WIZARA YA MAMBO YA NJE YAWASHIRIKISHA WADAU KUHUSU FUNGAMANO LA KISIASA LA EAC

Wizara ya Mambo ya Nje na Ushirikiano wa Afrika Mashariki imeendelea kutoa elimu kwa umma kuhusu Rasimu ya Katiba ya Fungamano la Kisiasa la Jumuiya ya Afrika Mashariki (EAC), kwa kuwashirikisha wadau mbalimbali ili kuongeza uelewa na kuimarisha ushiriki wao katika hatua za kufikia fungamano hilo.

Zoezi hilo lililoendelea leo, Oktoba 27, 2026, limehusisha wawakilishi wa vyama vya siasa, jumuiya za wafanyabiashara, taasisi za dini, mashirika ya kiraia, makundi maalumu ya kijamii yakiwemo vijana, wanawake na watu wenye ulemavu, pamoja na taasisi za utafiti, uchambuzi wa sera na elimu ya juu.

Zoezi hilo lililozinduliwa rasmi Oktoba 26, 2026, linaongozwa na Mkurugenzi wa Siasa, Ulinzi na Usalama wa Wizara hiyo, Bi. Mwanamridu Amity Jumaa.

Ushirikishwaji wa wadau hao unalenga kuongeza uelewa kuhusu Rasimu ya Katiba ya Fungamano la Kisiasa la EAC na kutoa fursa kwa makundi mbalimbali kufahamu masuala yanayohusu mchakato huo.

Read More →

WAZIRI WA NISHATI AWASILI MTWARA KUTANGAZA UGUNDUZI WA GESI

 

MTWARA.

Waziri wa Nishati, Mhe. Dkt. Juma Zuveri Homera, yuko mkoani Mtwara leo, Octoba  27, 2026 kwa ziara rasmi ya kikazi yenye lengo kuu la kutangaza rasmi ugunduzi mkubwa wa gesi asilia uliofanyika mkoani humo, hatua inayotarajiwa kuleta mapinduzi makubwa ya kiuchumi kwa wananchi wa Mtwara, Lindi na Taifa kwa ujumla.

Katika ziara hiyo, Mhe. Dkt. Homera ameambatana na viongozi na wataalamu  akiwemo Mwenyekiti wa Kamati ya Kudumu ya Bunge ya Nishati na Madini, Mhe. Subira Mgalu pamoja na wajumbe wa kamati hiyo,  wengine ni Katibu Mkuu anayeshughulikia masuala ya Mafuta na Gesi Wizara ya Nishati,  Dkt. James Mataragio, Menejimenti ya Wizara ya Nishati, pamoja na viongozi wa Bodi ya TPDC na Mkurugenzi Mtendaji wa Shirika la Maendeleo ya Petroli Tanzania (TPDC).

Akiwa mkoani Mtwara, Mhe. Waziri ameanza ziara yake kwa kufanya ziara  na kutembelea Ofisi ya Mkuu wa Mkoa wa Mtwara, na kupokelewa na Mkuu wa Mkoa huo Mhe. Kanali Donald Msengi.

Ziara hii inatajwa kuwa ya kimkakati katika kuhakikisha miradi mikubwa ya nishati, hususan gesi asilia na LNG, inawanufaisha wananchi moja kwa moja huku ikichochea kasi ya uwekezaji wa viwanda mkoani humo.

Read More →

SERIKALI YALAANI UBAKAJI, YATOA WITO KWA WANANCHI KUTOKUINGILIA KESI ZA UKATILI

Na Jackline Minja, Dodoma

Serikali imelaani vikali vitendo vya ubakaji na ukatili wa kijinsia vinavyosababisha waathirika kupata mimba, huku ikiwataka wazazi, ndugu na wananchi kwa ujumla kutokuingilia mchakato wa kisheria katika kesi zinazohusu ubakaji na ulawiti, ili kuhakikisha waathirika wanapata haki na wahusika wanawajibishwa kwa mujibu wa sheria.

