Wednesday, 27 November 2019
Taarifa Kwa Umma Kutoka Jeshi La Polisi Mkoani Mwanza
Watuhumiwa Hao Walifariki Wakati Wakipelekwa Hospitali Baada Ya Majibizano Ya Kurushiana Risasi Na Askari Polisi Baada Ya Kumtishia Kumuua Kwa Bunduki Na Baadae Kupora Pikipiki Ya ” Mwendesha Bodaboda “.
Tukio Hilo Limetokea Tarehe 26.11.2019 Majira Ya 23:40hrs Huko Maeneo Ya Sweya – Fisheries Wilayani Nyamagana, Hii Ni Baada Ya Mwendesha Pikipiki Samwel Masanja (Bodaboda) Kuporwa Pikipiki Yake Maeneo Ya Maina Na Watu Hao Na Baadae Wananchi Kutoa Taarifa Polisi.
Baada Ya Kupatikana Kwa Taarifa Hizo Askari Polisi (Makachero) Walifanya Ufuatiliaji Wa Haraka Na Baadae Wakakutana Na Wahalifu Hao Uso Kwa Uso Maeneo Ya Sweya, Walipobaini Kufuatiliwa Walianza Kuwarushia Risasi Askari Na Askari Walijihami Na Kufanikiwa Kuwajeruhi Kwa Risasi Wahalifu Hao Ambao Baadae Walifariki Dunia Wakati Wakipatiwa Matibabu Hospitali Ya Bugando.
Katika Eneo La Tukio Kumepatikana Bastola Moja Aina Ya Starbird Yenye Namba Za Usajili Us Patten 2563720 Pamoja Na Risasi Tatu Ndani Ya Magazine Na Pikipiki Aina Ya San Lg Nyekundu Yenye Namba Za Usajili Mc 617 Abx Ambayo Ilikua Imeporwa. Imepatikana Miili Ya Marehemu Wote Wawili Imehifadhiwa Hospitali Ya Rufaa Ya Bugando Kusubiri Utambuzi Na Uchunguzi Wa Daktari.
Tukio La Pili.
Tarehe 26.11.2019 Majira Ya 00:05hrs Usiku Huko Maeneo Ya Kifua Wazi Barabara Kuu Ya Airport –mwanza, Kata Ya Nyamanoro, Wilaya Ya Ilemela, Jiji Na Mkoa Wa Mwanza. Abiria Mmoja Mwanamke Ambae Bado Hajafahamika Jina Wala Makazi, Anayekadiriwa Kuwa Na Umri Kati Ya Miaka 25 Hadi 30, Akiwa Amebebwa Kwenye Pikipiki Yenye Namba Za Usajili Mc 269 Bdy Aina Ya Sanya Iliyokuwa Ikiendeshwa Na Dereva Aitwaye Novart Joseph, Miaka 26, Mhaya, Mkazi Wa Jiwe Kuu – Kitangiri, Alianguka Chini Toka Kwenye Pikipiki Na Kuburuzwa Umbali Kiasi Cha Mita 70 Baada Ya Mtandio Aliokua Amejifunga Shingoni Kuingia Na Kujisokota Kwenye Tairi (Spockert) Na Baadae Kufariki Baada Ya Kukimbizwa Hospitali Ya Rufaa Ya Mkoa Sekou Toure Kwa Ajili Ya Kupatiwa Matibabu. Mwili Wa Marehemu Umehifadhiwa Hospitalini Hapo Kwa Ajili Ya Utambuzi Na Uchunguzi Zaidi Wa Kitaalamu. Dereva Wa Pikipiki Anashikiliwa Kwa Mahojiano Pamoja Na Pikipiki Hiyo.
Jeshi La Polisi Mkoa Wa Mwanza Linawashukuru Wananchi Kwa Kuendelea Kutoa Ushirikiano Katika Kuzuia Na Kupambana Na Uhalifu Na Wahalifu. Pia Linaendelea Kuwasihi Wananchi Wakati Wote Kuendelea Kutoa Taarifa Za Uhalifu Na Wahalifu Kwa Jeshi La Polisi Na Linawahakikishia Kushughulikia Taarifa Hizo Kwa Kuzingatia Weledi Wa Hali Ya Juu.
Aidha Jeshi La Polisi Mkoa Wa Mwanza Linawataka Abiria Na Madereva Wa Vyombo Vya Moto Kuzingatia Sheria Za Usalama Barabarani, Hasa Waendesha Pikipiki Na Wapanda Pikipiki Wazingatie Kuvaa Kofia Ngumu Na Mavazi Ambayo Hayataleta Madhara Kwa Maisha Yao Ili Kuepusha Vifo Na Majeraha Yanayoweza Kuepukika.
