BENKI YA CRDB YAKABIDHI VITI NA MEZA KWA AJILI YA WANAFUNZI SHULE YA SEKONDARI MAMA SAMIA KAHAMA

Meneja  Biashara wa Benki ya CRDB Kanda ya Magharibi, Jumanne Wagana (kushoto) akimkabidhi meza Katibu Tawala wilaya ya Kahama, Timothy Ndanya kwa ajili ya wanafunzi katika shule ya Sekondari Mama Samia iliyopo katika Manispaa ya Kahama. Meza hiyo ni sehemu ya meza 62 na viti 62 vilivyotolewa na Benki ya CRDB kwa ajili ya shule hiyo iliyoanzishwa mwaka 2021. 

Na Kadama Malunde - Malunde 1 blog

Benki ya CRDB imekabidhi viti 62 na meza 62 kwa ajili ya wanafunzi wa Shule ya Sekondari Mama Samia iliyopo katika mtaa wa Sokola kata ya Majengo Manispaa ya Kahama mkoani Shinyanga ikiwa ni sehemu ya mkakati wake wa kuwezesha wanafunzi kusoma katika mazingira bora.

Hafla fupi ya makabidhiano imefanyika leo Jumanne Septemba 27,2022 katika shule hiyo ambapo Mgeni rasmi alikuwa Katibu Tawala wilaya ya Kahama, Timothy Ndanya kwa niaba ya Mkuu wa wilaya ya Kahama, Festo Kiswaga.

Akizungumza wakati wa kukabidhi viti na meza hizo, Meneja Biashara Benki ya CRDB Kanda ya Magharibi, Jumanne Wagana amesema benki hiyo ni mdau mkubwa wa elimu na imekuwa ikitoa misaada mbalimbali katika shule ili kuwezesha wanafunzi kusoma katika mazingira bora.

"Leo tunakabidhi meza 62 na viti 62 kwa ajili ya wanafunzi wa shule ya Sekondari Mama Samia ikiwa ni sehemu ya utamaduni wa benki ya CRDB kushirikiana na serikali kutatua changamoto zilizopo katika sekta ya elimu. Tutaendelea kushirikiana na serikali kutatua changamoto zilizopo", amesema Wagana.

"Sisi Benki ya CRDB kama Benki inayoongoza nchini Tanzania tunaamini suala la elimu ni la kila mtu, tunaomba wadau mbalimbali wajitokeze kusaidia mahitaji yaliyopo katika shule zetu kwani serikali pekee haiwezi kumaliza changamoto zote", ameongeza.

Katika hatua nyingine Wagana ametumia futsa hiyo kuwaomba wananchi kuchangamkia fursa mbalimbali zinazotolewa na Benki ya CRDB ikiwemo mikopo yenye riba nafuu kwa wakulima na watumishi pamoja na kufungua akaunti zikiwemo akaunti kwa ajili ya watoto 'Junior Jumbo Account' na Malkia Account kwa ajili ya wanawake.

"Sisi CRDB tunajitahidi kuwezesha watoto wasome katika mazingira bora na tutaendelea kuboresha sera zetu. Benki ya CRDB ni mahali salama, tuna akaunti za kila aina, karibuni mtuunge mkono kwenye benki hii ya Watanzania", ameeleza Wagana.

Kwa upande wake, Meneja wa Benki ya CRDB tawi la Kahama, Evodi Kareti na Meneja Rasilimaliwatu Benki ya CRDB, Benjamini Ngaiwa wamewataka wanafunzi hao kusoma kwa bidii na kuepuka vishawishi vinavyoweza kusababisha washindwe kumaliza masomo hivyo kutotimiza ndoto zao na kwamba Benki ya CRDB itaendelea kutoa michango mbalimbali katika sekta ya elimu.

Akizungumza wakati wa kupokea viti na meza hizo, Katibu Tawala Wilaya ya Kahama, Timothy Ndanya ameishukuru Benki ya CRDB kwa namna inavyoendelea kushirikiana na serikali kutatua changamoto katika sekta ya elimu huku akibainisha kuwa viti na meza hizo zitasaidia wanafunzi hao kusoma katika mazingira bora.

"Tunawashukuru benki ya CRDB kwa kuendelea kutushika mkono, naomba mtunze viti na meza hizi pamoja na miundombinu mingine ya shule", amesema Ndanya.

Aidha amewashukuru wananchi wakiwemo wafanyabiashara kufungua akaunti katika benki ya CRDB kwani benki ikipata wateja wengi itapata faida na kurudisha faida hiyo kwa wananchi.