Akijibu swali la Mbunge wa Viti Maalum, Mhe. Hawa Mchafu Chakoma, kuhusu kauli ya Serikali juu ya matukio ya ubakaji yanayoendelea na kusababisha waathirika kupata mimba, Naibu Waziri wa Maendeleo ya Jamii, Jinsia, Wanawake na Makundi Maalum, Mhe. Mhandisi Maryprisca Mahundi, amesisitiza kuwa Serikali inaendelea kuimarisha utekelezaji wa sheria zinazolinda watoto dhidi ya vitendo vya ukatili, ikiwemo ubakaji na ulawiti.

Katika majibu ya Serikali, imeelezwa kuwa kuanzia Januari hadi Desemba 2025, jumla ya makosa 7,219 ya ubakaji yaliripotiwa na kushughulikiwa, hatua inayoonesha umuhimu wa kuendelea kuimarisha mikakati ya kukabiliana na vitendo hivyo na kuhakikisha waathirika wanapata huduma na ulinzi unaostahili.

Aidha, Serikali inaendelea kutoa elimu kwa umma kuhusu namna ya kujikinga na ukatili pamoja na kuimarisha mifumo ya utoaji huduma kwa waathirika kupitia Ofisi za Ustawi wa Jamii, Madawati ya Jinsia na Watoto ya Jeshi la Polisi na Ofisi za Serikali za Mitaa.

Katika hatua nyingine, Mhe. Mahundi amewasihi wazazi na ndugu kutokuingilia kesi za ubakaji na ulawiti zilizo katika vyombo vya sheria, ikiwemo kwa kuzuia utoaji wa ushahidi au kushinikiza hatua zinazoweza kuathiri mwenendo wa haki.

Serikali pia imewahimiza wananchi kutoa taarifa za vitendo vya ukatili na kushirikiana na vyombo vya dola katika kutoa ushahidi ili wahusika wawajibishwe. Wananchi wanaweza kutoa taarifa kupitia namba ya Dawati la Jinsia na Watoto la Jeshi la Polisi 0699 913200 au kupiga namba 116 wakati wote wanapohitaji kuripoti vitendo vya ukatili dhidi ya watoto.

Read More →

HAYA HAPA MAGAZETI YA LEO JUMANNE OKTOBA 27,2026

Magazetini Leo

Read More →

UJENZI WA BARABARA YA KAHAMA - KAKOLA KWA UWEZESHAJI WA MIGODI YA BARRICK-TWIGA WAFIKIA ASILIMIA 90

Waziri wa Ujenzi, Mhe. Masanja Kadogosa, akizungumza mwakilishi wa mkandarasi wa ujenzi wa Barabara ya Kahama–Bulyanhulu Jct–Kakola, M/s China Civil Engineering Construction Corporation (CCECC) Bw. Wang Lei (Mchina mwenye miwani) , kushoto kwa Waziri , Meneja wa TANROADS Mkoa wa Shinyanga, Mhandisi Ntuli Mwaikokesya, anayefuata ni Mbunge wa Jimbo la Msalala, Mabula Magangila na baadhi ya wahandisi wa Mkoa wa Shinyanga.

Waziri wa Ujenzi, Mhe. Masanja Kadogosa, akisoma ramani ya ujenzi wa barabara hiyo ya Kahama- Bulyanhulu Jct-Kakola wakati alipofanya ziara kwenye ujenzi wa barabara hiyo.

Waziri wa Ujenzi, Mhe. Masanja Kadogosa akizungumza wakati akitembelea ujenzi wa barabara ya Bulyanhulu Jct-Kakola.

Sehemu ya Barabara ya Kahama–Bulyanhulu Jct–Kakola

***

#Mkandarasi atakiwa kumaliza kazi mapema mwezi ujao.

Waziri wa Ujenzi, Mhe. Masanja Kadogosa, amemtaka Mkandarasi wa ujenzi wa Barabara ya Kahama–Bulyanhulu Jct–Kakola, M/s China Civil Engineering Construction Corporation (CCECC), kuongeza kasi ya utekelezaji wa mradi huo ili ukamilike kwa wakati mapema mwezi ujao kwa mujibu wa mkataba.

Mradi wa ujenzi wa barabara barabara hiyo kwa kiwango cha lami yenye kilomita 73 unatekelezwa kwa uwezeshaji wa migodi ya Barrick nchini inayoendeshwa kwa ubia na serikali kupitia kampuni ya Twiga ya Bulyanhulu na North Mara kwa gharama ya shilingi bilioni 101.2 na umeanza kutekelezwa mwaka juzi kwa usimamizi wa Wakala wa Barabara nchini (TANROADS).

