekelezaji wa miradi ya maendeleo.

“Kila mmoja atimize wajibu wake katika kutekeleza miradi ya maendeleo. Sote tunatekeleza ilani ya uchaguzi ya CCM na miongozo mbalimbali inayotolewa na serikali.

Aidha amehimiza ushirikiano katika kupambana na mabadiliko ya tabia nchi kwa kuhakikisha binadamu wanabadili tabia zao kwa kutunza mazingira kwa kupanda miti na kutunza vyanzo vya maji kwani kuna baadhi ya watu wanaharibu kwa maksudi binafsi huku akisisitiza kuwa yeyote atakayeharibu vyanzo vya maji hatua za kisheria.

Mkuu wa wilaya ya Shinyanga Mhe. Johari Samizi akizungumza wakati wa Kikao cha Baraza la Madiwani.

Mkuu huyo pia amesisitiza wananchi kutumia mvua hizi za mwishoni zinazoendelea kunyesha kwa kupanda mazao ya muda mfupi na wataalamu wa kilimo wahakikishe wanatoa ushauri wa kitaalamu ili kuhakikisha wananchi wanatumia vizuri mvua hizi sambamba na kuhamasisha wananchi kutunza chakula.

Mkuu huyo wa wilaya amesema ni wajibu wa kila mwananchi kuhakikisha anapiga suala la mmomonyoko wa maadili katika jamii na ukatili wa kijinsia.

“Tunasikia kuna ubakaji, ulawiti na usagaji. Tunasikia maneno yasiyo na mvuto kwenye masikio yetu. Ni jukumu letu kuhakikisha tunapiga vita mmomonyoko wa maadili na kupita vita matukio ya ukatili wa kijinsia”,amesema Mhe. Samizi.

Madiwani wakiwa kwenye kikao

Kaimu Katibu Tawala wa Mkoa wa Shinyanga Mhandisi Andrew Kifua ameipongeza Manispaa ya Shinyanga kupata hati safi, utekelezaji wa miradi ya maendeleo pamoja na ukusanyaji wa mapato.

Mwenyekiti wa CCM wilaya ya Shinyanga Mjini Mhe. Anord Makombe amesema ukusanyaji wa mapato katika Manispaa ya Shinyanga unaridhisha na kutokana na mambo mazuri na mageuzi makubwa yanayofanywa kwenye Manispaa hiyo maswali ya wananchi yanapungua kuhusu nini CCM imefanya katika jamii.

Wakichangia hoja mbalimbali, Madiwani wameomba miradi ya maendeleo kukamilishwa kwa wakati ikiwa ni pamoja na barabara za mitaa zilizofungwa zifunguliwe , wananchi kupatiwa huduma ya maji na umeme kwenye maeneo ambayo bado hayajafikiwa kutatua changamoto ya kukatika katika kwa umeme huku wakiipongeza serikali ya awamu ya Sita inayoongozwa na Mhe. Rais Dkt. Samia Suluhu Hassan kwa kuendelea kutoa fedha nyingi kwa ajili ya maendeleo katika Manispaa ya Shinyanga.

ANGALIA PICHA HAPA CHINI

Mstahiki Meya wa Halmashauri ya Manispaa ya Shinyanga Mhe. Elias Ramadhani Masumbuko akizungumza wakati wa Kikao cha Baraza la Madiwani leo Alhamisi Mei 4,2023 katika ukumbi wa Lewis Kalinjuna. Picha zote na Kadama Malunde - Malunde 1 blog

Mstahiki Meya wa Halmashauri ya Manispaa ya Shinyanga Mhe. Elias Ramadhani Masumbuko akizungumza wakati wa Kikao cha Baraza la Madiwani leo Alhamisi Mei 4,2023 katika ukumbi wa Lewis Kalinjuna.

Mkurugenzi Mtendaji wa Halmashauri ya Manispaa ya Shinyanga Jomaary Satura akizungumza wakati wa Kikao cha Baraza la Madiwani leo Alhamisi Mei 4,2023 katika ukumbi wa Lewis Kalinjuna.

Mkuu wa wilaya ya Shinyanga Mhe. Johari Samizi akizungumza wakati wa Kikao cha Baraza la Madiwani leo Alhamisi Mei 4,2023 katika ukumbi wa Lewis Kalinjuna.

Kikao cha Baraza la Madiwani wa Halmashauri ya Manispaa ya Shinyanga kikiendelea

Mchumi wa Manispaa ya Shinyanga Mensari Mrema akizungumza wakati wa Kikao cha Baraza la Madiwani

Kaimu Katibu Tawala wa Mkoa wa Shinyanga Mhandisi Andrew Kifua akitoa salamu kwenye kikao cha Baraza la Madiwani wa Halmashauri ya Manispaa ya Shinyanga.

Mwenyekiti wa CCM wilaya ya Shinyanga Mjini Mhe. Anord Makombe akitoa salamu kwenye kikao cha Baraza la Madiwani wa Halmashauri ya Manispaa ya Shinyanga.

Mkuu wa wilaya ya Shinyanga Mhe. Johari Samizi (kulia) akiwa kwenye kikao cha Baraza la Madiwani wa Halmashauri ya Manispaa ya Shinyanga. Kushoto ni Naibu Mstahiki Meya wa Manispaa ya Shinyanga Mhe. Esther Makune

Mkuu wa wilaya ya Shinyanga Mhe. Johari Samizi (kulia) akiwa kwenye kikao cha Baraza la Madiwani wa Halmashauri ya Manispaa ya Shinyanga.

Kikao cha Baraza la Madiwani wa Halmashauri ya Manispaa ya Shinyanga kikiendelea.

Read More →

MRADI UJENZI BWAWA LA MEMBE WAFIKIA ASILIMIA 45.83%.

Kamati ya siasa ya wilaya ya Chamwino ikiongozwa na katibu ndugu Sylivester Yaledi (Chief Yaledi) imetembelea mradi wa Bwawa la maji Membe lililopo kata ya Membe halmashauri ya Chamwino kukagua hatua ya utekelezaji mradi huo.

Kamati hiyo imeipongeza Tume ya Taifa ya Umwagiliaji NIRC kwa usimamizi makini wa ujenzi wa bwawa la maji Membe litakaloweze kumwagilia zaidi ya hekari 8,000 katika mashamba ya wakulima wa eneo hilo ikiwa ni miongoni mwa miradi ya Umwagiliaji inayoendelea kutekelezwa na tume.

Akielezea maendeleo ya mradi huo msimamizi wa mradi wa ujenzi bwawa hilo kutoka Tume ya Taifa ya Umwagiliaji Mhandisi Saleh Madebe (mwenye T-shirt ya njano kwenye picha) amesema mradi huo umefikia asilimia 45.83%.

Hata hivyo kamati hiyo imemtaka mkandarasi anayetekeleza mradi huo kuongeza kasi ya ujenzi wa bwawa hilo ili kuendana na muda wa mkataba na hatimaye mradi huo uwe na tija kwa wakulima na kuchochea uchumi wa nchi.

Mradi huo unatarajiwa kukamilika Septemba 1, 2023 kwa mujibu wa mkataba ambapo matokeo ya kukamilika kwa mradi huo utawezesha halmashauri ya wilaya ya Chamwino na mkoa wa Dodoma kuwa na chakula cha kutosha na kuzalisha ajira kwa vijana kupitia sekta ya kilimo.

Read More →