Ndanya ameipongeza shule ya sekondari Mama Samia kwa kutokuwa na rekodi ya mimba kwa wanafunzi hivyo kuwataka wanafunzi hao kujitunza na kujiheshimu na kuachana na vishawishi vinavyoweza kukatisha ndoto zao.

Diwani wa kata ya Majengo, Benard Mahongo ameishukuru benki ya CRDB kwa kuendelea kuendelea kuisaidia shule hiyo na kuomba wasichoke kusaidia kwani bado shule hiyo ina uhaba wa vyoo hivyo kuomba benki ichangie nondo kwa ajili ya ujenzi wa jengo la utawala ambalo lina sehemu ya choo ili kuondokana na hali iliyopo sasa ambapo walimu na wanafunzi wanatumia choo kimoja.

Awali akizungumza, Mkuu wa Shule ya Sekondari Mama Samia, Joyce Thomas Jewe ameishukuru Benki ya CRDB kutatua changamoto ya uhitaji wa viti na meza katika shule hiyo changa iliyoanzishwa Tarehe 05.05.2021 ambayo sasa ina jumla ya wanafunzi 547 kati yao wasichana ni 267 na wavulana ni 284 ikiwa na walimu 15 kati yao wa kiume ni wawili na wa kike 13.

"Kutokana na uchanga wa shule hii tunakabiliwa na changamoto mbalimbali ikiwemo ukosefu wa mashine ya kuzalishia mitihani ya majaribio (Photocopy Mashine) na wamekwama kumalizia boma la jengo la utawala kwa kukosa nondo,kokoto na mifuko ya saruji ili pindi ujenzi utakapokamilika shule ipate mahali salama pa kutunzia nyaraka muhimu",amesema.

Meneja  Biashara wa Benki ya CRDB Kanda ya Magharibi, Jumanne Wagana (kushoto) akimkabidhi meza Katibu Tawala wilaya ya Kahama, Timothy Ndanya kwa ajili ya wanafunzi katika shule ya Sekondari Mama Samia iliyopo katika Manispaa ya Kahama. Meza hiyo ni sehemu ya meza 62 na viti 62 vilivyotolewa na Benki ya CRDB kwa ajili ya shule hiyo iliyoanzishwa mwaka 2021.  Picha na Kadama Malunde - Malunde 1 blog

Meneja  Biashara wa Benki ya CRDB Kanda ya Magharibi, Jumanne Wagana (kushoto) akimkabidhi  kiti Katibu Tawala wilaya ya Kahama, Timothy Ndanya kwa ajili ya wanafunzi katika shule ya Sekondari Mama Samia iliyopo katika Manispaa ya Kahama. Kiti hicho ni sehemu ya meza 62 na viti 62 vilivyotolewa na Benki ya CRDB kwa ajili ya shule hiyo iliyoanzishwa mwaka 2021.

Meneja  Biashara wa Benki ya CRDB Kanda ya Magharibi, Jumanne Wagana (kushoto) akimkabidhi kiti Katibu Tawala wilaya ya Kahama, Timothy Ndanya kwa ajili ya wanafunzi katika shule ya Sekondari Mama Samia iliyopo katika Manispaa ya Kahama. Kiti hicho ni sehemu ya meza 62 na viti 62 vilivyotolewa na Benki ya CRDB kwa ajili ya shule hiyo iliyoanzishwa mwaka 2021.

Meneja  Biashara wa Benki ya CRDB Kanda ya Magharibi, Jumanne Wagana na Katibu Tawala wilaya ya Kahama, Timothy Ndanya  na viongozi mbalimbali pamoja na wanafunzi wakipiga picha wakati wa hafla fupi ya makabidhiano ya meza 62 na viti 62 vilivyotolewa na Benki ya CRDB kwa ajili ya shule ya Sekondari Mama Samia iliyoanzishwa mwaka 2021.

Muonekano wa sehemu ya meza 62 na viti 62 vilivyotolewa na Benki ya CRDB kwa ajili ya shule ya Sekondari Mama Samia iliyoanzishwa mwaka 2021.

Muonekano wa sehemu ya meza 62 na viti 62 vilivyotolewa na Benki ya CRDB kwa ajili ya shule ya Sekondari Mama Samia iliyoanzishwa mwaka 2021.

