WAZIRI SANGU AZINDUA MSIMU WA SEMINA ZA WASTAAFU WATARAJIWA WA PSSSF

Waziri wa Nchi, Ofisi ya Waziri Mkuu – Kazi, Ajira na Mahusiano, Deus Sangu, akizungumza kwenye Semina ya Maandalizi ya Kustaafu alipofanya ufunguzi wa Semina hiyo katika ukumbi Ukumbi wa Jjegoen Park Sumbawanga Mkoani Rukwa, Leo tarehe 12 Octoba 2026

Mkurugenzi wa Rasilimaliwatu na Utawala, Bw. Paul Kijazi akizungumza wakati wa ufunguzi Semina ya Maandalizi ya Kustaafu katika ukumbi wa Jjaggoen Park Sumbawanga Mkoani Rukwa, Leo tarehe 12 Octoba 2026.

Mkurugenzi wa Uendeshaji wa Mfuko, Bw Hajji Khamis na Mkurugenzi wa Rasilimaliwatu na Utawala, Bw. Paul Kijazi wakiendelea na utambulisho na utambuzi katika Semina ya Maandalizi ya Kustaafu katika ukumbi wa Jjaggoen Park Sumbawanga Mkoani Rukwa, Leo tarehe 12 Octoba 2026.

Meneja wa Pensheni wa Mfuko Bw. Victor Kikoti akitoa mada wakati wa Semina ya Maandalizi ya Kustaafu iliyofanyika katika ukumbi wa Jjaggoen Park Sumbawanga Mkoani Rukwa, Leo tarehe 12 Octoba 2026.

Afisa Matekelezo wa Mfuko wa PSSSF Bw. Frank Fute wakitoa mada wakati wa Semina ya Maandalizi ya Kustaafu iliyofanyika katika ukumbi wa Jjaggoen Park Sumbawanga Mkoani Rukwa, Leo tarehe 12 Octoba 2026.

Afisa uwekezaji wa Mfuko, Bw. Filbert Francis Bagenda akitoa Mada wakati wa Semina ya Maandalizi ya Kustaafu iliyofanyika katika ukumbi wa Jjaggoen Park Sumbawanga Mkoani Rukwa, Leo tarehe 12 Octoba 2026.

Mstaafu mtarajiwa Bw. Mohamed Suleiman Lugoya akiuliza swali wakati wa Semina ya Maandalizi ya Kustaafu iliyofanyika katika Ukumbi wa Jjegoen Park Sumbawanga Mkoani Rukwa, Leo tarehe 12 Octoba 2026

Mstaafu mtarajiwa Bi. Anthonia Amando Ndasi akiuliza swali na kuchangia Mada wakati wa Semina ya Maandalizi ya Kustaafu iliyofanyika katika Ukumbi wa Jjegoen Park Sumbawanga Mkoani Rukwa, Leo tarehe 12 Octoba 2026.
Mkuu wa Mkoa wa Rukwa, Mhe. Makongoro Nyerere kwenye picha ya pamoja na Viongozi wa Mfuko wa PSSSF walipotembelea Ofisi ya Mkuu wa Mkoa

Na Mwandishi Wetu, Sumbawanga

Sumbawanga, Oktoba 12, 2026

Waziri wa Nchi, Ofisi ya Waziri Mkuu – Kazi, Ajira na Mahusiano, Mhe. Deus Sangu, ameipongeza Serikali ya Awamu ya Sita inayoongozwa na Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuimarisha mifuko ya hifadhi ya jamii na kuboresha utoaji wa huduma kwa wanachama na wastaafu, hususan katika ulipaji wa mafao kwa wakati.

Mhe. Sangu ameyasema hayo Oktoba 12, 2026, mjini Sumbawanga, mkoani Rukwa, wakati akizindua msimu wa semina za kuwaandaa wastaafu watarajiwa wa Mfuko wa Hifadhi ya Jamii kwa Watumishi wa Umma (PSSSF) kwa kipindi cha mwaka 2026/2028.