Imetolewa Na
Muliro J. Muliro –ACP
Kamanda Wa Polisi (M) Mwanza
27 November,2019
Wizara ya Elimu: Commonwealth shared scholarships tenable in the united kingdom 2020
Commonwealth shared scholarships tenable in the united kingdom 2020 how to apply for commonwealth scholarship, commonwealth scholarship application portal, how to apply for commonwealth scholarship 2020/2021, commonwealth scholarship 2020/2021, commonwealth scholarships 2020, fsb commonwealth scholarship, commonwealth scholarships 2020/2021, commonwealth scholarship 2020/2021 1.0 Call for Applications The General public is hereby informed that, the Government of United Kingdom has… Read More »
The post Wizara ya Elimu: Commonwealth shared scholarships tenable in the united kingdom 2020 appeared first on Udahiliportal.com.
BIBI WA MIAKA 82 AMTEMBEZEA KICHAPO KIJANA WA MIAKA 28
.jpg?itok=T8r-O6OF×tamp=1574777847)
Bibi Willie Murphy wa miaka 82 ambaye alikuwa mtunisha misuli.
Bibi Willie Murphy mwenye umri wa miaka 82, kutokea jijini New York nchini Marekani, amempiga mwanaume wa miaka 28, ambaye jina lake halikuwekwa wazi kwa kosa la kuvamia nyumbani kwake bila ruhusa majira ya saa 5:00 usiku.
Bibi huyo ambaye inadaiwa alikuwa anafanya michezo ya kutunisha misuli 'Bodybuilder' enzi za ujana wake, amesema alikuwa anaenda kulala chumbani kwake, ghafla akasikia mtu anagonga hodi mlangoni huku akidai kutaka kupigia gari la msaada wa wagonjwa lije nyumbani kwake.
Bibi huyo ameendelea kusema jamaa huyo aliamua kuvunja mlango wake na kuingia ndani kwa nguvu na ndipo yeye alipojihami kwa kuwapigia simu polisi, huku ameshika gongo na meza kisha kuanza kumpiga nazo jamaa huyo.
Baada ya polisi kufika Bibi huyo alinukuliwa akisema "Ilikuwa ni usiku na niko pekee yangu, mimi ni mzee, lakini wajua nini, nilichukua meza na gongo nikampiga navyo, Polisi walivyoingia, tayari alikuwa amelala chini kwa sababu nilikuwa nishamaliza kazi" amesema Bibi Willie Murphy.
Willie Murphy aliwahi kuwa mshindi wa mataji kadhaa ya michezo ya kutunisha misuli na anaamini ujasiri alioufanya utawatia moyo watu wenye umri kama wake.
Chanzo cha habari hii ni Tuko News.
Taarifa Kwa Umma Kuhusu Wakulima Kutumia Mvua Za Msimu Zilizoanza Kunyesha Na Za Vuli Kupanda Mazao Yanayokomaa Kwa Muda Mfupi.
Wakulima wanahamasishwa kutumia vizuri mvua hizi kwa kupanda kwa wakati. Aidha, Waziri Hasunga anawaagiza Wakuu wa Wilaya kuwasimamia Maafisa Ugani Kilimo ili waweze kuwasaidia wakulima kuzingatia kanuni bora za kilimo kwa kupanda mbegu bora kulingana na kanda za kiekolojia na kutumia mbolea inayostahili kwenye mazingira husika.
Wizara ya Kilimo itaendelea kutoa ushauri wa kitaalam na maelekezo kwa wakulima na wananchi nchini kuhusu mwenendo wa mvua na hatua za kuchukua ili kuhakikisha kunakuwa na uzalishaji wa mazao ya chakula na biashara ya kutosha na hatimaye nchi kuwa na usalama wa chakula.
Imetolewa na:
Revocatus A. Kassimba
Mkuu wa Kitengo cha Mawasiliano Serikalini,
Wizara ya Kilimo,
DODOMA.
Mkutano Wa 39 Wa Baraza La Mawaziri Wa EAC Kuanza Leo Jijini Arusha
Kuanza kwa mkutano huo kunafuatia kukamilika kwa Mkutano wa ngazi ya Makatibu Wakuu wa nchi wanachama wa Jumuiya hiyo ulioanza tarehe 25 na kumalizika tarehe 26 Novemba 2019.
Mkutano wa Makatibu Wakuu pamoja na mambo mengine, umejadili masuala mbalimbali ya utekelezaji ya jumuiya ya Afrika Mashariki na kutoa mapendekezo kwa mkutano wa ngazi ya Mawaziri wa Wizara za Kisekta zinazohusiana na Jumuiya hiyo utakaoanza tarehe 27 Novemba 2019.