Katibu Tawala wilaya ya Kahama, Timothy Ndanya akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Katibu Tawala wilaya ya Kahama, Timothy Ndanya akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Meneja  Biashara wa Benki ya CRDB Kanda ya Magharibi, Jumanne Wagana akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Meneja  Biashara wa Benki ya CRDB Kanda ya Magharibi, Jumanne Wagana akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Meneja Rasilimaliwatu Benki ya CRDB, Benjamini Ngaiwa akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Meneja wa Benki ya CRDB Tawi la Kahama, Evodi Kareti akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Diwani wa kata ya Majengo Manispaa ya Kahama, Benard Mahongo akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Mkuu wa shule ya Sekondari Mama Samia , Joyce Thomas Jewe akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Afisa Elimu Manispaa ya Kahama, Anastazia Vicent akizungumza wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia iliyoanzishwa mwaka 2021.

Wanafunzi wa shule ya sekondari Mama Samia wakifuatilia nasaha mbalimbali wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia 

Wanafunzi wa shule ya sekondari Mama Samia wakifuatilia nasaha mbalimbali wakati Benki ya CRDB ikikabidhi meza 62 na viti 62 kwa ajili ya shule ya Sekondari Mama Samia 

Meneja wa Benki ya CRDB Tawi la Kahama, Evodi Kareti akizungumza na Wanafunzi wa shule ya sekondari Mama Samia

Awali vijana wa Skauti wakimpokea mgeni rasmi Katibu Tawala wilaya ya Kahama, Timothy Ndanya akiwasili katika shule ya sekondari Mama Samia

Wafanyakazi wa Benki ya CRDB wakifurahia jambo na wanafunzi wa shule ya Sekondari Mama Samia.

Picha zote na Kadama Malunde - Malunde 1 blog

Read More →

BENKI YA LETSHEGO YAZINDUA HUDUMA MPYA KWA AJILI YA WAJASIRIAMALI NA WASTAAFU

Mkuu wa Kitengo cha mauzo Benki ya Letshego Leah Phili akizungumza na Waandishi wa habari wakati akitangaza huduma mpya mbili za akaunti ya Benki hiyo ambazo ni Akaunti ya Mjasiriamali na Akaunti ya Mstaafu Leo Jumanne Septemba 27 Makao Makuu ya Benki hiyo Jijini Dar es Salaam. Meneja wa Kitengo cha masoko Benki ya Letshego Uswege Mwaipyana akizungumza na Waandishi wa habari wakati akitangaza huduma mpya mbili za akaunti ya Benki hiyo ambazo ni Akaunti ya Mjasiriamali na Akaunti ya Mstaafu Leo Jumanne Septemba 27 Makao Makuu ya Benki hiyo Jijini Dar es Salaam.

************************

Benki ya Biashara ya Letshego ambayo ipo Sokoni tangu mwaka 2016 leo Jumanne Septemba 27, 2022 imetangaza kuzindua huduma mpya mbili za akaunti ambazo ni akaunti kwaajili ya wajasiriamali wadogo na wa kati ( Mjasiriamali Account) na akaunti ya Wastaafu ( Mstaafu account)

Akizungumza na Waandishi wa habari leo Septemba 27 Jijini Dar es Salaam Mkuu wa Kitengo cha mauzo Benki ya Letshego Leah Phili amesema huduma ya akaunti ya wajasiriamali ni kwaajili ya wajasiriamali wadogo na wa kati ambayo itakua inawawezesha kuweka akiba zao wakiwa na malengo maalumu kwenye Biashara zao .

Amebainisha kuwa huduma hiyo imelenga hadi wajasiriamali wadogo na wa chini kabisa ambao hawana nyaraka kama vile leseni na namba ya utambulisho ya mlipa kodi (Tin namba).

Ameongeza kuwa katika huduma hii ya akaunti ya Mjasiriamali wameondoa baadhi ya vitu ambavyo vitamfanya mteja ashindwe kupata huduma nzuri za kiakaunti ambapo amebainisha kuwa mteja anaweza kufungua akaunti ya Mjasiriamali kwa shilingi elfu moja(1000) ya kitanzania kwa kuanzia.

" Unaweza kufungua akaunti kwa shilingi 1000 na kutoa pesa hadi kiwango cha shilingi elfu kwa njia mbalimbali kama vile dirishani katika matawi ya Benki zetu, mifumo ya Kidigitali ambayo mteja anaweza akafanya miamala yake " amesema Leah

Kwa upande wa akaunti ya Mstaafu Leah amesema walengwa ni wastaafu ambao wanaweza kufungua akaunti wakati wowote wakati wanajiandaa kustaafu na baada ya kustaafu.