Akizungumza katika uzinduzi huo, Waziri Sangu amesema mafanikio yaliyopatikana katika kuimarisha mifuko ya hifadhi ya jamii ni pamoja na ulipaji wa mafao kwa wakati, kuendelea kulipa madeni ya mifuko hiyo nao kuboresha kiwango cha chini cha pensheni kwa wastaafu.

“Kwa kweli tuna kila sababu ya kumpongeza Rais wetu kwa kuhakikisha mifuko ya hifadhi ya jamii ikiwemo PSSSF inaimarika. Hivi sasa mafao yanalipwa kwa wakati, Serikali inaendelea kulipa madeni yake kwa mifuko ya hifadhi ya jamii, pensheni za kila mwezi zinalipwa kwa wakati, na kiwango cha chini cha pensheni kimeboreshwa. Hakika, hayo ni mafanikio makubwa ya Serikali ya Awamu ya Sita,” amesema Mhe. Sangu.

Ameongeza kuwa, kiwango cha chini cha pensheni kwa wastaafu kimefikia Shilingi 250,000 kwa mwezi, akieleza kuwa hatua hiyo ni miongoni mwa maboresho yaliyofanywa na Serikali kwa lengo la kuimarisha ustawi wa wastaafu.

Akizungumzia umuhimu wa semina hizo, ambazo zitafanyika katika mikoa ya Mwanza, Arusha, Dar es Salaam na Dodoma pamoja na Unguja kwa upande wa Zanzibar, Mhe. Sangu ameipongeza PSSSF kwa kuandaa mafunzo yanayolenga kuwaandaa watumishi wanaokaribia kustaafu kukabiliana na maisha baada ya kumaliza utumishi wa umma.

“Ninawapongeza PSSSF kwa kuandaa semina hizi ambazo zinazinduliwa leo. Hakika, haya ni mafunzo muhimu yanayowaandaa wastaafu watarajiwa kuishi maisha bora baada ya kustaafu. Hongereni sana PSSSF, na ninawasihi semina hizi ziwe endelevu,” amesema.

Akizungumzia kaulimbiu ya PSSSF ya ‘Tunalipa Jana’, Waziri Sangu amesema kaulimbiu hiyo inaakisi utekelezaji wa huduma za Mfuko katika kulipa mafao kwa wakati, akiwahimiza wastaafu watarajiwa kuwa na imani na Mfuko huo.

“Kulipa Jana si nadharia, ni ukweli mtupu, na wengi wameshathibitisha hilo. Shukrani za pekee ziende kwa Mhe. Dkt. Samia Suluhu Hassan kwa kuiwezesha PSSSF kulipa jana. Hivyo, kuweni na amani kwani PSSSF ipo tayari kuwalipa,” amesema.

Kwa upande wake, Mkuu wa Mkoa wa Rukwa, Mhe. Makongoro Nyerere, akitoa salamu za mkoa, ameitaka PSSSF kuendelea kuwa karibu na wastaafu na kuhakikisha wanapata mafao yao kwa usahihi na kwa wakati, akisisitiza kuwa Mfuko huo unapaswa kuwa chanzo cha faraja na uhakika kwa wanachama wake wanapomaliza utumishi.

Naye Kaimu Mkurugenzi Mkuu wa PSSSF, Bw. Paul Kijazi, amesema kuwa hadi Juni 30, 2026, Mfuko ulikuwa umelipa jumla ya wanachama 390,761 mafao yenye thamani ya Shilingi trilioni 12.94.

Amesema PSSSF inaendelea kuimarisha mifumo yake ya utoaji huduma ili kuhakikisha wanachama wanaostahili wanapata mafao yao kwa wakati, akibainisha kuwa kaulimbiu ya ‘Tunalipa Jana’ inaendelea kuwa sehemu muhimu ya juhudi za Mfuko katika kuboresha huduma kwa wanachama na wastaafu.

