Saturday, 24 October 2026
Magazeti ya leo
DIWANI KANIKI ASIMAMISHA UJENZI WA MAGHOROFA MAWILI GOGO, ZINGIZIWA
Diwani wa Kata ya Zingiziwa, Cde Selemani Ayoub Kaniki, amesimamisha ujenzi wa majengo mawili kati ya matatu aliyoyakagua katika Mtaa wa Gogo, kufuatia malalamiko ya wananchi kuhusu ujenzi wa maghorofa yanayodaiwa kuwa chini ya kiwango.
Katika ziara hiyo, Diwani amebaini kuwa majengo hayo mawili ya makazi yana kasoro kubwa za ujenzi, hayana vibali vya ujenzi, wala vibali vinavyoruhusu ujenzi wa ghorofa.
Hatua hiyo imekuja baada ya kupokea malalamiko mbalimbali kutoka kwa wananchi wanaofika ofisini kwake kila Jumanne na Alhamisi.
WITO KWA WAHUSIKA
Diwani Kaniki amewataka wamiliki wa majengo hayo kufika Ofisi ya Kata siku ya Jumanne wakiwa na vibali vyao vya ujenzi ili kuhakiki uhalali wake na kupata mwongozo wa hatua zinazopaswa kufuatwa.
Aidha, amesisitiza umuhimu wa kuzingatia taratibu na viwango vya ujenzi ili kulinda maisha na mali za wananchi, akitolea mfano wa maafa yaliyotokana na kuporomoka kwa majengo katika eneo la Kariakoo.
Awali, Diwani alishirikiana na mainjinia kukagua baadhi ya majengo hayo, ambapo wataalamu walibaini mapungufu makubwa ya kiuhandisi.
Usalama wa wananchi ni kipaumbele. Kila ujenzi lazima uzingatie sheria, vibali na viwango vinavyotakiwa.
MAPENDEKEZO YA VIJANA YATAPOKELEWA KUBORESHA HUDUMA ZA AFYA, KUKABILIANA NA MIMBA ZA UTOTONI - PROF. SHEMDOE
Na: OWM–TAMISEMI, Arusha
Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amesema Serikali itapokea na kufanyia kazi mapendekezo ya vijana yanayolenga kuboresha huduma za afya ya msingi katika zahanati, vituo vya afya na hospitali za wilaya, kupitia mfumo wa Serikali wa kupanga mipango kwa kushirikisha wananchi wa Fursa na Vikwazo kwa Maendeleo (O&OD).
Prof. Shemdoe amesisitiza umuhimu wa kusikiliza maoni ya vijana akieleza kuwa asilimia 90 ya vijana hupata huduma za afya katika vituo vya afya ya msingi. Hata hivyo, vijana wenye umri wa miaka 10–24, ambao ni asilimia 31 ya Watanzania milioni 61, bado wanakabiliwa na changamoto za huduma za afya zisizo rafiki kwao, ikiwemo mimba na ndoa za utotoni.
Prof. Shemdoe amesema hayo Oktoba 23, 2026, jijini Arusha, wakati akifungua mjadala unaoongozwa na vijana wa Tanzania kuhusu afya ya uzazi na afya ya akili, ulioandaliwa na Jumuiya ya Afya ya Afrika Mashariki, Kati na Kusini (ECSA).
“Niwatake vijana kutumia siku hizi mbili vizuri na kuja na mapendekezo yanayotekelezeka, yenye muda maalumu wa utekelezaji, ili yapimwe na, pale inapowezekana, yaandaliwe mipango na bajeti kwa ajili ya utekelezaji,” ameeleza Prof. Shemdoe.
Aidha, Prof. Shemdoe amesema Mhe. Rais Dkt. Samia Suluhu Hassan amewekeza fedha nyingi katika ujenzi wa miundombinu ya afya ya msingi, hivyo amewataka vijana kuilinda ili iendelee kuhudumia wananchi na vizazi vijavyo.