Ameongeza kuwa sifa kubwa ya akaunti ya mstaafu ni kwamba haina makato ya mwezi ni akaunti ya bure na inahudumiwa bure na mstaafu anaweza kuweka kuanziaa elfu moja na kutoa hadi shilingi elfu moja.

Read More →

SAMIA SCHOLARSHIP KUANZA RASMI KWA WAHITIMU WENYE UFAULU WA JUU MITIHANI YA KIDATO CHA SITA TAHASUSI ZA SAYANSI

Waziri wa Elimu, Sayansi na Teknolojia Prof.Adolf Mkenda..

Baadhi ya wadau wa  Elimu waliohudhuria  kwenye kikao maalum cha Menejimenti ya Wizara ya elimu nchini Jijini Dodoma .

Na Dotto Kwilasa,DODOMA

WIZARA ya Elimu, Sayansi na Teknolojia imetangaza rasmi kuanza kwa programu ya ufadhili wa masomo iitwayo 'SAMIA SCHOLARSHIP' utakaosaidia kuchochea ari kwa wanafunzi kuongeza bidii kwenye  masomo ya Sayansi utagharamia kwa asilimia mia moja (100%) masomo ya Chuo Kikuu hapa nchini.

 

Waziri wa Elimu, Sayansi na Teknolojia Prof.Adolf Mkenda ameeleza hayo leo Sept 27,2022 Jijini hapa kwenye kikao maalum cha Menejimenti ya Wizara na wadau wa elimu na kueleza kuwa ufadhili huo ni mpya hapa nchini .

Amesema ufadhili  huo utahusisha

 masomo ya shahada ya kwanza kwa wanafunzi waliopata ufaulu wa juu katika mitihani ya Kidato cha Sita mwaka 2022 iliyoendeshwa na Baraza la Mitihani la Tanzania (NECTA) katika Tahasusi za Sayansi (PCB, PCM, PGM, CBG, CBA, PMC na CBN).

"SAMIA SCHOLARSHIP itagharamia kwa asilimia mia moja (100%) masomo ya Chuo Kikuu kwa wanafunzi hao ambao wamepata udahili katika fani za Teknolojia, Uhandisi, Hisabati na Tiba,"amesema.  

Akieleza sifa za kupata ufadhili huo Waziri Mkenda amesema utatolewa kwa wahitimu wa kidato cha sita  wenye sifa za uraia halali,ufaulu wa juu kwenye mitihani ya taifa ya kidato cha sita mwaka 2022 iliyoendeshwa na NECTA katika tahasusi za sayansi ikiwa ni pamoja  na kupata udahili katika programu za Sayansi, Teknolojia, Uhandisi, Hisabati au Tiba katika Chuo Kikuu hapa nchini kinachotambuliwa na Serikali.

"Sifa hizi lazima ziwe ambazo zimetajwa katika kundi la kwanza (Cluster 1) katika Mwongozo wa utoaji mikopo wa Bodi ya Mikopo ya Wanafunzi wa Elimu ya Juu kwa mwaka 2022/2023 unaopatikana kupitia www.heslb.go,tz  ambapo mwanafunzi sharti awe ameomba ufadhili kwa usahihi kwa njia iliyoelekezwa,"amefafanua Waziri Mkenda. 

Sambamba na hayo ameyataja maeneo ya ufadhili huo kuwa yatazingatia viwango na miongozo ya Bodi ya Mikopo ya Elimu ya Juu kugharamia ada ya mafunzo,posho ya chakula na malazi,posho ya Vitabu na viandikwa,mahitaji Maalum ya vitivo na mafunzo kwa vitendo.

Maeneo mengine ni utafiti wa vifaa saidizi kwa wanafunzi wenye mahitaji maalumu na bima ya Afya ambapo muda wa ufadhili kwa watakaofadhiliwa, watagharamiwa kati ya miaka mitatu (03) hadi mitano (05) kulingana na programu husika walizodahiliwa.

Prof.Mkenda ameeleza pia taratibu za kuomba ya ufadhili wa Samia Scholarship kuwa yatapaswa kuwasilishwa kwenye Bodi ya Mikopo ya Wanafunzi wa Elimu ya Juu kwa njia ya mtandao https://ift.tt/3RuzYsB kwa siku 14 kuanzia Septemba 28, 2022.