Akifafanua kuhusu maudhui ya semina hizo, Bw. Kijazi amesema washiriki watapatiwa elimu kuhusu usimamizi wa fedha na fursa mbalimbali za uwekezaji, ikiwemo uwekezaji katika viwanda vidogo na vya kati kulingana na uwezo wao, masoko ya fedha, kilimo-biashara na ujasiriamali.

Amesema mafunzo hayo yanalenga kuwasaidia wastaafu watarajiwa kufanya maamuzi sahihi kuhusu matumizi na uwekezaji wa mafao yao, ili yaweze kuwapatia manufaa ya muda mrefu na kuwawezesha kukabiliana na mahitaji ya maisha baada ya kustaafu.

Semina hizo zinawezeshwa na wadau mbalimbali, wakiwemo Azania Bank, NMB Bank, CRDB Bank, Amana Bank, Orbit Security, UTT, Watumishi Housing investment,, Absa Bank na NBC Bank, ambao wanatoa elimu na mwongozo kuhusu huduma za kifedha na fursa za uwekezaji kwa wastaafu watarajiwa wa PSSSF.

Mwisho.

Read More →

MAGAZETI YA LEO JUMANNE OKTOBA 13,2026

Magazetini Leo

Read More →

AJALI MBILI MOROGORO WATU 32 WAFARIKI, 37 WAJERUHIWA

Na Lilian Kasenene, Morogoro

WATU 32 wamefariki dunia, wakiwemo askari wa Jeshi la Polisi, huku wengine 37 wakijeruhiwa katika ajali mbili tofauti zilizotokea usiku wa Oktoba 8, mwaka huu, katika maeneo ya Magole wilayani Kilosa na Mkambarani wilayani Morogoro.


Afisa wa Kitengo cha Habari na Uhusiano wa Hospitali ya Rufaa ya Mkoa wa Morogoro, Scholastica Ndunga, alisema Oktoba 8, majira ya saa mbili usiku, hospitali hiyo ilipokea miili ya watu wanne na majeruhi saba waliopata ajali eneo la Dumila, wilayani Kilosa.


Alisema katika ajali ya pili iliyotokea eneo la Mkambarani, wilayani Morogoro, usiku huohuo, hospitali ilipokea miili ya watu 28 na majeruhi 30.


Ndunga alisema kati ya miili iliyotokana na ajali ya Mkambarani, iliyokuwa imetambuliwa kwa kuzingatia jinsia ni ya wanaume 10 na wanawake saba, huku miili 11 ikiwa bado haijatambuliwa kutokana na sehemu kubwa ya miili hiyo kuungua.


Alisema miili hiyo imehifadhiwa katika chumba cha kuhifadhia maiti katika Hospitali ya Rufaa ya Mkoa wa Morogoro.


Kwa upande wake, Kamanda wa Polisi Mkoa wa Morogoro, ACP Andrew Kantimbo, alithibitisha kutokea kwa ajali hizo mbili na kueleza kuwa ajali ya kwanza ilihusisha askari watatu wa Jeshi la Polisi.


Kantimbo alisema ajali ya kwanza ilitokea eneo la Magole, wilayani Kilosa, na kuhusisha gari la Jeshi la Polisi Mkoa wa Morogoro lenye namba za usajili PT 5361 GMW, aina ya pickup, lililokuwa likiendeshwa na askari mwenye namba G9771, SGT Abdallah Ramadhani (37), likitokea Morogoro kuelekea Turiani.


Alisema gari hilo la polisi liligongana na lori lenye namba za usajili T309 EMK, aina ya Scania, lililokuwa na tela lenye namba 424 DUM, likitokea Dodoma kuelekea Dar es Salaam. Dereva wa lori hilo alifahamika kwa jina moja la Amiri.