Mkutano huu wa 39 wa Baraza la Mawaziri wa nchi wanachama wa Jumuiya ya Afrika Mashariki umeandaliwa kwa lengo la kujadili na kukubabaliana na agenda zitakazowasilishwa kwenye Mkutano wa 21 wa Wakuu wa Nchi wa Jumuiya hiyo utakaofanyika Februari, 2020.
Waziri Ummy Atoa Maagizo kwa Maafisa Maendeleo ya Jamii
Akizungumza katika uzinduzi wa Kampeni ya siku 16 za kupinga ukatili wa kijinsi jana Jijini Dodoma, Waziri wa Afya Maendeleo ya Jamii Jinsia Wazee na Watoto Mhe Ummy Mwalimu amesema kuwa dhamira ya Serikali ya Awamu ya Tano inayoongozwa na Mhe. Dkt John Pombe Magufuli imetekeleza kwa vitendo azma ya kukomesha vitendo hivyo.
Waziri Ummy ameongeza kuwa Serikali itaendelea kushirikiana na asasi za Kiraia katika mapambano dhidi ya vitendo vya ukatili wa Kijinsia katika maeneo yote hapa nchini.
Aidha, Mhe Ummy ameagiza kuanzishwa kwa Madawati ya Jinsia Katika Taasisi za Elimu ya Juu ili kukomesha vitendo vya rushwa ya ngono na ukatili mwingine kwa wanafunzi wa vyuo vya elimu ya juu.
Aliongeza kuwa kuanzishwa kwa madawati ya Jinsia na Watoto katika Vituo vya Polisi yapatayo 420 yamewezesha wahanga 58,059 kuripoti aina mbalimbali za matukio ya ukatili wa kijinsia kwa rika mbalimbali wakiwemo watu wazima na watoto katika matukio ya ubakaji, ulawiti, vipigo na ukeketaji.
Akizungumzia faida za madawti hayo Waziri amesema kuwa yameongeza mwamko wa wananchi katika kujiamini na kutoa taarifa za ukatilii unapotokea kwenye maeneo yao.
Kuongeza vituo vya Mkono kwa Mkono vya Kutoa huduma kwa wahanga wa ukatili wa Kijinsia (One Stop Centres) kutoka vituo 10 mwaka 2017 hadi 13 mwaka 2019 ili kiwezesha utoaji wa huduma rafiki na kwa haraka kwa wahanga. Hatua hiyo inapelekea Serikali ya Awamu ya Tano kuchukua hatua mbalimbali ikiwemo kuendelea kutekeleza Mpango wa Taifa wa Kutokomeza Ukatili Dhidi ya Wanawake na Watoto 2017/2018- 2021/2022 ambao unalenga kupunguza kiwango cha ukatili dhidi ya wanawake na watoto katika Jamii yetu kwa asilimia 50 ifikapo mwaka 2022.
Kauli mbiu ya Kampeni ya siku 16 za Kupinga Ukatili wa Kijinsia kwa mwaka huu ni “Kizazi chenye Usawa: Simama Dhidi ya Ubakaji” kauli mbiu hii inawapa jukumu wananchi wote kutafakari wajibu wao kama kizazi kinachoamini na kuthamini usawa wa kijinsia.
Kauli mbiu hii inatoa msukumo wa kuhakikisha kila mtu katika nafasi yake anapaza sauti na kuchukua hatua ya kuzuia na kutokomeza vitendo vyote vya ukatili wa kingono hasa ubakaji na matendo yote ya ukatili dhidi ya wanawake na watoto katika maeneo mbalimbali ikiwemo katika nyumba na mahali pa kazi na katika taasisi mbalimbali ikiwemo shule na vyuo mbalimbali.
Aidha, Serikali inapinga vikali mila, desturi na imani zote zenye madhara kwa jamii kama ukeketaji, kukatisha watoto wa kike shule kwa ajili ya kuolewa.
Kwa upande wake Mwakilishi Mkaazi wa Shirika la Umoja wa Mataifa linaloshughulikia Wanawake Bi Hodan Addou amesema kuwa shirika hilo litaendelea kushirikiana na Serikali ya Tanzania kupinga vitendo vya ukatili wa Kijinsia kwa makundi yote ili kujenga jamii yenye usawa.
Pia alipongeza juhudi za Serikali katika kuhakikisha inakomesha vitendo hivyo kupitia mpango mkakati wake na kuahidi kuendelea kuunga mkono juhudi hizo.
Aliongeza kuwa vitendo vya ukatili wa kijinsia ni tatizo la kidunia linalohitaji jitihada za pamoja katika kulikomesha.