Ametaja masharti ya ufadhili huo kuwa Mwanafunzi atakaepata ufadhili wa SAMIA SCHOLARSHIP atawajibika kuzingatia kusoma, kuelewa na kusaini Mkataba wa Makubaliano ya Ufadhili wa Masomo kati yake na Wizara ya Elimu, Sayansi na Teknolojia na kuwa na akaunti ya Benki kwa ajili ya fedha atakazolipwa moja kwa moja.

"Mnufaika hataruhusiwa kubadilisha programu ya masomo aliyopatia ufadhili bila barua ya idhini ya maandishi kutoka Wizara ya Elimu, Sayansi na Teknolojia,mnufaika hataruhusiwa kuahirisha masomo, isipokuwa kwa sababu za kiafya, na kuthibitishwa na chuo husika,ikiwa mnufaika ataghairi fursa ya ufadhili kabla ya kuanza masomo, atapaswa kuwasilisha taarifa ya maandishi kwenda kwa Katibu Mkuu,Wizara ya Elimu, Sayansi na Teknolojia,Mji wa Serikali Eneo la Mtumba ,"Amesema

Katika hatua nyingine Waziri Mkenda amesema uchambuzi huo wa wanufaika 640 wa SAMIA SCHOLARSHIP umezingatia uwiano wa Wasichana 244 na asilimia 38% na Wavulana ni 396 sawa na asilimia 62% na kwamba Wanafunzi kutoka shule za serikali ni 396 sawa na asilimia 62% wakati Wanafunzi kutoka shule za binafsi ni 244 sawa na asilimia 38%.

Amefafanua kuwa Wanafunzi wenye ufaulu wa juu kiwango cha Alama tatu (3) ni 60 (9%)Wanafunzi kutoka  shule za Tanzania Visiwani ni 43 (7%)Wanafunzi kutoka shule za Tanzania Bara 597 (93%)Aidha jumla ya wanafunzi 11 wenye mahitaji maalumu watanufaika na Samia Scholarship.

Read More →

UFADHILI WA TEA KATIKA UJENZI WA MABWENI WACHANGIA UFAULU WA WANAFUNZI.

Waziri wa Nchi Ofisi ya Rais, Tawala za Mikoa na Serikali za Mitaa, Mhe. Innocent Bashungwa leo tarehe 27 Septemba, 2022 amefungua rasmi mabweni mawili yaliyojengwa kwa ufadhili wa Mfuko wa Elimu wa Taifa unaosimamiwa na Mamlaka ya Elimu Tanzania (TEA) kwa ajili ya wanafunzi wa kike wa shule ya Sekondari ya Kainam ya Mbulu mkoani Manyara.

Akifungua mabweni hayo, Mhe. Bashungwa ameipongeza TEA kwa kazi nzuri wanayofanya katika kuboresha miundombinu ya elimu nchini ikiwa ni pamoja na ujenzi wa mabweni hayo.

Awali akizungumza kuhusu mradi huo, Kaimu Mwalimu Mkuu wa Shule ya Sekondari Kainam, Bw. Atnasi Massay amesema mradi huo umesaidia wanafunzi kufanya vizuri kwani umewaepusha na vishawishi kwa kuishi katika mazingira ya utulivu.

“Kupitia mradi huu wa mabweni watoto wetu wamepata fursa ya kusoma na kupata utulivu na taaluma ya shule yetu imekuwa kwa maana sasa ni ya kwanza katika Halmshauri ya Mji wa Mbulu kitaaluma kwa matokeo ya mtihani wa kitaifa wa kidato cha nne na cha pili mwaka 2020 na 2021” anasema mwalimu huyo ambaye ameipongeza Serikali kwa kufadhili miradi hiyo.

Kwa upande wake Meneja Miradi wa TEA, Masozi Nyirenda amesema TEA kupitia Mfuko wa Elimu wa Taifa imetumia kiasi cha Sh. Bilioni 1.39 katika miradi mbali mbali katika mkoa wa Manyara katika kipindi cha miaka mitano kuanzia mwaka 2015/2016 - 2019/2020.

Read More →

TBS YATOA MAFUNZO KWA WADAU WA ZAO LA MUHOGO MKOA WA LINDI NA MTWARA

Meneja wa Utafiti na Mafunzo Bw.Hamis Sudi Mwanasala akizungumza na washiriki wa mafunzo kwa wajasiriamali ambao ni wazalishaji, wasindikaji, wakulima na wauzaji wa bidhaa za muhogo kutoka wilayani Newala mkoani Mtwara. 

Washiriki wa mafunzo kwa wajasiriamali ambao ni wazalishaji, wasindikaji na wauzaji wa bidhaa za muhogo wilayani Masasi mkoani Mtwara. 