Akiongea baada ya kutembelea barabara hiyo amemtaka mkandarasi kuongeza kasi ili barabara hiyo iweze kumalizika katika muda uliopangwa na kuwaondolea wananchi wanaotumia barabara hiyo kero ya usafiri sambamba na kuwanufaisha wananchi wanaotegemea kuitumia kwa usafirishaji wa bidhaa mbalimbali na kupanua wigo wa ufanyaji wa biashara na kukuza uchumi.

Waziri Kadogosa amesisitiza kuwa mkandarasi anatakiwa kukamilisha mradi huo kwa mujibu wa mkataba ifikapo Desemba 7, 2026, akionya kuwa Serikali itachukua hatua kali endapo atashindwa kutekeleza wajibu wake, ikiwemo kukata asilimia 0.1 ya thamani ya mkataba na kufuta kibali cha kampuni hiyo kutekeleza miradi ya aina hiyo nchini.

Akitoa taarifa ya maendeleo ya mradi huo, Meneja wa TANROADS Mkoa wa Shinyanga, Mhandisi Ntuli Mwaikokesya, amesema ujenzi wa barabara ya Kahama – Bulyanhulu Jct–Kakola wenye urefu wa kilomita 73 unagharimu Shilingi bilioni 100.6.

Amesema mradi huo ulipangwa kukamilika mwezi Septemba 2026, hata hivyo, kutokana na changamoto mbalimbali zilizojitokeza wakati wa utekelezaji, mkandarasi aliomba kuongezewa muda wa kukamilisha kazi na mpaka sasa kilomita 32 kati ya 73 zimekamilishwa kwa kuwekwa lami, huku kazi nyingine za ujenzi zikiendelea katika maeneo mbalimbali ya mradi.

Akizungumza wakati wa ukaguzi huo, Mbunge wa Jimbo la Msalala, Mhe. Mabula Magangila, amesema wananchi wamekuwa na uhitaji wa muda mrefu wa barabara hiyo, akibainisha kuwa kukamilika kwake kutachochea shughuli za kiuchumi katika eneo hilo.

Mwakilishi wa Mgodi wa Barrick ambao ndiyo wafadhili wa Ujenzi wa Barabara hiyo kwa asilimia 100, Mhandisi Ibrahim Paul ameunga mkono kauli ya Waziri Kadogosa kwa kumtaka mkandarasi kumaliza kazi kwa wakati kwa kuwa fedha za uwezeshaji zinatoka kwa wakati mkandarasa akihitaji kulipwa na kuwa Barrick inapenda kuona dhamira yake ya kuona wananchi wananufaika na mradi huo ikitimia.

Mhandisi Bw. Wang Lei kutoka kampuni ya CCECC inayojenga barabara hiyo ameahidi kuongeza juhudi na kufanya kazi usiku na mchana ili kuhakikisha mradi unakamilika ndani ya muda uliopangwa.

Kukamilika kwa barabara hii ambayo ilianza kujengwa mnamo mwezi Julai mwaka juzi kutafungua fursa za kiuchumi za madini, Kilimo, Misitu na Utalii katika mikoa ya Shinyanga, Geita, Tabora, Kagera na Kigoma.

Pamoja na Barabara hiyo kufungua fursa za kiuchumi za madini, kilimo, misitu na utalii katika mikoa ya Shinyanga, Geita, Tabora, Kagera na Kigoma mara baada ya kukamilika pia barabara hiyo ni muhimu katika shughuli za kiuchumi na kijamii kwa Mkoa wa Shinyanga hususani Manispaa ya Kahama ambako kuna mkusanyiko mkubwa wa Wasafirishaji wa mizigo kutoka bandari kuu ya Tanzania kwenda nchi za jirani za Rwanda na Uganda.

Mkakati endelevu wa kampuni ya Barrick ambayo inawezesha ujenzi huo unabainisha kuwa Uchimbaji madini ukifanyika kwa umahiri ni nguvu kubwa ya kuleta maendeleo na jamii zinazoishi kwenye maeneo ya shughuli zake zikipata mafanikio ni mafanikio yake pia.

Read More →