Aidha, alisema lori hilo liligongana na gari jingine aina ya Scania, lenye namba za usajili T755 AJS na tela lenye namba T897 AJJ, lililokuwa likitokea Dar es Salaam kuelekea Tabora. Gari hilo lilikuwa likiendeshwa na Juma Mustaph, mkazi wa Tabora.


Amesema chanzo cha ajali hiyo bado kinachunguzwa.


Kuhusu ajali ya pili iliyotokea Mkambarani, Kantimbo alisema ilihusisha basi la abiria aina ya Higer, lenye namba za usajili T672 ELT, mali ya kampuni ya Green Line, lililokuwa likitoka Dar es Salaam kuelekea Mbeya, na lori aina ya Scania, lenye namba za usajili T902 EGN, lililokuwa limebeba shehena ya magogo ya milunda.


Kwa mujibu wa maelezo yaliyotolewa, lori hilo lilikuwa likiendeshwa na Abdallah (36), mkazi wa Makambako, huku dereva wa basi akitajwa kuwa Silaji Ndosi.


Kwa upande wake, Kaimu Kamanda wa Jeshi la Zimamoto na Uokoaji Mkoa wa Morogoro, Joseph Mwasabeja, alisema kikosi chake kiliongeza magari ya uokoaji baada ya kubaini ukubwa wa ajali na moto uliokuwa umesambaa eneo la tukio.


Mwasabeja alisema hatua ya kwanza ilikuwa kuokoa maisha ya watu, akieleza kuwa kikosi chake kilifanikiwa kutoa miili 29 na kuwasaidia majeruhi 30 kufikishwa katika Hospitali ya Rufaa ya Mkoa wa Morogoro.


Aliongeza kuwa idadi rasmi ya vifo na majeruhi inapaswa kuthibitishwa na wataalamu wa afya.


Miongoni mwa manusura wa ajali hiyo ni Obtato Mwanyigu, ambaye alisema alishuhudia lori likihama upande wake wa barabara na kuelekea upande wa basi walimokuwa wakisafiria.


Majeruhi waliotajwa ni Groli Michael, Issa Said, Sapi Raymond, Buron Waya, Fabian Aduka, Isaya Rachard, Asia Masalanje, Groli Ally, Melata Magolata, Daniel Malagala, Olive Paulo, Carolina Thomasi, Athumani Pazi, Mohamed Abdalla, Jane Petter, Abdikadiri Liwagala, Mohamed Abdikadiri na Omary Abdikadiri.


Majeruhi wengine ni David Paulo, Henry Nyarike, Amani Philipo, Neema Shabani, Consolata Mwalutanile, Shaila Magala, Asina Fundi, Devota Cassian, Rama Salum, Fadhili Kalinga, Anuari Hassan, Opitalu na Londoline.

Read More →

KARIAKOO YAZINDUA KITUO CHA HUDUMA KWA WATEJA

NA EMMANUEL MBATILO, DAR ES SALAAM

Shirika la Masoko ya Kariakoo limezindua Kituo cha Huduma kwa Wateja kwa lengo la kurahisisha upokeaji na utatuzi wa changamoto za wafanyabiashara, huku watumishi wakitakiwa kuzingatia lugha nzuri, heshima na staha wanapotoa huduma.

Wito huo umetolewa na Katibu Tawala wa Halmashauri ya Wilaya ya Ilala, Charangwa Selemani, leo jijini Dar es Salaam, wakati akizindua kituo hicho kinacholenga kuimarisha mawasiliano kati ya shirika hilo na wafanyabiashara wanaofanya shughuli zao katika soko hilo.

Charangwa amesema uzinduzi wa kituo hicho utakuwa na manufaa zaidi iwapo utaambatana na huduma bora, uwazi, usalama na utatuzi wa kero za wafanyabiashara kwa wakati.

Amesisitiza kuwa kituo hicho kinapaswa kupatikana saa 24 kwa siku ili kuhakikisha simu za wafanyabiashara zinapokelewa na changamoto zao kushughulikiwa ipasavyo.