Uzinduzi wa siku 16 za kupinga ukatili wa kijinsia umefanyika Jijini Dodoma na umefanywa na Waziri wa Afya Maendeleo ya Jamii Jinsia Wazee na Watoto na kuhudhudhuriwa na Asasi zisizo za kiserikali, viongozi wa Serikali, Mashirika ya Umma pamoja na Viongozi wa Dini.
Waziri Jenista Mhagama Atangaza Punguzo La Bei Ununuzi Wa Nyumba Za PSSF Za Buyuni-chanika Jijini Dar Es Salaam
WAZIRI wa Nchi katika Ofisi ya Waziri Mkuu anayeshughulikia, Bunge, Sera, Kazi, Ajira, Vijana na Watu wenye Ulemavu, Mhe. Jenista Mhagama (Mb), ametangaza punguzo la bei kwa karibu asilimia 50 kwa atakayehitaji kununua nyumba zilizo katika mradi wa nyumba za gharama nafuu zinazomilikiwa na Mfuko wa Hifadhi ya Jamii kwa Watumishi wa Umma (PSSSF) huko Buyuni-Chanika jijini Dar es Salaam.
Mheshmiwa Waziri ametangaza uamuzi huo wa Serikali wakati akihitimisha ziara yake ya siku mbili kutembelea vitegauchumi vinavyomilikiwa na Mfuko huo jijini Dar es Salaam, Novemba 26, 2019 katika eneo la Mradi ambapo nyumba zilizoingia kwenye punguzo hilo ziko 480.
Akitoa mchanganua wa bei mpya Mhe. Waziri alisema, nyumba yenye vyumba viwili vya kawaida awali iliuzwa kwa shilingi milioni 66.80, sasa itauzwa kwa shilingi Milioni 36.58, nyumba ya vyumba vitatu vya kawaida awali iliuzwa kwa shilingi Milioni 67.260 na sasa itauzwa kwa shilingi Milioni 41.30.
Nyumba yanye vyumba viwili vya kawaida na Master Bedroom ilikuwa inauzwa shilingi Milioni 74.340 na sasa itauzwa Shilingi Milioni 46.20, aidha nyumba yenye vyumba vitatu na Master Bedroom iliyokuwa ikiuzwa shilingi Milioni 83.780 na sasa itauzwa kwa shilinhgi Milioni 61.360.
“Naielekeza Bodi na Menejimenti kuanzia leo (jana Novemba 26, 2019) ninapotoa tamko hili, nyumba hizo zote 204 ambazo hazijapata wanunuzi kabisa na zile 276 ambazo malipo yake yalikuwa bado hayajakamilika ambazo wafanyakazi walikuwa hawawezi kulipa hizo bei za mwanzo, nyumba hizo zote ziingie katika bei niliyotamka leo kwa niaba ya Serikali.” Alisisitiza na kuongeza……
“Baada ya kuona ununuzi wa nyumba hizo si wa kuridhisha, Menejimenti ya Mfuko imenifahamisha juu ya juhudi mbalimbali zilizofanywa kwa maelekezo ya Bodi ya Wadhamini wa Mfuko, na hatua hizi zililenga kupata njia bora ya kuuza nyumba hizi, kwani lengo kuu lilikuwa ni kujenga na kuuza nyumba kwa watumishi na watanzania kwa ujumla na sio kukaa nazo kama sehemu ya uwekezaji wa Mfuko.” Alifafanua Mhe. Waziri Jenista Mhagama.
Mheshimiwa Waziri alisema uamuzi huo wa serikali unatokana na ripoti ya Mthamini Mkuu wa Serikali baada ya kukamilisha tathmini na thamani halisi ya nyumba hizo kwa sasa.
"Nilipata taarifa kuwa katika mradi huu walikuwepo madalali kuanzia sasa hakuna haja ya kuwa na madalali kwani Mlango uko wazi kwa watu binafsi watakaohitaji kununua nyumba hizi kwani na wao ni watanzania wenzetu.
Wapangaji wa Nyumba za NHC Kuhakikiwa Upya
Lukuvi, alitoa agizo hilo jana jijini Dar es Salaam baada ya juzi kutembelea miradi ya shirika na kutaka ifikapo Machi 30, mwakani, uhakiki huo uwe umekamilika.
“Ninajua kuna baadhi ya wapangaji wameanzisha vishirika vya nyumba ndani yenu, kuna watu wana nyumba mbili au tatu kwa ujanja wao na wao wanakodisha. Tutawaondoa wapangaji hewa na tutawatambua wamiliki hewa wa nyumba zilizotaifishwa.
