HAYA HAPA MAGAZETI YA LEO JUMANNE DESEMBA 3, 2024

 

Read More →

TPA YATWAA TUZO YA MWAJIRI BORA WA MWAKA KWENYE SEKTA YA UMMA

Mamlaka ya Usimamizi wa Bandari Tanzania (TPA) imetwaa kwa mara ya tatu mfululizo Tuzo ya Mwajiri bora wa mwaka kwenye Sekta ya Umma katika halfa ya Usiku wa Tuzo kwa Mwajiri bora kwa mwaka 2024, uliofanyika mwishoni mwa Juma Jijiji Dar es Salaam.

Katika utoaji huo wa Tuzo ambapo Mgeni Rasmi alikuwa Naibu Waziri Mkuu na Waziri wa Nishati Mhe. Dkt. Doto Biteko aliyemwakilisha Makamu wa Rais wa Jamhuri ya Muungano wa Tanzania Mhe. Dkt. Phillip Mpango.

TPA Imetwaa jumla ya Tuzo Tano ambazo ni Tuzo ya mshindi wa kwanza Mwajiri bora wa mwaka kwenye Sekta ya Umma, Tuzo ya Mwajiri Bora Mzawa (Local Employer Award) mshindi wa kwanza, tuzo ya mshindi wa pili wa Jumla sekta zote (2nd Runners -up award), tuzo ya wanaofanya vizuri zaidi ( Club of best perfomers), tuzo ya mwanachama wa ATE kwa muda mrefu kwa Taasisi za Umma wa mwaka 2024 na tuzo ya Mwajiri bora wa Ndani ya Nchi.

Tuzo hizi hufanyika kila mwaka na Kuandaliwa na Chama cha Waajiri Tanzania (ATE) kwa ajili ya Waajiri wa Sekta za Umma na Binafsi ambao wamefanya vizuri zaidi katika mwaka husika.

Read More →

WENYE ULEMAVU KUPATIWA MAFUNZO YA UONGOZI

Na Dotto Kwilasa,Dodoma

Shirika la Abilis Foundation lenye makao yake makuu nchini Ufaransa limefadhili Mradi wa Kuimarisha Uongozi kwa Watu Wenye Ulemavu utakaotekelezwa na Taasisi ya Foundation for Disabilities Hope inayoendesha shughuli zake Dodoma.

Hayo yameelezwa Jijini Dodoma na Mkurugenzi wa Foundation For Disabilities Hope, Michael Salali wakati akizungumza na waandishi wa habari ambapo amesema kuwa mradi huo unaogharimu shilingi milioni 40 za Tanzania unalenga kuwafikia watu 300 wenye ulemavu katika wilaya ya Kondoa.

Amesema mradi huo utawalenga wanawake na wasichana kwa kuwajengea uwezo katika uongozi na ujasiriamali ili kuwa na jamii yenye mtazamo chanya wa mabadiliko ya kuwapa nguvu wanawake na watu wenye ulemavu kwenye nafasi za kutoa maamuzi.

Ametaja gharama za mradi huo kuwa ni shilingi milioni 40 ambapo ameeleza kuwa kwa jumla, mradi huo utaleta mabadiliko ya kipekee katika wilaya ya Kondoa kwa kuimarisha haki za binadamu na kutoa fursa sawa kwa watu wenye ulemavu kushiriki kikamilifu katika jamii na uongozi.

"Taasisi yetu inatamani kuona jamii inaimarika na kuwa na mtazamo chanya wenye matumaini kwa wenye ulemavu,mradi huu utaongeza uelewa na kuhamasisha jamii ya Kondoa kuhusu uwezo wa watu wenye ulemavu na jinsi wanavyoweza kuwa viongozi bora, hivyo kutengeneza mazingira bora kwa ushirikiano wa watu wote, "amesema.

Ameeleza kuwa mradi huo utakuza maendeleo ya kiuchumi kwa watu wenye ulemavu na kufafanua kuwa watakapokuwa na uongozi imara, wataweza kuleta mabadiliko chanya katika jamii zao, hasa katika maeneo ya kiuchumi, na kuboresha hali ya maisha ya watu wenye ulemavu na jamii kwa ujumla.

