FAMILIA YA WAZIRI MKOSI TUPU

...

INNOCENT-THE BLOGGER-BOY

Mussa Ntimizi.

Mwandishi Wetu

MIKOSI mikosi! Hakuna neno lingine sahihi zaidi ya hilo kufuatia watoto wawili wa aliyewahi kuwa waziri wa ardhi nyumba na maendeleo ya makazi katika serikali ya awamu ya tatu, Tatu Ntimizi, Mussa na nduguye, Said Ntimizi kwa nyakati zinazokaribiana kukumbwa na madai ya uhalifu yaliyowasababishia kufikishwa polisi na mahakamani.

Mussa ambaye ni Mwenyekiti wa Chama Cha Mapinduzi (CCM) Wilaya ya Uyui, Tabora, Juni 1, mwaka huu alipandishwa katika Mahakama ya Hakimu Mkazi Tabora kwa madai ya kumlawiti kijana mmoja muuza chipsi (jina linahifadhiwa), mkazi wa manispaa hiyo.

Mussa alifikishwa mbele ya Hakimu Jocktan Rushwera na kusomewa mashtaka hayo na Wakili wa Serikali, Juma Masanja ambaye alidai, mtuhumiwa huyo alitenda kosa hilo nyumbani kwake eneo la Bachu, Tabora.

Wakili Masanja aliieleza mahakama kuwa, Mussa alimrubuni kijana huyo kwa kumnunulia bia mbili kwenye baa moja ya mjini hapo na baada ya kulewa na kupoteza fahamu, alimpeleka nyumbani kwake eneo la Bachu na kumfanyia kitendo hicho.

Hata hivyo, mshtakiwa alikana kutenda kosa hilo na kesi yake ikapigwa kalenda hadi Juni 30, mwaka huu ambapo ilitarajiwa kusikilizwa tena.

Said Ntimizi.

Wakati kesi ya kaka mtu, yaani Mussa ilitarajiwa kusikilizwa Juni 30, Said (34) yeye, Juni hiyohiyo alishikiliwa na Jeshi la Polisi Mkoa wa Kinondoni jijini Dar kufuatia kifo cha aliyekuwa mmiliki wa Shule ya Awali na Msingi ya Mtakatifu Zion iliyopo Bahari Beach, Dar, Annah Mizighi Mwambili (47) ambaye Desemba, mwaka jana aliuawa na mwili wake kutupwa ndani ya shule yake hiyo.

Akizungumza na waandishi wa habari jijini Dar, Jumatatu iliyopita, Kamanda wa Polisi Kanda Maalum ya Dar es Salaam, Kamishina Suleiman Kova, alisema Said anashikiliwa na wenzake wawili, Daniel Mkilindi (25) na Erick Mziray (40) kwa madai ya kuhusika na mauaji hayo.

Habari ya Said, ukiacha vyombo vingine vya habari, pia iliandikwa kwenye gazeti ndugu na hili, Uwazi toleo la Jumanne iliyopita.

Baada ya habari hiyo kutoka, baadhi ya wasomaji wa Gazeti la Uwazi walipiga simu kwenye chumba cha habari na kusema ni dhahiri familia ya waziri Ntimizi imekumbwa na mikosi.

“Jamani, nimeisoma kwenye Gazeti la Uwazi hii habari ya mtoto wa Tatu Ntimizi, Said. Mimi ninavyojua huyu Said na Mussa aliyefikishwa Mahakama ya Tabora hivi karibuni akidaiwa kumlawiti muuza chipsi ni ndugu. Tena najua huyu Said alikuwa kwenye mkakati wa kugombea ubunge Jimbo la Igalula, Tabora.

“Hii ni mikosi jamani! Hata kama mahakama itawakuta hawana hatia lakini ni mikosi kwa familia ya waziri. Kaka anapata janga hili, mdogo mtu anapata janga lile. Tena kwa kipindi kifupi. Kama si mikosi ni nini sasa?” alihoji msomaji mmoja.