“Kuna watu wakihama kwenye nyumba wanaziuza kwa gharama kubwa wanachukua fedha juu ya mgongo wa shirika hili kwa sababu inaelekea hatuna utunzaji wa kisasa wa takwimu za wapangaji na nyumba.”
Pia, alilitaka shirika hilo liingie kwenye utaratibu wa kidijitali kwa kuanzisha nyaraka za kieletroniki ili kutunza kumbukumbu za wapangaji.
“Taarifa hizi ziingie kwenye mfumo wa Mamlaka ya Vitambulisho Vya Taifa (Nida), wapangaji wote lazima wafanyiwe uhakiki taarifa zao zifanane na taarifa za Nida.
“Kila mpangaji anapohamia kwenye nyumba tumjue anafanya kazi wapi, jina lake kamili kama alivyojiandikisha Nida.”
Alisema anawajua baadhi ya watu wanaomiliki zaidi ya nyumba moja kwa majina tofauti na wengine wanazitumia kuzikodisha huku wakiwa kwenye majengo mengine.
“Wote watambuliwe, najua kuna vishoka ambao wanaowatumia kuzikodisha, mfanye uhakiki upya wa kielektroniki. Wakati wa uhakiki hakikisheni maofisa na mameneja wa Mkoa wa Dar es Salaam wanaondolewa na kuwekwa watu wengine,” alisema.
Waziri Lukuvi aliwaeleza wananchi kuwa nyumba za shirika hazitolewi kwa familia kama urithi baada ya aliyepangishwa kufariki, bali waliobaki hutakiwa kwenda NHC kwa ajili ya upangaji upya.
Mabadiliko matumizi ya barabara Mandela, Morogoro
Taarifa iliyotolewa na kitengo cha uhusiano wa umma na mawasiliano cha Dart, inaeleza kuwa mabadiliko hayo yanatokana na shughuli za ujenzi wa barabara za juu unaoendelea katika makutano ya barabara hizo, eneo la Ubungo.
Katika ujenzi huo baadhi ya vifaa vitaanza kushushwa mchakato utakaochukua dakika 45 kila siku, hivyo kulazimika magari kusubiri.
Inaeleza kuwa kutokana na mabadiliko hayo magari yote yanayatokea barabara ya Sam Nujoma, yatatakiwa kwenda hadi Shekilango ili kwenda maeneo mbalimbali badala ya kupita Ubungo.
Karani wa Mahakama Kortini Kwa Rushwa
Mshtakiwa huyo alisomewa mashtaka yake mbele ya Hakimu Mkazi Agustina Mmbando.
Mwendesha Mashtaka wa Taasisi ya Kuzuia na Kupambana na Rushwa (Takukuru), Odessa Horombe, alidai kuwa mshtakiwa huyo anakabiliwa na shtaka la kupokea rushwa kinyume cha sheria.
Horombe alidai kuwa Aprili 27, 2018 katika viunga vya Mahakama ya Wilaya ya Temeke, mshtakiwa aliomba rushwa ya Sh. 200,000 kutoka kwa Musa Abdallah, ikiwa ni kishawishi cha kumsaidia kukwepa hatia dhidi ya shtaka lililokuwa linamkabili kesi namba 211/2018 ya usalama barabarani iliyopo mahakamani hapo. Mshtakiwa huyo alikana mashtaka hayo.
Horombe alidai kuwa upelelezi umekamilika na kuiomba mahakama ipange tarehe nyingine kwa ajili ya kumsomea maelezo ya awali.
Hakimu Mbando alisema mshtakiwa anatakiwa kuwa na mdhamini mmoja mwenye vitambulisho vinavyotambulika na atasaini hati ya dhamana ya Sh. milioni tano.
Alisema kesi hiyo itasikilizwa maelezo ya awali Novemba 28, mwaka huu. Mshtakiwa alitimiza masharti hayo na yupo nje kwa dhamana.
Tuesday, 26 November 2019
Benki Ya Dunia Yatoa Dola Milioni 75 Kuimarisha Elimu Ya Ufundi Nchini
Akizungumzia mradi huo wakati wa akifungua mkutano wa pili wa Mwaka wa wadau wa Mradi huo kwa niaba ya Waziri wa Elimu, Sayansi na Teknolojia, Katibu Mkuu wa wizara hiyo Dk.Leornad Akwilapo amesema benki ya Dunia imetoa Kiasi Dola za kimarekani Milioni 75 kwa ajili ya kutekeleza mradi huo katika vyuo vinne nchini ambavyo ni Chuo cha Usafirishaji Dar es Salaam (NIT), Taasisi ya Teknolojia ya Dar Es salaam (DIT) kampasi ya Dar es Salaam na Mwanza na Chuo cha Ufundi Arusha (ATC).