Washiriki wa mafunzo kwa wajasiriamali ambao ni wazalishaji, wasindikaji na wauzaji wa bidhaa za muhogo wilayani Nachingwea mkoani Lindi. 

Meneja wa Kanda ya Kusini Bi. Amina Yassin akizungumza na washiriki wa mafunzo kwa wajasiriamali ambao ni wazalishaji,wasindikaji na wauzaji wa bidhaa za muhogo kutoka wilayani Masasi. 

Washiriki wa mafunzo kwa wajasiriamali ambao ni wazalishaji,wasindikaji na wauzaji wa bidhaa za muhogo kutoka wilayani Mtama mkoani Lindi. 

*************** 

Na Mwandishi Wetu 

WAJASIRIAMALI ambao ni wazalishaji, wasindikaji na wauzaji wa bidhaa za muhogo katika wilaya nne za Nachingwea, Masasi, Mtama na Newala katika Mikoa ya Lindi na Mtwara wametakiwa kuzalisha bidhaa hizo kwa kuzingatia viwango ili kuziwezesha kushindana katika masoko ya ndani, kikanda na kimataifa. 

"Mkijibidisha na kuzalisha muhogo wa kutosha na kusindika muhogo wenye ubora, mtaweza kufanikisha adhima ya Serikali ya kuendeleza viwanda na kutoa ajira kwa kada mbalimbali pamoja na kuwezesha bidhaa kushindana." 

Wito huo ulitolewa kwa nyakati tofauti na Meneja wa Utafiti na Mafunzo wa Shirika la Viwango Tanzania (TBS) Hamisi Sudi, wakati akieleza washiriki wa mafunzo umuhimu wa mafunzo hayo kwa washiriki hao wa wilaya hizo nne. 

Sudi aliwataka wajasiriamali hao kujibidisha na kuzalisha muhogo wa kutosha kwa kuzingatia viwango, ubora na usalama ili kulinda afya ya mlaji na kujenga uchumi wa Taifa kwa ujumla. 

"Pia huu ni uthibitisho wa nia ya Serikali kupitia taasisi zake katika kufanikisha malengo ya Taifa letu ya ujenzi wa uchumi kupitia uwekezaji katika viwanda,"alisema Sudi. 

Kwa upande wake Meneja wa TBS Kanda ya Kusini, Amina Yassin, aliwataka washiriki wa mafunzo hayo kutambua kwamba azma ya Serikali ni kukuza viwanda ili Taifa liweze kujitosheleza kwenye uzalishaji wa bidhaa mbalimbali. 

"Hivyo tukijibidisha kuzalisha muhogo wa kutosha na kusindika muhogo wenye ubora tutaweza kufanikisha adhima hii," alisema Yassin na kuongeza; 

"Hivyo nawasihi tuendelee kuzalisha muhogo na bidhaa za muhogo kwa kuzingatia viwango." Miongoni mwa mada zilizotolewa kwenye mafunzo hayo ni viwango na faida zake, matakwa ya kiwango cha muhogo, kanuni bora za kilimo cha muhogo, kanuni bora za usindikaji, kanuni bora za afya na teknolojia za usindikaji wa bidhaa za muhogo. 

Nyingine ni vifungashio na ufungashaji wa bidhaa muhogo na bidhaa za muhogo, huduma kutoka dawati la Ofisi ya Maendeleo ya Jamii, usajili wa biashara, Utaratibu wa udhibitishaji ubora wa bidhaa na usajili wa majengo na bidhaa za chakula. 

Mada hizo zilitolewa na maofisa wa TBS, SIDO na TAMISEMI. Baada ya mafunzo hayo kulikuwa na fursa kwa washiriki waliokuwa tayaru kutembelewa ili kupewa mafunzo zaidi na ushauri katika maeneo yao ya usindikaji. 

Mafunzo hayo yaliwalenga wajasiriamali ambao ni wazalishaji, wasindikaji na wauzaji wa bidhaa za muhogo ambao tayari ziko kwenye soko, lakini hazijathibitishwa na TBS katika wilaya hizo nne.

Read More →

NAIBU WAZIRI KATAMBI ATOA MAAGIZO KWA WAAJIRI NA VIONGOZI WA MATAWI TUGHE

Naibu Waziri Ofisi ya Waziri Mkuu ,Kazi ,Vijana,Ajira na Watu Wenye Ulemavu Mhe Probas Katambi akizungumza kwenye kikao cha Tughe.