"Watu wenye ulemavu watapata nafasi ya kuwa viongozi wa mfano kwa jamii zao, na kuwaonyesha wengine kwamba ulemavu haukupi kikwazo cha kufikia malengo ya juu katika maisha, " amesema

Salali ametaja faida zitakazotokana na Mradi huo kuwa ni pamoja na kuongeza ushiriki wa watu wenye ulemavu katika uongozi ambapo mradi utasaidia watu wenye ulemavu kushiriki katika nafasi za uongozi, hasa katika ngazi za kijamii na kisiasa, na hivyo kuboresha uwakilishi wao katika jamii.

Faida nyingine ni kuboresha usawa wa kijamii kwa kuwezesha watu wenye ulemavu kushika nafasi za uongozi ambapo mradi utachangia kupunguza ubaguzi na kuhamasisha jamii kuhusu haki na usawa kwa watu wote, bila kujali hali zao za ulemavu.

"Tunatajaria mengi zaidi kupitia huu mradi ikiwemo kuongeza uwezo na ujuzi,mradi utatoa mafunzo na rasilimali muhimu kwa watu wenye ulemavu, kuwapa ujuzi wa uongozi, mawasiliano, na usimamizi wa miradi, hivyo kuwajengea uwezo wa kujiongoza na kusaidia wengine, "amesema.

Kwa mujibu wa Msemaji wa Foundation for Disabilities Hope Furaha William,amesema kwa kuanza mradi huo utaanza kutekelezwa Wilayani Kondoa na kueleza sababu za kuichagua wilaya hiyo kuwa imekuwa ikisahaulika katika miradi mingi ya maendeleo.

"Mradi huu unatarajiwa kuwa chachu ya mabadiliko ya kijamii kwa kuimarisha ushiriki wa watu wenye ulemavu na wanawake katika uongozi, " ameeleza

Pamoja na mambo mengine ameeleza kuwa utekelezaji wa mradi huo utahamasisha na kuchochea zaidi ushirikiano wa makundi mbalimbali kati ya taasisi za Serikali, mashirika yasiyo ya kiserikali, na wadau wengine ili kuboresha mazingira kwa watu wenye ulemavu, hivyo kuleta manufaa kwa jamii nzima.

“Mradi huu umekuja kwa wakati muafaka, hasa baada ya uchaguzi mdogo na kuelekea uchaguzi mkuu,tunataka kuwajengea uwezo watu wenye ulemavu kujitokeza kuchagua na kugombea nafasi mbalimbali za uongozi bila kujihisi wanyonge,” amesema na kuongeza;

Tunataka kuonyesha kuwa wanawake wenye Ulemavu wanaweza kutoa maamuzi makubwa,tunaye role model wetu Rais Samia Suluhu Hassan,wote tunamtazama kama kiongozi na mfano mzuri wa uongozi bora,” amesema Furaha

Read More →

MAAMBUKIZI YA VVU YAPUNGUA NCHINI TANZANIA-WAZIRI MHAGAMA

 

Leo ni tarehe 1 Desemba 2024, ambapo dunia inaadhimisha Siku ya UKIMWI Duniani. Kitaifa, maadhimisho haya yamefanyika Mkoani Ruvuma yakiongozwa na mgeni rasmi, Makamu wa Rais wa Jamhuri ya Muungano wa Tanzania, Mhe.  Dkt. Philip Mpango.

Akitoa taarifa yake, Waziri wa Afya nchini, Mheshimiwa Jenista Mhagama, ameeleza juhudi za serikali katika mapambano dhidi ya ugonjwa wa UKIMWI. 

Amesema, Serikali imeendelea kugharamia dawa za kufubaza makali ya virusi vya UKIMWI (ARVs), hatua inayosaidia wananchi wanaoishi na maambukizi ya virusi hivyo kuendelea na maisha ya kawaida.

Kwa mujibu wa takwimu zilizotolewa, wananchi takriban milioni 1.7 wanaishi na maambukizi ya virusi vya UKIMWI nchini. 

Serikali imetumia shilingi bilioni 750 kununua dawa za ARVs, ambapo gharama ya matibabu kwa kila mgonjwa mmoja ni takriban shilingi 400,000 kwa mwaka.

"Maadhimisho haya ni fursa muhimu ya kuongeza uelewa kuhusu ugonjwa wa UKIMWI na kupunguza unyanyapaa" amesema Mhe. Jenister

Pamoja na hayo  amehimiza jamii kuchukua hatua za kinga na matibabu kwa ushirikiano wa karibu na wadau mbalimbali. 