“Fedha hizi zinatolewa na Benki ya Dunia ni kwa ajili ya kuvijengea vyuo vya hivyo uwezo ili viweze kutoa wanafunzi wenye ujuzi stahiki wa kuwawezesha kujiajiri ama kuajiriwa na pamoja na kuvijengea vitu vya umahiri” amesema Dkt. Akwilapo.
Katibu Mkuu huyo ameongeza kuwa mradi huo utawezesha kujenga miundombinu bora na kuweka vifaa Pamoja na kuwajengea uwezo wakufunzi.
Aidha, Dkt. Akwilapo amewataka watanzania kufahamu kuwa elimu ya ufundi ni muhimu kwa maendeleo ya nchi hasa katika uchumi wa viwanda na kwamba vyuo vya ufundi visiwe chaguo la mwisho kwa mtu anayefeli.
“Tunawashukuru Benki ya Dunia kwa maana fedha hizo zitatumika katika kuhakikisha wanawajengea uwezo wanafunzi na pindi wanapohitimu inakua rahisi kuajiriwa viwandani na hasa ikizingatiwa Tanzania inaelekea katika uchumi wa viwanda kwa sasa,”
Naye Mratibu wa Mradi huo kutoka Wizara ya Elimu, Sayansi na Teknolojia Dk.Noel Mbonde amesema vyuo hivyo vinne vimejikita katika masuala ya Teknolojia ya Habari(Tehama),Gesi asilia, Ngozi na masuala ya anga na mradi huo unakwenda kuongeza udahili wa wanafunzi katika fani hizo katika chuo cha NIT pamoja na ununuzi wa Ndege ya mafunzo.
Naye Mhadhiri wa Chuo cha DIT kampasi ya .Dar es salaam DK.Joseph Matiko amesema fedha hizo walizokabidhiwa ni kwa ajili ya kujenga miundombinu itakayoendana na kasi ya ukuaji wa teknolojia ya habari na mawasiliano chuoni hapo.
Alisema baada ya kukamilika kwa ujenzi wa miundombinu chuo kitakua na uwezo wa kuchukua wanafunzi 3500 kutoka Afrika Mashariki.
“Tutaboresha zaidi mitaala itakayoendana na kazi hiyo ya teknolojia na lengo kubwa la Mradi huu ni kuleta Mapinduzi katika elimu ya Ufundi Afrika Mashariki (EASTRIP).
Mwakilishi kutoka nchini Kenya,Nelson Gitau alisema mradi huo kwao utahakikisha elimu ya ufundi inakua juu na kwamba mtoto akitoka chuoni aweze kuingia moja kwa moja na kufanya kazi viwandani na hata kujiajiri mwenyewe.
Naye Mkuu wa kitengo cha Elimu kutoka Benki ya Dunia Dk.Xiaoyan Liang amesema lengo la kufadhili mradi huo ni kuhakikisha unawajengea uwezo vijana na kuzifanya nchi zinazotekeleza mradi huo zinakuwa uchumi imara kupitia viwanda.
Pia alisema mradi huo utawajengea uwezo wanafunzi kwa kuwa na ujuzi na kuwa wabunifu katika miradi mbalimbali ya maendeleo pamoja na kuwaongezea ujuzi.
Mkutano huu inayofanyika kwa siku nne unahusisha washiriki kutoka Kenya,Tanzania na Ethiopia nchi ambazo zinatekeleza awamu ya kwanza ya mradi na unaratibiwa na Shirikisho la Vyuo Vikuu vya Afrika Mashariki , Benki ya Dunia na Wizara ya Elimu.
Taarifa Ya Jeshi la Polisi Kwa Umma toka Mkoa wa Mbeya
KUPATIKANA NA MICHE YA BHANGI.
Mnamo tarehe 24.11.2019 majira ya saa 13:30 mchana huko Mtaa wa Majengo mapya tazara, Kata ya Iwambi, Tarafa ya Iyunga, Jijini Mbeya, Askari Polisi walimkamata PASCHAL ULEDI [31] kondakta wa daladala na mkazi wa Iwambi akiwa amepanda miche nane [8] ya bhangi nyumbani anapoishi. Mtuhumiwa ni mtumiaji wa bhangi.
KUPATIKANA NA POMBE YA MOSHI [GONGO]
Mnamo tarehe 24.11.2019 majira ya saa 13:30 mchana huko maeneo ya Mtaa wa Kagera, Kata ya Ilomba, Tarafa ya Iyunga, Jijini Mbeya. Askari Polisi walimkamata ROIDA IJANDE [60] mkazi wa Mama John akiwa na pombe haramu ya moshi lita ishirini [20]. Mtuhumiwa ni muuzaji na mtumiaji wa pombe hiyo.