Pia, amewahimiza kupata elimu ya afya ya mama na mtoto ili kumuunga mkono Rais kwa vitendo, akimtaja kuwa kinara wa afya ya mama na mtoto barani Afrika.
Kwa upande wake, Mkurugenzi Mkuu wa ECSA, Dkt. Ntuli Kapologwe, amesema vijana wenye umri chini ya miaka 24 katika nchi wanachama wa jumuiya hiyo ni asilimia 65. Ameeleza kuwa kuwawezesha kupata elimu ya afya ya akili na afya ya uzazi kutasaidia kupunguza vifo vya kina mama na watoto, pamoja na kuhamasisha wanawake kujifungulia katika vituo vya kutolea huduma za afya.
Naye, Mwakilishi wa Vijana wa Mtandao wa ECSA, Dkt. Kuduishe Kisowile, amesema sehemu kubwa ya vifo vya kina mama inahusishwa na mimba za utotoni na za vijana ambao hawajafikia umri unaofaa. Ameeleza kuwa vijana watashiriki kujadili namna ya kuzuia vifo hivyo na kuimarisha ushirikiano kati ya wizara mbalimbali katika kutokomeza mimba za utotoni.
Mkutano huo umewakutanisha vijana takribani 200 kutoka mikoa yote ya Tanzania Bara na Visiwani kwa lengo la kujadili afya ya uzazi kwa vijana, afya ya akili na utekelezaji wa afua mbalimbali zinazosimamiwa na Rais Dkt. Samia Suluhu Hassan, zikiwemo kuhakikisha hakuna mama anayejifungua nyumbani, kupunguza vifo vinavyotokana na uzazi na kuhakikisha kila mtoto au mtu mzima anayehitaji chanjo anaipata.
Friday, 23 October 2026
TBS YAPIGA KAMBI YA VIWANGO CLINIC JIJINI MWANZA
Shirika la Viwango Tanzania (TBS) limesogeza huduma karibu na wananchi jijini Mwanza kupitia kambi maalum ya Viwango Clinic, ili kufikisha elimu kuhusu ubora wa bidhaa mbalimbali za chakula na vipodozi.
Kambi hiyo ya siku tano imeanza Jumatatu Oktoba 19, 2026 hadi Ijumaa Oktoba 23, 2025 inafanyika katika eneo la Soko Kuu jijini Mwanza, ikilenga pia kutoa elimu ya usajili wa majengo ya bidhaa za chakula na vipodozi.
Meneja wa TBS Kanda ya Ziwa Mashariki, Happy Brown amesema kupitia kambi hiyo, wananchi na wafanyabiashara wamepata elimu na huduma mbalimbali kama vile uthibitishaji ubora wa bidhaa zinazozalishwa ndani na nje ya nchi.
“Tumesogeza huduma karibu kwa sababu eneo hili lina wafanyabiashara wengi ambapo katika kliniki hii tunatoa pia huduma ya usajili wa bidhaa za chakula na vipodozi, usajili wa maduka, stoo na magari yanayosambaza bidhaa hizo” amesema Brown.
Ameongeza kuwa matarajio ya TBS ni kuona kliniki hiyo ikiongeza tija kwa wafanyabiashara na wananchi ambao kupitia elimu hiyo wataweza kutambua bidhaa zenye ubora na hivyo kuepuka madhara ya kutumia bidhaa zisizo na ubora na ambazo hazijasajiliwa.
Brown pia ametumia fursa hiyo kuwakaribisha wananchi na wafanyabiashara jijini Mwanza, kufika katika kliniki hiyo kupata elimu na huduma mbalimbali ikiwemo jinsi ya kupata vibali na nembo ya ubora wa TBS katika bidhaa wanazozalisha.
Nao baadhi ya wananchi wakiwemo wafanyabiashara wa bidhaa za chakula na vipodozi jijini Mwanza, wamesema kliniki hiyo imewasaidia kupata huduma papo kwa hapo na hivyo kuepuka adha ya kutumia muda mrefu kwenda ofisini.