Wajumbe wakiwa kwenye kikao.

Wajumbe wakiwa kwenye kikao.

Kikao kikiendelea.

Kikao kikiendelea

Na Mwandishi wetu, MWANZA

Naibu Waziri ofisi ya Waziri Mkuu ,Kazi ,Vijana,Ajira na Watu Wenye Ulemavu Mhe Probass Katambi amewataka Viongozi wa matawi Tughe kuhakikisha wanatoa Elimu juu ya mafao kwa watumishi wastaafu kabla ya kustaafu.

Mhe. Katambi ameyasema hayo jijini Mwanza alipokuwa akifungua semina ya waajiri na viongozi wa matawi ya TUGHE iliyolenga kuondoa changamoto zisizo na tija mahala pa kazi.

Katambi alisema kuwa changamoto za wastaafu nyingi zinazotokea baada ya kustaafu serikalini, zinatokana na uelewa mdogo pamoja na uwajibikaji duni.

Katika ufunguzi wa semina hiyo,Naibu Waziri pia ameingeza kuwa Mwajiri asipoitisha vikao vya baraza la wafanyakazi kwa mujibu wa sheria TUGHE, wizara ipatiwe taarifa ili ifuatilie na kubaini sababu ya ukiukwaji huo.

“Nawashangaa sana wanao hujumu mahala pa kazi wakijua wanaikomoa serikali hapana ni wanahatarisha nafasi zao za ajira,sioni sababu za kuvujisha siri za ofisi kinachotakiwa ni kufanya kazi kwa uzalendo mkubwa kwajili ya taifa letu”. Aliongeza Mhe. Katambi.

Aidha Waziri aliwaagiza kuwa mafunzo watayopata wayatumie ipasavyo katika kuendesha mabaraza ya wafanyakazi yenye tija.

“Hakikisheni mnashauri ipasavyo waajiri wenu ili kuondoa tabia ya ukiukaji wa sheria na kanuni zinazounda mabaraza ya wafanyakazi , kila taasisi ya umma iwe na Baraza la wafanyakazi linalofanya vikao vyake kwa mujibu wa sheria”. Amesema Mhe. Katambi.

Sambamba na hayo Naibu waziri Katambi amewapongeza Viongozi wa matawi Tughe kwa kuitisha semina hiyo kwani jambo hilo litakuwa na tija na masilahi mapana kwa serikali na taasisi zote .

“Kwa yale mtakayo kubaliana hapa na kuyajadili kwa pamoja yatatusaidia sana kutika kutafuta fursa Zaidi na kubadilisha changamoto kuwa fursa, haki na wajibu wa mwajiri uko upande pia ya mwajiriwa haki ya mwajiri ni wajibu wa mwajiriwa na wajibu wa mwajiriwa ni haki ya mwajiri”. Amesema Waziri Katambi.

Read More →

HAYA HAPA MAGAZETI YA LEO JUMANNE SEPTEMBA 27,2022

Magazetini leo Jumanne September 27,2022

Read More →

PROF. MKENDA ATAKA MABORESHO YA MITAALA YA ELIMU KUENDANA NA KASI YA MABADILIKO YA SEKTA HIYO

Waziri wa Elimu, Sayansi na Teknolojia Prof. Adolf Mkenda

Na Dotto Kwilasa, DODOMA.

SERIKALI kupitia Wizara ya Elimu, Sayansi na Teknolojia  imewataka wadau wa elimu nchini wanaoshiriki katika kikao maalum cha Menejiment ya wizara na wadau wa elimu kutoa maoni ya kuboresha sera na mitaala ya Elimu ili kuendana na kasi ya mabadiliko ya sekta hiyo muhimu Duniani.

Waziri mwenye dhamana ya Elimu nchini Prof. Adolf Mkenda amesema hayo wakati akizungumza leo jijini Dodoma na  kusema kuwa kikao hicho ni kutekeleza Agizo la Rais wa Jamhuri ya Muungano wa Tanzania Samia Suluhu Hassani.

Amefafanua kuwa agizo hilo alilitoa  Mnamo Tarehe 22 Aprili 2022 Bungeni ambapo alitaka kufanyike marekebisho ya sera ya Elimu ya mwaka 2014 pamoja na mitaala iliyopo kwa maslahi ya Taifa na Watu wake.

Prof. Mkenda amesema kuwa huwezi kuzungumzia ubora wa elimu bila kufanya mageuzi na mabadiliko katika sera na mitaala ili kuendana na kasi ya maendeleo ya Dunia kwani kwa sasa taaluma na ujuzi zinakwenda sambamba.