KUPATIKANA NA POMBE HARAMU YA MOSHI [GONGO] NA BHANGI.
Mnamo tarehe 24.11.2019 saa 14:40 mchana huko Mtaa wa Mwatengule kwenye kilabu cha pombe za kienyeji kilichopo Kata ya Isyesye, Tarafa ya Sisimba, Jijini Mbeya. Askari Polisi walimkamata JANEPHA COSMAS [28] mkazi wa Isyesye akiwa na pombe haramu ya moshi kiasi cha lita moja na nusu ikiwa kwenye chupa ndogo ndogo 15 pamoja na bhangi uzito wa gram 280. Mtuhumiwa ni muuzaji na mtumiaji wa pombe haramu @ gongo na bhangi.
KUPATIKANA NA POMBE YA MOSHI [GONGO].
Mnamo tarehe 24.11.2019 majira ya saa 15:00 alasiri huko maeneo ya Airport ya zamani, Kata ya Iyela, Tarafa ya Iyunga, Jijini Mbeya. Askari Polisi walimkamata ENNY [65], mkazi wa Airport akiwa na pombe haramu ya moshi lita 5 kwenye kidumu cha lita tano. Mtuhumiwa ni muuzaji na mtumiaji wa pombe hiyo.
KUPATIKANA NA POMBE HARAMU YA MOSHI [GONGO].
Mnamo tarehe 24.11.2019 majira ya saa 15:05alasiri hadi saa 17:00 jioni umefanyika msako maeneo mbalimbali ya Kata za Iyela, Ruanda, Sinde, Maanga na Ilemi na katka msako huo wamekamatwa watuhumiwa wawili [02] kwa makosa ya kupatikana na gongo/bhangi ambao ni AMINA KABALE [42] mkazi wa Mtaa wa Ilembo akiwa na lita 02 za gongo na HASSAN NASSORO [25] mkazi wa Tunduma akiwa na bhangi gramu 10.
KUPATIKANA NA BHANGI.
Mnamo tarehe 24.11.2019 majira ya saa 14:30 mchana huko Uyole kwenye klabu cha pombe za kienyeji kiitwacho America, Kata ya Nsalaga, Tarafa ya Iyunga, Jijini Mbeya. Askari Polisi walimkamata MSAFIRI JACKSON [30] mkazi wa Nsalaga akiwa na bhangi gramu 10 kwenye mfuko wa suruali. Mtuhumiwa ni muuzaji na mtumiaji wa bhangi.
KUPATIKANA NA BHANGI.
Mnamo tarehe 24.11.2019 majira ya saa 14:30 mchana huko Uyole kwenye klabu cha pombe za kienyeji kiitwacho America kilichopo Kata ya Nsalaga, Tarafa ya Iyunga, Jijini Mbeya, Askari Polisi walimkamata AUGUSTINO MAHINYA [24] mkazi wa Nsalaga akiwa na bhangi gramu 10 kwenye mfuko wa suruali. Mtuhumiwa ni mtumiaji wa bhangi.
KUPATIKANA NA POMBE YA MOSHI [GONGO]
Mnamo tarehe 24.11.2019 majira ya saa 13:30 mchana huko Uyole kwenye klabu cha pombe za kienyeji kiitwacho shimoni kilichopo Kata ya Igawilo, Tarafa ya Iyunga, Jijini Mbeya. Askari Polisi walimkamata NAOMI SAID [43] mkazi wa Uyole ya kati akiwa na lita kumi [10] za gongo. Mtuhumiwa ni muuzaji na mtumiaji wa pombe hiyo.
KUPATIKANA NA POMBE YA MOSHI [GONGO]
Mnamo tarehe 24.11.2019 majira ya saa 13:40 mchana huko Uyole kwenye klabu cha pombe za kienyeji kiitwacho shimoni, kilichopo Kata ya Igawilo, Tarafa ya Iyunga, Jijini Mbeya. Askari Polisi walimkamata LAZACK MWAKABUNGU [61] mkazi wa Uyole ya kati akiwa na lita kumi na tano [15] za gongo. Mtuhumiwa ni muuzaji na mtumiaji wa pombe hiyo.
KUPATIKANA NA BHANGI.
Mnamo tarehe 24.11.2019 majira ya saa 16:00 jioni huko mtaa wa Mwasote, Kata ya Itezi, Tarafa ya Iyunga, Jijini Mbeya. Askari Polisi walimkamata RAHIM MABLUKI, [18] mkazi wa Nsalaga akiwa na bhangi uzito wa gram 25 kwenye mfuko wa suruali yake. Mtuhumiwa ni muuzaji na mtumaji wa bhangi.