Kaulimbiu ya mwaka huu inalenga kuimarisha mshikamano wa kidunia katika kukomesha maambukizi mapya na kuboresha huduma kwa walioathirika.

Read More →

DKT.MPANGO -MKAKATI WA SERIKALI NI KUTOKOMEZA MAAMBUKIZI YA VIRUSI VYA UKIMWI NCHINI

 

 

Siku ya Ukimwi Duniani, Imeadhimishwa Kitaifa leo tarehe 01/12/2024, maadhimisho yamefanyika katika Uwanja wa Majimaji, Manispaa ya Songea, mkoani Ruvuma. 

Hafla hii imeongozwa na Makamu wa Rais wa Jamhuri ya Muungano wa Tanzania, Dkt. Philip Mpango, ambaye amesisitiza azma ya serikali kuhakikisha inatokomeza maambukizi ya Virusi vya UKIMWI (VVU) nchini.

Katika hotuba yake, Mhe. Dkt. Mpango, ameonesha dhamira ya dhati ya Serikali inayoongozwa na Rais Dkt. Samia Suluhu Hassan katika kupambana na maambukizi mapya ya VVU.

Takwimu zinaonesha kwamba vijana, hasa wa kike, wako katika hatari kubwa ya kuambukizwa. Kwa mujibu wa Makamu wa Rais, serikali imeweka mkazo mkubwa katika kutoa elimu kwa vijana ili kuwasaidia kujitambua, kuchukua hatua za kujikinga, na kwa wale wanaoishi na VVU, kuhakikisha wanafuata taratibu kwa kutumia dawa za kupunguza makali ya virusi (ARVs).

Aidha, Mhe. Dkt. Mpango ametoa wito kwa jamii nzima kushirikiana, kuhakikisha kwamba maambukizi mapya yanapungua, kwa kuelimisha vijana kuhusu umuhimu wa afya ya uzazi, matumizi sahihi ya kinga, na upimaji wa afya mara kwa mara.

Read More →

WANAWAKE NYAMAGANA WAPATA MAJIKO YA NISHATI SAFI KUPITIA KAMPENI YA SIKU 16 DHIDI YA UKATILI WA KIJINSIA YA BARRICK NA WASHIRIKA WAKE

Baadhi ya wanufaika katika picha ya pamoja na mgeni rasmi

Mkuu wa Wilaya ya Nyamagana Amina Makilagi akiongea katika hafla hiyo

Makamu Mkuu wa wa chuo cha SAUT Prof. Costa Ricky Mahalu akiongea katika hafla hiyo

Wanufaika wakifuatilia matukio katika hafla hiyo

Wanufaika wakifuatilia matukio katika hafla hiyo

***

Ukiwa ni mwendelezo wa kushiriki kampeni ya siku 16 dhidi ya vitendo vya kupinga ukatili wa kijinsia inayoendelea mama lishe wa kata mbalimbali za wilayani Nyamagana mkoani Mwanza wamepatiwa majiko 100 ya nishati safi kutoka Barrick na Taifa gas kwa ajili ya kuwapunguzia adha ya matumizi ya nishati isiyo rafiki kwa mazingira ya mkaa na kuni.

Katika maadhimisho hayo yanayoendelea Barrick na washirika wake wanaendesha shughuli mbalimbali za kutoa elimu ya vitendo vya ukatili wa kijinsia sambamba na kutoa mafunzo ya matumizi na nishati safi za kupikia na kugawa majiko ya gesi.

Washirika wa Barrick katika maadhimisho ya mwaka huu ni Jeshi la Polisi kupitia madawati ya kijinsia, Halmashauri za wilaya,mashirika yasiyo ya kiserikali ya VSO, LCF, Jadra, Hope for the Girls and Women (HGWT) , kampuni ya wanasheria ya Bowman na kampuni ya uzalishaji na usambazaji nishati ya gesi nchini ya Taifa Gas.

Akiongea katika hafla ya kukabidhi majiko hayo iliyofanyika katika ukumbi wa Chuo Kikuu cha Mtakatifu Augustino (SAUT) jijini Mwanza Mkuu wa Wilaya ya Nyamagana Amina Makilagi ambaye alikuwa mgeni rasmi ametumia fursa hiyo kuwakumbusha wanawake kufanya shughuli mbalimbali za mikono ili kujiingia kipato kwa kuwa mtu akiwa na kipato anaondokana na utegemezi unaopelekea kunyanyasika kwenye jamii.