Amesema ni muhimu watumishi wa kituo hicho kupewa mafunzo na semina zitakazowawezesha kuwasikiliza na kuwahudumia wateja kwa weledi, wakiwemo wafanyabiashara wanaoweza kuwasilisha malalamiko yao kwa hasira.

Ameongeza kuwa lugha nzuri katika utoaji wa huduma hujenga uaminifu, huvutia wateja na kuwafanya wafanyabiashara kuendelea kutumia huduma za soko hilo.

“Ukiwa na lugha nzuri, mteja atarudi tena. Tunataka Soko la Kariakoo liwe soko la mfano. Katika Wiki ya Huduma kwa Wateja, tujifunze kutoa huduma kwa usahihi, heshima na staha,” amesema.

Aidha, amewataka watumishi kuhakikisha maombi na changamoto zinazowasilishwa zinapatiwa ufumbuzi kwa wakati, huku wafanyabiashara wakisisitizwa kuuza bidhaa bora ili kuvutia wateja wa ndani na nje ya nchi.

Katika hatua nyingine, Charangwa amewataka wafanyabiashara kuimarisha usafi katika maeneo yao ya biashara na kusafisha mifereji inayowazunguka ili kukabiliana na athari zinazoweza kusababishwa na mvua kubwa zinazotarajiwa kunyesha.

Amesema usafi ni jukumu la kila siku na kuwataka wafanyabiashara kuhakikisha kila mmoja anakuwa na kifaa cha kutunzia taka katika eneo lake la biashara.

Kwa upande wake, Meneja Mkuu wa Shirika la Masoko ya Kariakoo, CPA Ashraph Abdulkarim, amesema kituo hicho kimeanzishwa ili kuwapa wafanyabiashara nafasi ya kuwasilisha changamoto zao na kutoa tathmini kuhusu ubora wa huduma zinazotolewa na watumishi wa shirika hilo.

Amesema wafanyabiashara wanaweza kutumia kituo hicho kuripoti changamoto mbalimbali, ikiwemo zinazohusu vizimba vya biashara na huduma nyingine zinazotolewa sokoni hapo.

“Soko la Kariakoo ni kitovu cha biashara. Mwenye changamoto tuko hapa tutawasikiliza. Iwapo kizimba chako kimechukuliwa, utatupigia,” amesema Abdulkarim.

Amewataka wafanyabiashara kushirikiana na shirika hilo katika kulinda miundombinu ya soko iliyojengwa kwa gharama ya zaidi ya Sh bilioni 28, akieleza kuwa hatua hiyo ni muhimu katika kuhakikisha mazingira ya biashara yanaendelea kuwa bora.

Abdulkarim amesema uzinduzi wa kituo hicho ni sehemu ya utekelezaji wa maelekezo ya Rais Samia Suluhu Hassan, aliyewahi kulitaka shirika hilo kujikita katika matumizi ya mifumo ya kidijitali katika utoaji wa huduma.

Amesisitiza kuwa watumishi wanapaswa kujiepusha na mabishano na wateja na badala yake kutumia weledi katika kushughulikia malalamiko na mahitaji yao.

“Hivi karibuni kumekuwa na tukio kati ya mtumishi na mteja wakijibizana. Tunafahamu kuwa mtumishi amepata elimu na amefundishwa namna ya kumhudumia mteja, hivyo anapaswa kutoa huduma kwa weledi bila bughudha,” amesema.

Amesema wafanyabiashara wanaweza kupiga simu bila malipo kupitia namba 0800114040 kwa saa 24 kwa siku, akieleza kuwa huduma hiyo itapatikana hata siku za Jumapili.

Aidha, Abdulkarim amesema utafiti uliofanywa na shirika hilo kwa kuwahoji wafanyabiashara umeonesha kuwa huduma zinazotolewa zinakubalika kwa zaidi ya asilimia 70, huku usafi ukiwa miongoni mwa huduma zilizotajwa kuridhisha wafanyabiashara.

Read More →