Watuhumiwa watafikishwa Mahakamani mara baada ya upelelezi wa mashauri yao kukamilika.
Imetolewa na:
[ULRICH OMATEI – SACP]
KAMANDA WA POLISI MKOA WA MBEYA.
Rais Magufuli atoa shilingi Bilioni 10 kwa ajili ya ujenzi wa Makao Makuu ya Ulinzi wa Taifa
Mhe. Rais Magufuli ametoa fedha hizo tarehe 25 Novemba, 2019 baada ya kuweka jiwe la msingi la ujenzi wa mradi huo na ameagiza milima yote inayozunguka eneo la Makao Makuu ya Ulinzi wa Taifa lenye ukubwa wa ekari 5,567 imilikiwe na JWTZ kwa ajili ya shughuli za ulinzi.
Kuhusu madai ya fidia, Mhe. Rais Magufuli amemuagiza Mkurugenzi wa Jiji la Dodoma Bw. Godwin Kunambi kuwalipa fidia ya shilingi Bilioni 3 na Milioni 339 wananchi 1,500 wa Kata ya Kikombo ambao ardhi yao imechukuliwa na JWTZ kwa ajili ya Makao Makuu ya Ulinzi wa Taifa, kuanzia tarehe 01 Desemba, 2019.
Pamoja na agizo hilo, Mhe. Rais Magufuli amewatahadharisha wananchi wa Kikombo kujiepusha na matapeli wanaowahamasisha kudai fidia wasiyostahili kwa mujibu wa sheria ama kudai ardhi isiyo yao.
Mhe. Rais Magufuli pia ameiagiza Wizara ya Ujenzi, Uchukuzi na Mawasiliano kujenga kwa kiwango cha lami kilometa 18 za barabara inayounganisha Makao Makuu ya Ulinzi wa Taifa na barabara kuu ya Dodoma – Morogoro.
Aidha, Mhe. Rais Magufuli amekubali ombi la Mkuu wa Majeshi ya Ulinzi Jen. Venance Salvatory Mabeyo aliyeomba Serikali ibebeba jukumu la kulipa deni la takribani shilingi Trilioni 1 ambalo JWTZ inadaiwa baada ya kujengewa nyumba 6,064 za makazi ya Askari katika maeneo mbalimbali nchini, badala ya Askari kukatwa posho zao ili kupata fedha za kulipia deni hilo kama ilivyowekwa katika mkataba wa ujenzi.
“Nakuhakikishia hakuna kukatwa Askari yeyote, hilo deni litabebwa na Serikali, kabla sijaja hapa nimeshamwelekeza Waziri wa Fedha na Katibu Mkuu, na nafikiri kesho au keshokutwa wataanza kulipia hilo deni ambalo limeanza kuiva, tutaanza kulipa Dola za Marekani zaidi ya Milioni 25 (sawa na shilingi Bilioni 56 na Milioni 948). Mkataba ni kweli ulikosewa, nafikiri ilikuwa ni mwaka 2012/13 lakini siwezi kukubali makosa ya namna hiyo yakafanyika katika kipindi changu” amesema Mhe. Rais Magufuli.
Aidha, Mhe. Rais Magufuli amewapongeza Maafisa na Askari wa JWTZ kwa kazi nzuri ya kulinda mipaka ya nchi na kushiriki katika operesheni za kulinda amani katika Mataifa mbalimbali, majukumu ambayo yamelijengea heshima jeshi hilo na Tanzania.
Waziri wa Ulinzi na Jeshi la Kujenga Taifa Mhe. Dkt. Hussein Ali Mwinyi na Mkuu wa Majeshi ya Ulinzi Jen. Venance Salvatory Mabeyo wamemshukuru Mhe. Rais Magufuli kwa maelekezo yake ya kujengwa Makao Makuu ya Ulinzi wa Taifa katika eneo la Kikombo ambayo yanajengwa na jeshi lenyewe.
Mapema kabla ya kuweka jiwe la msingi la mradi huo, Mhe. Rais Magufuli ameweka jiwe la msingi la ujenzi wa uwanja wa maadhimisho ya kitaifa katika eneo la Chamwino.
Ujenzi wa uwanja huo utakamilika Januari 2020 ukiwa na uwezo wa kuchukua watu 5,000 kwa gharama ya shilingi Bilioni 2, na awamu ya pili itahusisha ujenzi wa ukumbi wa mikutano, jengo la watu mashuhuri na jengo la kupumzikia watu.
Gerson Msigwa
Mkurugenzi wa Mawasiliano ya Rais, IKULU
Chamwino