"Tunapokwenda kufanya mageuzi ya elimu ni lazima twende na adhma ya Mhe. Rais aliyeagiza kuwa mbali tu na kujikita katika elimu ya taaluma tujikite pia katika Ujuzi hivyo ni lazima tuhakikishe tunatoa mawazo ambayo itasaidia kuboresha elimu yetu sio kushusha ubora,"amesema Prof. Mkenda.

Na kuongeza kuwa "Suala la elimu sio la Tanzania peke yake ni la kidunia hivyo lazima tufanye mageuzi ili kuendani na kasi ya mabadiliko katika sekta ya elimu duniani,"amesema.

Kwa upande wake Naibu Waziri wa Elimu na Mafunzo ya Amali Zanzibar Ali Abdugulam Hussein amesema vijana lazima waandaliwe kitalamu na kiubunifu ili waweze kulitetea Taifa kimaendeleo na kushindana kimasoko.

Pia Mhe. Ali Abdugulam Hussein amesema kuwa swala la sera na mitaala ya elimu ndio kila kitu katika maboresho ya elimu hivyo kukifanyika makosa katika mapitiao haya yanaweza kulipoteza taifa.

"Sera na mitaala ni vyanzo muhimu katika elimu ya nchi yeyote duniani hivyo niwaombe washiriki wa kikao hiki maalum mtoe mawazo huku mkijua kuwa michango yenu ndio itakayokuja na sera na mitaala madhubuti,"amesema Mhe. Ali Abdugulam Hussein.

Dhima ya sera mpya na mitaala ya Elimu nchini ni kuinua ubora wa Elimu na Mafunzo na Kuweka Mifumo na Taratibu zitakazowezesha Kupata idadi Kubwa ya Watanzania walioelimika na wanaopenda kujielimisha zaidi ili waweze kuchangia katika kufikisha Malengo ya Maendeleo ya Taifa.

Waziri wa Elimu, Sayansi na Teknolojia Prof. Adolf Mkenda

Read More →

WASIOJULIKANA WAUA MLINZI NA KUIBA MCHELE MASHINENI DIDIA - SHINYANGA

Mfano wa mchele

Na Kadama Malunde - Malunde 1 blog

Mwanaume aliyejulikana kwa jina la Jofrey Justine (45) anadaiwa kuuawa kwa kunyongwa na watu wasiojulikana wakati akiendelea na kazi ya ulinzi katika mashine ya kusaga na kukoboa nafaka katika kitongoji cha Majengo kijiji cha Didia kata ya Didia wilaya ya Shinyanga mkoani Shinyanga.

Watu hao pia waliiba mchele kilo 500 wenye thamani ya shilingi Milioni moja na laki 2.

Kwa mujibu wa mashuhuda waliozungumza na Malunde 1 blog, tukio hilo limetokea usiku wa kuamkia Jumamosi Septemba 24,2022 ambapo pamoja na kufanya mauaji hayo watu hao wasiojulikana waliondoka na kilo 500 za mchele na kutokomea kusikojulikana.

Akielezea kuhusu tukio hilo, Mwenyekiti wa Kijiji cha Didia Mrisho Hamad amesema mlinzi huyo ambaye ni mwenyeji wa Karagwe mkoani Kagera alikutwa ameuawa siku ya Jumamosi asubuhi.

“Nilipigiwa simu majira ya saa 2 asubuhi nikaambiwa kuna mtu amefariki dunia kwenye Mashine ya mzee Richard. Nilifika eneo la tukio tukakuta mwili wa marehemu umelazwa nyuma ya mashine. Hatukuona majeraha ila tuliona tu damu kidogo mdomoni”,ameeleza Mwenyekiti huyo wa kijiji akizungumza na Malunde 1 blog

“Kwenye hiyo mashine tukaona kuna sehemu ilikuwa imetobolewa na kubaini kuwa kuna upotefu wa magunia matano ya mchele yenye kilo 100. Nikawapigia simu polisi wakaja, wakauchukua mwili wa marehemu”,ameongeza Hamad.

Kamanda wa Jeshi la Polisi Mkoa wa Shinyanga ACP, Janeth Magomi amethibitisha kutokea kwa tukio hilo na kueleza kuwa wanaendelea kufanya upelelezi ili kuwabaini watu waliohusika kwenye tukio hilo la mauaji na wizi wa mchele kilo 500.

Read More →