Amewashukuru wadau wanaoshirikiana na Barrick katika maadhimisho ya kupinga vitendo vya ukatili wa kijinsia mwaka huu kwa kutoa majiko ya nishati safi ili kutunza mazingira na kuwafanya mama lishe kufanya shughuli zao kwa urahisi na kufanikisha ajenda ya Serikali ya awamu ya sita inayoongozwa na Rais Samia Suluhu Hassan kupiga vita mabadiliko ya tabia nchi na uchafufuzi wa mazingira.

Awali akimkaribisha Mkuu wa Wilaya ya Nyamagana, Makamu Mkuu wa wa chuo cha SAUT, Prof. Costa Ricky Mahalu, amesema changamoto ya unyanyasaji wa kijinsia ni kubwa katika jamii yetu ambapo tatizo hilo linaathiri ustawi wa wanawake katika nyanja mbalimbli za maisha yao.

"Unyanyasaji huu una athari si tu kwa waathirika pia kwa jamii kwani inakwamisha wanawake kutimiza malengo yao na inakuwa ni kikwazo cha maendeleo endelevu", amesema Prof. Mahalu.

Mmoja wa wanufaika wa msaada huo Happiness Kalebe ambaye ni mama lishe wa soko la Mkolani akiongea kwa niaba ya wenzake amesema jiko hilo linakwenda kumuongezea tija katika upishi wake wa chakula na kuhudumia wateja wake.

"Kwa kutumia jiko hili litanifanya nisinunue kuni kwa ajili ya kupikia ambapo nitajiongezea kipato, kipindi cha mvua kama hiki kuna wakati tunanunua kuni zikiwa zimenyeshewa wakati wa kusafirishwa na kutusumbua wakati wa kupika, nawashukuru Barrick na Taifa Gas kwa kututhamini sisi wanawake", amesema Kalebe.

Mbali na kutoa majiko ya gesi na kutoa mafunzo ya matumizi ya nishati safi ya kupikia kampeni ya washirika hawa inaendelea kwa kutoa elimu dhidi ya vitendo vya ukatili wa kijisia na kutoa ushauri wa kisheria katika wilaya ya Tarime mkoani Mara.

Read More →

WADAU SEKTA YA UKARIMU NA UTALII WAASWA KUSHIRIKIANA NA VETA KUBORESHA UTOAJI MAFUNZO

Wadau wa Sekta ya Ukarimu na Utalii wameaswa kushirikiana na Mamlaka ya Elimu na Mafunzo ya Ufundi Stadi (VETA) ili kuboresha utoaji huduma katika sekta hiyo.

Ushauri huo umetolewa Mkuu wa Wilaya ya Bahi, Mhe. Rebecca Nsemwa, kwa niaba ya Mkuu wa Mkoa wa Dodoma, Mhe. Rosemary Senyamule, tarehe 29 Novemba,2024 wakati akifungua Kongamano la Wadau wa Sekta ya Ukarimu na Utalii mkoani Dodoma.

Kongamano hilo lililoandaliwa na Ofisi ya VETA Kanda ya Kati kwa kushirikiana na chuo cha VETA Dodoma, lilikuwa na lengo la kuwakutanisha wadau wa sekta ya ukarimu na utalii na chuo cha VETA Dodoma ili kujadili na kutafuta ufumbuzi wa changamoto zinazoikabili sekta hiyo.

Nsemwa amesema Dodoma, ikiwa ni kitovu cha shughuli za Serikali sasa inakua kwa kasi kubwa kiuchumi na kijamii, ambapo ukuaji huo unaibua fursa nyingi katika sekta mbalimbali, mojawapo ikiwa ni Sekta ya Ukarimu na Utalii.

“Sote ni mashahidi kuwa hoteli na nyumba za kulala wageni zinaendelea kujengwa sambamba na uhitaji wa huduma nyingine kama chakula, vinywaji na kumbi za mikutano nao ukiongezeka. Kwa hivyo, uendeshaji wa shughuli hizo unawategemea ninyi wadau wa sekta ya Ukarimu na Utalii,” amesema.

Mkurugenzi Mkuu wa VETA, CPA. Anthony Kasore, amewaomba washiriki wa kongamano hilo kujadili na kutoa maoni kwa uwazi kuhusu huduma na mafunzo yanayotolewa na VETA na namna kushirikiana katika kuboresha utoaji mafunzo na huduma kwa ujumla.

Amesema, uboreshaji wa huduma katika Sekta ya Ukarimu na Utalii utasaidia kukuza utalii na kuunga mkono juhudi za Mhe. Dkt. Samia Suluhu Hassan, Rais wa Jamhuri ya Muungano wa Tanzania katika kutangaza utalii kama alivyofanya kupitia Sinema yake ya Royal Tour, iliyotangaza na kuhamasisha utalii.

Ameongeza kuwa ushirikiano wa VETA na wadau kutoka sehemu za kazi katika mafunzo utasaidia kukuza umahiri wa wanafunzi na hatimaye kupata wahitimu wenye stadi bora ambao watatoa huduma zenye kiwango cha kimataifa katika sekta ya ukarimu na utalii.

Mkurugenzi wa VETA Kanda ya Kati, Ramadhan Mataka ametoa rai kwa wadau wa ukarimu na utalii kushirikiana na VETA Dodoma katika kutafuta fursa za kibiashara pamoja na kutatua changamoto zinazolalamikiwa katika sekta hiyo.

Amesema, angefurahi kuona wadau wa sekta ya utalii wanabadilishana uzoefu na VETA katika kuwanoa vijana wanaohudumia wageni wanaoingia na kutoka katika jiji la Dodoma.

“Tungependa kuona meneja wa hoteli fulani anakuja kuwafundisha wanafunzi wa ukarimu na utalii, vivyo hivyo Mwalimu wa ukarimu kutoka VETA anaenda kuwafundisha watoa huduma hotelini”, Mataka amesema.

Kongamano hilo liliwahusisha wadau zaidi ya 100 kutoka Sekta ya Ukarimu na Utalii wakiwemo watoa huduma za Hoteli, kumbi za sherehe na mikutano, mama lishe, watoa huduma za vinywaji na waokaji.

Read More →

SERIKALI YATAKA MAFANIKIO SEKTA YA MAJI YALINDWE

 

Utendaji kazi wa kiwango cha juu wa Rais Samia Suluhu Hassan, umewezesha eneo kubwa la nchi kuwa na uhakika wa kupata maji safi na salama kwa mijini na vijijini hali iliyoifanya Serikali kutaka mafanikio hayo yalindwe.

Ikumbukwe kuwa  hadi kufikia Februari 2024, hali ya upatikanaji wa huduma ya maji safi na salama katika maeneo ya vijijini ilifikia asilimia 79.6 ikilinganishwa na asilimia 77 Februari, 2023.

Kwa upande wa mijini upatikanaji wa maji umefikia asilimia 90 ikilinganishwa na asilimia 88 Februari 2023.

Mafanikio hayo ni makubwa na ndio yamempa nguvu Kaibu Mkuu Wizara ya Maji Mhandisi Mwajuma Waziri kuwataka watumishi wa Sekta ya Maji kuhakikisha wanalinda mafanikio yaliyofikiwa katika utekelezaji wa majukumu ya sekta hiyo.

Mhandisi Mwajuma ametoa agizo hilo katika kikao chake na watumishi wa Wizara hiyo jijini  Dodoma.

Ikumbukwe kuwa Serikali ya Rais Samia, kupitia Wizara ya Maji, imeweka malengo makubwa ya kuhakikisha kunakuwa na upatikanaji wa uhakika wa maji safi na salama kwa wananchi wote nchini. 

Malengo haya ni sehemu ya juhudi za kufikia Dira ya Maendeleo ya mwaka 2025 na Malengo ya Maendeleo Endelevu (SDGs).

Kwa mujibu wa mpango wa serikali ni kuhakikisha huduma ya maji safi na salama inawafikiwa asilimia 95% ya wakazi wa mijini ifikapo mwaka 2025.

Kwa upande wa wananchi wa Vijijini asilimia 85 wawe wanapata huduma ya maji safi na salama ifikapo mwaka 2025.

Malengo hayo yanategemewa kufanikishwa na miradi mbalimbali kama Programu ya Maendeleo ya Sekta ya Maji (WSDP), ambayo inalenga kuboresha miundombinu ya maji na kuongeza upatikanaji wa maji vijijini na mijini. 

Serikali pia inashirikiana na sekta binafsi na mashirika ya kimataifa ili kufanikisha malengo haya.

Read More →